Урысыем хэгъэгу кIоцI IофхэмкIэ икъулыкъухэм яIофышIэ и Мафэ къызщыблагъэрэм Адыгеим и ЛIышъхьэу КъумпIыл Мурат АР-м и МВД хэтхэм ясэнэхьат епхыгъэ мэфэкIымкIэ афэгушIуагъ.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Прокуратурэ, АР-м и Апшъэрэ хьыкум, щынэгъончъэ­нымкIэ федеральнэ къулыкъум и ГъэIорышIапIэу Адыгеим щы­Iэм, Урысыем и Следственнэ комитет иследственнэ гъэIорышIапIэ, ФСИН-м АР-мкIэ и ГъэIорышIапIэ, УФ-м ошIэ-дэмышIэ IофхэмкIэ и Минис­терствэ Адыгэ РеспубликэмкIэ и ГъэIорышIапIэ, дин конфессиехэм ялIыкIохэр.
Пэублэ гущыIэкIэ къэзэрэугъоигъэхэм закъыфигъэзагъ АР-м хэгъэгу кIоцI IофхэмкIэ иминистрэу Олег Безсмельницыным. ЯIофшIэгъухэу фэхы­гъэхэм яшIэжь агъэлъапIэзэ зы такъикъэ зыщэтхэ ыкIи АР-м и МВД ибыракъ къызырахьэ нэ­ужым къулыкъум иподразделение зэфэшъхьафхэм яIофшIэн фэгъэхьыгъэ видеоролик къагъэ­лъэгъуагъ.
Адыгеим и ЛIышъхьэу КъумпIыл Мурат ишIуфэс псалъэ къызэрэщыхигъэщыгъэмкIэ, хэ­бзэгъэуцугъэр ыкIи цIыфхэм ящынэгъончъагъэ къэзыухъумэрэ пстэуми яблэнагъэ итамыгъэу щыт мы мэфэкIыр.
«ШъуиIофшIэн псэемыблэжьныгъи, теубытагъи ищыкIагъэх, цIыфхэм шъунаIэ зэратетырэм дакIоу шъуиIэпэIэсэныгъи ренэу хэжъугъэхъон фаеу ащ къешIы. Полицейскэхэм яIофшIэнкIэ анахь мэхьанэ зиIэхэм ащыщых уи Хэгъэгу уфэшъыпкъэныр, пшъэрылъэу щытхэр гъэхъагъэ хэлъэу зэшIохыгъэ хъунхэм ре­нэу уфэхьазырыныр», — къы­Iуагъ КъумпIыл Мурат.

ТичIыпIэгъухэу мы къулы­къум Iоф щызышIагъэхэр, Хэгъэгу зэошхом илъэхъан бланэу зи­къэ­ралыгъо къэзыухъумагъэхэр, мамыр лъэхъаным хэбзэгъэуцугъэу щыIэр укъуагъэ мыхъуным зынаIэ тезыгъэтыхэрэр, зэпэуцужьныгъэхэр къызэрыхъу­хьэрэ чIыпIэхэм зэрифэшъуашэу якъулыкъу пшъэрылъхэр ащызгъэцакIэхэрэр республикэм и ЛIышъхьэ агу къыгъэкIыжьы­гъэх.
Джырэ уахътэм къыгъэуцурэ пшъэрылъхэм атетэу хэгъэгу кIоцI IофхэмкIэ къулыкъухэм къафэгъэзагъэхэр зэрагъэцакIэ­хэрэм игугъу къызешI нэужым республикэм и ЛIышъхьэ ана­хьэу анаIэ зытыраригъэдзагъэр хэушъхьафыкIыгъэ дзэ операциер зыщыкIорэ лъэхъаным обществэм зыпкъитыныгъэ хэлъыныр ары. КъумпIыл Мурат непэкIэ зэшIохыгъэн фэе пшъэ­рылъхэу къытпыщылъхэм ащыщэу къыхигъэщыгъэхэр экстремизмэм, терроризмэм, экономикэм ылъэныкъокIэ зэрахьэрэ бзэджэшIагъэхэм ыкIи интернетымкIэ шIэпхъэджэгъэ зэфэ­шъхьафхэу зэрахьэхэрэм апэуцужьыгъэныр ары.
БзэджэшIагъэу зэрахьэхэрэр нахьыбэу къыхагъэщыхэ зэрэхъу­гъэм, кощын Iофхэм зэрищыкIагъэм лъыкIахьэу зэралъы­плъэхэрэм, цIыфхэр жъугъэу зыщызэIукIэхэрэ чIыпIэхэм мы­хъо-мышIагъэхэр къащымыхъунхэм, гъогухэм къатехъу­хьэрэ тхьамыкIагъохэм къакIегъэчыгъэ­ным япхыгъэ пшъэрылъхэм анахьэу ЛIышъхьэм анаIэ тыраригъэдзагъ.

«Неонацизмэм пэуцужьхэзэ Урысыем ишъхьафитыныгъэ тидзэкIолIхэм къызщаухъумэрэ уахътэм тэри, зэо кIыбым щыIэхэм, хэгъэгум зэгурыIоныгъэу ­илъыр зэщызгъэкъон мурад зиIэхэм, лъэпкъ зэфэшъхьафхэм къахэкIыгъэхэу ыкIи дин зэмылIэужыгъохэр зылэжьхэу Урысыем исхэм зэмызэгъыныгъэ къахэзылъхьанэу пылъхэм тапэуцужьын фае», — къыIуагъ КъумпIыл Мурат.
Урысыем и Президентэу Владимир Путиным игущыIэхэр республикэм и ЛIышъхьэ агу къыгъэкIыжьыгъэх: «Полицейскэхэм пшъэрылъэу яIэр законымрэ къэралыгъомрэ акIуачIэ шIошъхъуныгъэу цIыфхэм фыряIэр джыри нахь пытэным, зэфагъэр текIоным апае тфэлъэкIыщтыр зэкIэ тшIэщт».
Къулыкъум иветеранхэм ыкIи непэкIэ ащ Iоф щызышIэхэрэм ямэфэкIыкIэ зафэгушIо нэужым КъумпIыл Мурат афэлъэIуагъ псауныгъэ пытэ, щыIэкIэшIу яIэнэу ыкIи Iофэу зыфэгъэзагъэхэм гъэхъэгъэшхохэр щашIынхэу.
Мы зэIукIэм къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, хэбзэухъу­мэкIо къулыкъухэм, АР-м и МВД дэжь щызэхэщэгъэ Общественнэ советым япащэхэр, УФ-м хэгъэгу кIоцI IофхэмкIэ икъулыкъухэм яшъолъыр къутамэ иветеранхэм ащыщхэр.
Офицерхэу зиIофшIэнкIэ гъэхъэгъэ­шхохэр зышIыгъэхэм АР-м и ЛIышъхьэ ирэзэныгъэ тхылъхэр, АР-м и Къэра­лыгъо Совет — Хасэм идипломхэр, ФСБ-м и ГъэIорышIапIэу Адыгэ Рес­публикэм щыIэм, Урысые Федерацием и Следственнэ комитет иследственнэ гъэIорышIапIэу Адыгеим щыIэм, Уры­сыем и Росгвардие, ФСИН-м ягъэIорышIапIэхэу Адыгэ Республикэм щыIэхэм, МЧС-м Адыгэ РеспубликэмкIэ и ГъэIорышIапIэ ярэзэныгъэ тхылъхэр ара­тыжьыгъэх. Ащ нэужым полицием иIофышIэхэмрэ ахэм якIэлэцIыкIухэмрэ къагъэхьазырыгъэ творческэ къэ­гъэлъэгъоныр щыIагъ.
АР-м и ЛIышъхьэ ипресс-къулыкъу къытыгъэ къэбар­хэмкIэ Тхьаркъохъо Сафыет.