Адыгеим ичIыопс джыри зэ кинорежиссерхэр къызфищагъэх. Режиссерэу Александр Богу­славскэр зыдэлэ­жьэрэ ­IофшIэгъакIэу, фэнтези шъуашэм илъ сериалэу «Красное озеро» зыфи­Iорэр зыщы­тырихы­гъэ­хэм ащыщ ти­респуб­ликэ.

Тхьамэфищым къыкIоцI съе­мочнэ купыр къушъхьэлъэ Адыгеим щыIагъ, Мыекъопэ районым ичIыпIэ лъэгъуп­хъэхэм, Хьаджыкъо дэт псы­хъурэе плъыжьым, гъочIэгъхэм ащылэжьагъ. Сериалым иау­жырэ пычыгъохэр Ры­фабгъо ипсыкъефэххэм ащыщ щытырахыгъэх. Къызщыуцугъэхэр апэрэр ары.
Александр Богуславскэр, режиссер:
— Мэзхэр, къушъхьэ псы­хъохэр, псыкъефэххэр, гъо­чIэгъхэр бэдэд, анахь шъхьа­Iэр — а зэкIэри зы чIыпIэм щызэхэугъоягъэх пIоми хъущт. Чыжьэу зыгорэм укIон ищыкIагъэп. Арышъ, Адыгеим мы лъэныкъомкIэ ебгъэпшэн щыIэп.
Ольга Олимпиева, «Красное озеро» зыфиIорэ сериалым ипродюсер шъхьаI.
— Пшысэр зыщытетхыщтым бэрэ тылъыхъугъ. ЧIыпIэ хъущтым тегупшысэзэ Адыгеим тыкъыщыуцугъ. Шъып­къэр пIощтмэ, апэрэ нэплъэгъумкIэ шIу тлъэгъугъэ. Трюк бэдэдэ пшысэм хэтыщт. Анахь гъэшIэгъонхэр, хьалэмэт дэдэхэр зэкIэ Адыгеим щытетхыгъэх. Арышъ, еплъыщтхэм агу ри­хьынэу тэгугъэ, лъэшэу тегугъугъ. Мыщ фэдэу Адыгеим тыщылэжьэн зэрэтлъэкIы­гъэмкIэ «тхьашъуегъэпсэу» ятIо тшIоигъу республикэм и ЛIышъхьэу КъумпIыл Муратрэ культурэмкIэ министрэу Аулъэ Юрэрэ.

Сериалым Урал ихъишъэ­хэмрэ ипшысэхэмрэ ылъа­псэх. Хъурэ-шIэрэр зыщы­хъу­рэр Алтай, къутырэу Красный Камень. КIэлэеджэкIуищымэ гъэмэфэ зыгъэпсэфыгъом, мы­жъо­къычIэхыпIэщтыгъэу псыр зышъхьарыт хъужьыгъэм зыщагъэпскIызэ, минерал лъэпкъэу малахитыр къыщагъотыгъ ыкIи гъэшIэгъонэу къяхъулIэрэр зэкIэ ащ къыщежьэ. КIэлэцIыкIу Iэтахъохэм афэгъэхьыгъэу унагъор зэрэщытэу зэплъышъущт фильм. Хьалэмэтыгъэхэр бэу хэтыщтых, джырэ ыкIи блэкIыгъэ уахътэр зэхэгъэщэгъэщтых, нахьыжъхэмрэ нахьыкIэхэмрэ язэфыщытыкIэ дахэ икъигъэ­лъэгъукIыни чIыпIэ щиубытыщт.
АМ: О уиеплъыкIэкIэ, сыда фэнтези шъуашэм илъ фильмхэр непэ на­хьыбэу тырахыхэ зыкIэ­хъугъэр?
— ЦIыфхэм сыдигъуи якIас ыкIи якIэсэщт къэхъун зымы­лъэкIыщтыр, дунаикIэхэр. Къау­гупшысыгъэр щыIэу къызшIобгъэшIыныр сыдигъуи гъэшIэ­гъоны, дахэ. Арышъ, сэ зэрэс­лъытэрэмкIэ, фэнтези шъуашэм игъо икIыщтэп. ЕтIани, унагъор зэрэщытэу, цIыкIуи ини, еплъы­шъунэу зыхъукIэ, ар дэгъу дэд. Ащ фэд тыздэлажьэрэр, — къыд­дэгуащэ режиссерэу Александр Богуславскэр.
IофшIагъэр гъэшIэгъоны зы­шIырэмэ ащыщых хэлэжьэрэ ак­терхэри. КIэлэцIыкIухэм яроль­хэр къашIых Екатерина Тем­новам, Алексей Родионовым, Сергей Чичикиным.
Нахьыжъхэу хэлажьэх Алексей Серебряковыр, Андрей Фе­дорцовыр, Евгения Симоновар, Константин Плотниковыр, Агриппина Стекловар, Даня Киселевыр ыкIи Варвара Во­лодинар.
— Мыщ фэдэ фэнтези шъуа­шэм илъ проектым апэрэп сы­зэрэхэлажьэрэр, ау чIыпIэ дахэу зыщытетхыгъэм ибагъэкIэ зэбгъэпшэн щыIэп. Сценарием сызеджэм, сыгу рихьыгъ. Къэс­шIырэ ролыр нэгъэсыгъэу тезгъэфэным пае Адыгеим ичIыопси ишIуагъэ къысэкIыгъ. Мыщ фэ­диз дэхагъэ плъэгъу зыхъукIэ, Iо хэмылъэу IэпыIэгъушху. Арышъ, чIыпIэхэмкIэ тырагъэфагъэу сэлъытэ, — къытфиIотагъ актерэу Даня Киселевым.
ЗэлъашIэрэ актерхэм афэ­шъхьафэу Адыгеим иныбжьыкIэхэри пшысэм итехын ра­гъэблэгъагъэх. ЦIыфыбэ зыхэт пычыгъохэмкIэ ащ дэлэжьэгъэ Дарья Купинам къызэриIуа­гъэмкIэ, псэупIэу Каменномостскэм иеджапIэ икIэлэеджэкIо 25-рэ хэлэжьагъ.
— ЕджапIэм ипащэ тилъэIу зыфэтэгъазэм, ны-тыхэм адэ­гу­щыIи, ищыкIагъэхэр дгъэ­хьа­зырхи, ныбжьыкIэхэр къыт­фи­гъэ­кIуагъэх. ЯлъэгагъэкIи яшъом­бгъуагъэкIи тищыкIагъэ­хэр къа­хэтхыгъэх. Фэягъэр на­хьыб, ау идгъэкъугъагъ. Пшы­сэм хэт малахитыдзэр, ащ идзэкIолIхэр ахэр арыгъэх. Ащ пае шъошэ шъхьафхэр дгъэхьазырыгъагъэх. Чэщэуи тетхыгъ, псыми хэтыгъэх (мыуцIынынхэу шъуашэхэр шIыгъэх), гъочIэгъми зыкъыщашIыгъ. Лъэшэу тагъэ­рэзагъ, бэ ащэчыгъэр. Актерэу ущымытэу а пстэур хьылъэ, ау кIэлэеджакIохэм аукIочIыгъ. Арышъ, «тхьашъуегъэпсэу» ятэ­Iо, — тыщигъэгъозагъ Дарья Купинам.
Пшысэр Iахьий хъущт, ары пэпчъ такъикъ 45-рэ икIыхьэгъэщт. Серие пэпчъ Адыгеим ичIыпIэхэр хэтыщтых. Александр Богуславскэм къызэриIуагъэмкIэ, пэшIорыгъэшъэу зэрэра­хъухьэрэмкIэ, къихьащт илъэсым ибжыхьэ IофшIагъэр къыдэкIыщт.Сериалым итехын зигукъэкIыр онлайн-кинотеатрэу Okko, продюсер гупчэу Originals Production ыкIи NORM PRO­DUCTION.
Анцокъо Ирин.