Урыс культурэм и Мафэ фэгъэхьыгъэ Iофтхьабзэхэр Адыгеим ирай­онхэм, икъоджэ псэупIэхэм ащыкIуагъэх.

Ахэм якIэух зэфэхьысыжь хъугъэ Адыгэ кIэлэегъэджэ колледжэу Андырхъое Хъусен ыцIэ зыхьырэм щызэхащэгъэ театральнэ-джэгун программэу «Сказ на Покров Пресвятой Богородицы» зыфи­Iорэр. Ащ кIэщакIо фэхъугъ АР-м лъэпкъ IофхэмкIэ, Iэ­кIыб къэралхэм ащыпсэурэ тилъэп­къэгъухэм адыряIэ зэ­пхы­ны­гъэхэмкIэ ыкIи къэбар жъу­гъэм иамалхэмкIэ и Комитет.
Iофтхьабзэм хэлэжьагъэх Комитетым ипащэу Шъхьэлэхъо Аскэр, ащ иIофышIэхэр, колледжым икIэлэегъаджэхэр, истудентхэр, искусствэ зэфэшъхьафхэмкIэ IэпэIасэхэр.
— Илъэс къэс адыгэ ыкIи урыс культурэхэм ямафэхэр республикэм щыхэтэгъэунэфыкIых. Федеральнэ гупчэм ащ пэIухьащт мылъкур къызэрэтфитIупщырэм ишIуагъэ­кIэ ащ нахь зядгъэушъомбгъун амал щыIэ хъугъэ ыкIи гъэ­рекIуи, мыгъи Мыекъуапэ имы­закъоу, къоджэ псэупIэхэми ащызэхэтщагъэх. А шIыкIэр бэмэ агу рихьыгъ, сыда пIомэ зэкIэ цIыфхэр район гупчэ-
хэм кIонхэ амал яIэп, ау мэфэкI Iофтхьабзэхэм яплъыхэ ашIои­гъу. Ахэр зыщызэхэт­щэщтхэ чIыпIэхэр джы щыIэх, къэралыгъо программэхэм яшIуагъэкIэ рес­публикэм икъо­джэ псэупIэхэм адэт культу­рэм иунэхэр зэтырагъэпсыхьагъэх. Зэфэ­хьысжьхэм ягугъу къэтшIымэ, мыгъэрэ Iофтхьабзэхэм цIыфыбэ ахэлэжьагъ, ары гухэлъэу тиIагъэри — ныб­жьы­кIэхэр лъэпкъ культурэм, та­рихъым ащыдгъэ­гъозэнхэр. Къыддэхъугъэхэри, тапэкIи тыздэлэжьэщт лъэныкъохэри къэнэфагъэх, — хигъэунэфыкIыгъ Шъхьэлэхъо Аскэр.
МэфэкI концертыр рамы­гъажьэзэ, къэгъэлъэгъонэу къы­­зэIуахыгъэм къэзэрэу­гъои­гъэхэр еплъынхэ амал яIагъ. Урыс лъэпкъ нэшанэ­хэр къизыIотыкIырэ гъомылапхъэхэр, пкъыгъохэр, ныс­хъапэхэр, тхьэлъэIухэр зытетхэгъэ ­пхъэм ­хэшIыкIыгъэ­хэр къырахьылIагъэх. Мыщ къекIолIагъэхэм ащыщэу Краснодар краим къикIыгъэ Анна Скорынинам гущыIэгъу тыфэхъугъ. Ащ ду­наим зыфэ­дэ темыт пряникым хэшIыкIыгъэ тхылъхэр къэгъэ­лъэгъоным къырихьылIагъэх.
— ЗитеплъэкIэ зэфэшъхьаф пкъыгъохэр пряникым хэс­шIыкIынхэр зы хъугъэ-шIагъэ сшъхьэ къыригъэхьагъ. Гурыт еджапIэм урыс литера­турэм­кIэ езыгъаджэщтыгъэ кIэлэегъаджэу илъэс 40-м ехъу­рэ Iоф зышIагъэм ыгъэшIэгъон шIухьафтын фэшIыгъэ­ныр ары. Сыда пIомэ, а бзы­лъфыгъэм егъашIи IэшIу-­IушIу къэмлани, къэгъагъэ Iэ­рами аIихыгъэп, ар къуалъхьэу ылъытэщтыгъ. Сэ сыгу къэкIи «Евгений Онегин» те­тхагъэу тхылъ пряникым хэсшIыкIи зыфахьым, шIогъэ­шIэгъон дэдэу аIихыгъ ыкIи ыIэхэр сысыхэзэ зэрыгъыщтыгъэр видео тырахыгъэу сиI. Мары шъуеплъымэ, тхылъхэм анэмыкIэу рево­люцием ыпэкIэ Урысыем изытетыгъэ къизыIотыкIырэ сурэтхэри пряникым хэсшIыкIыгъэу шъулъэгъущтых, джащ фэдэу псэушъхьэхэри. Тиуна­гъокIэ мастерской тиI. Си­шъхьэ­гъуси, сипшъэшъиплIи лъэныкъо зэфэшъхьафхэмкIэ тыIэпэIасэх. Анахьэу тызыпы­лъыр тикIэлэцIыкIухэм ­лъэпкъ культурэр, тарихъыр ашIэнхэр, ахэм уасэ афашIыным фэпIугъэнхэр ары, — къыхигъэщыгъ Анна Скоры­нинам.
Iэшъынэ Сусан.