Адыгэ Республикэм и ЛIышъхьэу КъумпIыл Мурат Адыгеим иапэрэ Президентэу Джарымэ Аслъан Алый ыкъом ыныбжь илъэс 85-рэ зэрэхъурэмкIэ фэгушIуагъ.

Лъытэныгъэ зыфэсшIырэ
Аслъан Алый ыкъор!
Тиреспубликэ ис цIыфхэм о пцIэ рапхы Адыгеим итарихъ ичэзыукIэ ублагъэ зэрэ­хъугъэм. Республикэ ныбжьыкIэм пэщэ­ныгъэ дызепхьэзэ, къэралыгъо институтхэм язэхэщэнрэ яхэхъоныгъэрэ уиIахьышхо ахэп­шIыхьагъ, тишъолъыр ихэхъоныгъэ лъэ­псэ пытэ фэпшIыгъ. Зигъо Iофыгъохэм зэ­шIохыкIэ амалхэр къазэрафэбгъотыщтыгъэм, уигухэлъ къыбдэхъунымкIэ пытагъэ къызэрэзхэбгъафэщтыгъэм, уиIоф узэрэ­фэшъыпкъагъэм, уихэку гупсэ шIулъэгъоу фыуиIэм яшIуагъэкIэ пшъэрылъ къинхэр зэшIопхынхэ, гухэлъэу уиIэхэр къыздэб­гъэ­хъун плъэкIыщтыгъ. Мамырныгъэмрэ лъэпкъ зэгурыIоныгъэмрэ Темыр Кавказым щыгъэпытэгъэнхэм лъэкIэу уиIэр зэрепхьы­лIагъэм пае зэрэ Урысыеу лъытэныгъэшхо къыщыпфашIы.
Республикэм хэхъоныгъэ езыгъэшIыщт зигъо Iофыгъуабэмэ язэшIохынкIэ шIэныгъэ куоу, опытышхоу пIэкIэлъхэр, политикэм хэшIыкI ин зэрэфыуиIэр цIыфхэм къа­шъхьэпагъэх. Ахэм яшIуагъэкIэ гухэлъ, про­ект гъэшIэгъонхэр лъэныкъо зэфэшъхьафхэм ащыпхырыщыгъэ хъугъэх.
Адыгеими, ащ щыпсэурэ лъэпкъхэми узы­шъхьамысыжьэу узэрафэлэжьагъэм фэшI лъэшэу сызэрэпфэразэр къэсэIо.
Лъытэныгъэ зыфэсшIырэ Аслъан Алый ыкъор, псауныгъэ пытэ, щыIэкIэшIу уиIэнэу, гушIуагъом ущымыкIэнэу, унасыпышIонэу, уигъашIэ кIыхьэ хъунэу, шIоу щыIэр къыб­дэхъунэу сыпфэлъаIо! — къыщеIо шIуфэс телеграммэм.