Адыгеим гъогухэмкIэ иинфраструктурэ изегъэушъомбгъун Адыгэ Республикэм мэхьанэшхо щыраты. Ар къеушыхьаты лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр гъэхъагъэ хэлъэу зэрагъэцакIэрэм. Мы программэм тетэу гъогушIхэм республикэ, чIыпIэ мэхьанэ зиIэ гъогухэр шапхъэхэм адиштэу зэтырагъэпсыхьэх.

ГущыIэм пае, гъогушIхэм Джэджэ районым иавтомобиль гъогухэм яIахьи 4 агъэцэкIэжьыгъ. Ахэр станицэу Къэлэрмэз идэхьапI, автомобиль гъогоу «Сергиевскэр – Тамбовскэр – Фарсовэр» зыфиIорэм изы Iахь, автомобиль гъогоу «Мыекъуапэ – Джаджэ – Псыбай – Зеленчукскэр – Карачевск» зыфиIорэм къыщежьэу станицэу Джаджэ идэхьапIэ екIурэр, автомобиль гъогоу «Джаджэ – Штурбино» зыфиIорэм изы Iахь. ПстэумкIи километри 7-м ехъу зикIыхьэгъэ гъогоу агъэцэкIэжьыгъэхэм сомэ миллиони 160-м ехъу апэIухьагъ. IофшIэнхэр зэкIэ ипIалъэм аухыгъэх.
Республикэ «Автодорым» ипресс-къу­лыкъу къызэритыгъэмкIэ, къихьащт илъэ­сым километрэ 13-м ехъу зикIыхьэгъэ гъогухэр агъэцэкIэжьыщтых.
Шъугу къэтэгъэкIыжьы Адыгеим 2024-рэ илъэсымкIэ планыр гъэхъагъэ хэлъэу зэригъэцэкIагъэр ыкIи къихьащт илъэсым иплан игъэцэкIэн зэрэфежьагъэр.
«ПэшIорыгъэшъэу зэзэгъыныгъэхэр зэрадашIыгъэхэм, тиреспубликэ ичIыопс изытет апкъ къикIыкIэ гъогушIхэр 2024-рэ илъэсымкIэ телъытэгъэгъэ Iоф­шIэнхэр зэрагъэцэкIагъэм къыщыуцугъэхэп. 2025-рэ илъэсымкIэ планым игъэцэкIэн фе­жьагъэх, Красногвардейскэ районым республикэ мэхьанэ зиIэ автомобиль гъогухэм яIахьитIу шап­хъэхэм адиштэу щызэтырагъэпсы­хьагъ. Ахэр автомобиль гъогоу «Некрасовскэр – Хьатикъуай» зыфиIорэм иIахьэу километри 3 зикIыхьагъэр, рес­публикэ мэхьанэ зиIэ автомобиль гъо­­­— г­оу «Красногвардейскэр – Улап – За­рево» зыфиIорэм иIахьэу километри 2,67-рэ хъурэр ары», – къыIуагъ автомобиль гъогухэмкIэ ГъэIорышIапIэу «Адыгеяавтодорым» иотдел ипащэу Дмитрий Бороненкэм.
Федеральнэ гупчэм пшъэрылъэу къыгъэуцухэрэр республикэм дэгъоу зэригъэцакIэхэрэр Марат Хуснуллиным хигъэунэфыкIыгъ.
«Лъэпкъ, федеральнэ проектхэр зэрагъэцакIэхэрэр зэдгъэшIагъ. КъэсIон слъэкIыщт Чэчэн Республикэм, Пензенскэ, Нижегородскэ, Курскэ хэкухэм ыкIи Адыгэ Республикэм программэ 17-мкIэ гъэхъэгъэ дэгъухэр къызэрагъэлъэгъуагъэр. Джащ фэдэу ыпэкIэ лъыкIотэнхэу ахэм сыкъяджэ!» – къыIуагъ УФ-м и Правительствэ и Тхьаматэ игуадзэу Марат Хуснуллиным.
Тэхъутэмыкъое районымкIэ псэупIэу Яблоновскэм иурамэу Титовым ыцIэ зыхьырэр нахь зэтегъэпсыхьагъэхэм шIэхэу ащыщ хъущт.
Лъэпкъ проектэу «ПсэупIэмрэ къэлэ щыIакIэмрэ» зыфиIорэм диштэу мы урамым тет унэхэм яящэнэрэ щагу изэтегъэпсыхьан ыкIэм фэкIо.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Сити-Строй» зыфиIорэмрэ муниципальнэ образованиеу «Яблоновскэ къэлэ псэупIэм» иадминистрациерэ зэдашIыгъэ зэзэгъыныгъэм тетэу подрядчикым екIолIапIэхэм, лъэс гъогухэм, джэгупIэхэм асфальтэу ате­лъыр зэблихъущт, остыгъэхэр, тетIысхьапIэхэр, хэкIитэкъупIэхэр щагум дигъэуцощтых, къэгъагъэхэмрэ чъыгхэмрэ щигъэтIысхьащтых.
ЧIыпIэ администрацием къызэритыгъэм­кIэ, Титовым ыцIэ зыхьырэ урамым тет унэу N 68-м ищагу изэтегъэпсыхьан пае сомэ 7248256-рэ къыхагъэкIыгъ. Тыгъэгъазэр къимыхьэзэ гъэцэкIэжьын Iоф­шIэнхэр аухынхэу рахъухьэ.
Адыгеим ипсэупIэхэм яобщественнэ чIыпIэхэмрэ ящагухэмрэ язэтегъэпсы­хьанкIэ мэхьанэшхо иI ахэм адэсхэр ащ фэдэ Iофхэм зэрахэлажьэхэрэм.
Лъэпкъ проектым диштэу апэрэ чэзыоу зэтырагъэпсыхьащт общественнэ чIыпIэхэмрэ щагухэмрэ къызэрэхахыхэрэр цIыфхэм амакъэ атызэ ары. Ащ фэдэ Iофтхьабзэм икIэуххэм атетэу апэрэ чэзыоу зэтырагъэпсыхьащт чIыпIэхэр къэнафэх. Къихьащт илъэсми ащ фэдэ Iофтхьабзэхэр лъагъэкIотэщтых.