Электромобильхэм кIуачIэ язытыщт станциехэм яшIынкIэ программэм ипхырыщын Адыге­им ыкIэм щыфэкIо.

Ащ фэгъэхьыгъэу Адыгеим и ЛIышъхьэ социальнэ хъытыу­хэмкIэ къыIотагъ.
— ШэкIогъум ыкIэм ехъулIэу Адыгеим ащ фэдэ станцие 30 щыттIупщыщт. КВт 22-рэ фэдиз кIуачIэу яIэщт ыкIи такъикъ 40-м нэсэу уахътэу ащ тефэрэр ахэм нахь агъэкIэкIын алъэкIыщт. Станцие пэпчъ машинитIум къы­щегъэжьагъэу плIым нэс чIэфэн ылъэкIыщт, — къыIуагъ КъумпIыл Мурат.
Ащ нэмыкIэу ЛIышъхьэм къы­зэрэхигъэщыгъэмкIэ, а станцие­хэр зыщашIыщт чIыпIэхэр къыхахыхэ зэхъум техникэм ылъэ­ныкъокIи автомобилистхэм алъэ­ныкъокIи Iэрыфэгъу зэрэхъущтхэм къыпкъырыкIыгъэх. Район пэпчъ пIоми хъунэу ащ фэдэ станциехэр къадэтэджэщтых, республикэм икъыдэхьэгъу пстэуми ахэр ащагъэуцущтых.
ТЦ-у «Майкоп Молл» зыфи­Iорэм дэжь, Мыекъуапэ иура­мэу Депутатскэм, къуаджэу Ты­гъу­рыгъой пхырыкIырэ гъогум къы­пэIут кафем, къуаджэу Пчы­хьалIыкIуае дэжь гъогу серви-
сэу щытым, Инэм, Адыгэкъалэ апэблагъэу, Тэхъутэмыкъое рай­оным джащ фэдэу станциехэр арытыщтых. Мыекъопэ районым зекIонымкIэ ишъолъыр ащ фэдэ станцие заули щагъэ­псынэу рахъухьагъ.
— ИщыкIэгъэ Iэмэ-псымэхэр гъэуцугъэнхэм пае инвесторхэм тадэлажьэ, инвестпроектхэр пхырыщыгъэнхэм пае мы илъэ­сым ахэм ахъщэ афалъэгъу­жьыщт, пстэумкIи зэхэубыта-­
гъэу субсидиехэр зэрэхъущтхэр сомэ миллион 82,8-рэ. Зэзэгъы­ныгъэхэу зэдашIыгъэхэм атетэу илъэси 5-м къыкIоцI станциехэм зэпыу имыIэу Iоф ашIэнымкIэ инвесторхэм пшъэдэкIыжь ­ахьыщт. Мы IофшIэнэу зэдагъэ­цэкIэщтым цIыфхэм ящыIэ­кIэ-псэукIэкIи зекIонымкIэ инфраструктурэм тапэкIи хэхъоныгъэ зэришIыщтымкIи изэрар горэ якIы­нэу щытэп, — къыхигъэщыгъ АР-м и ЛIышъхьэ.