Лъэпкъхэм языкIыныгъэ и Мафэ Мыекъуапэ ичIыпIэ зэфэшъхьафхэм ащыкIогъэ Iофтхьабзэ­хэмкIэ хэгъэунэфыкIыгъэ хъугъэ. Зэкъошныгъэм игупчэ щызэхащэгъэ ­митинг-концертыр ары анахь къэзгъэдэхагъэр.

Мэфэ псаум лъэпкъ IэпэIасэхэм яIэшIагъэхэм якъэгъэлъэгъон щыIагъ. Мыекъуапэ ихьа­кIэхэр ыкIи щыпсэухэрэр Адыге­им ис цIыф лъэпкъ зэфэшъхьафхэм яшхыныгъохэм ахэIэн амал яIагъ. МэфэкIым тегъэ­псыхьагъэу Урысыемрэ Адыгеимрэ якъэралыгъо быракъхэм яфлешмоби щыIагъ.
Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет хэтхэр, депутатхэр, лъэпкъ-культурнэ ыкIи общественнэ зэхахьэхэм, патриот клубхэм, научнэ ыкIи творческэ интеллигенцием, дин зэфэшъхьафхэм ялIыкIохэр а Iофтхьабзэхэм ахэлэжьагъэх.
Шъугу къэтэгъэкIыжьы: ­лъэпкъ зыкIыныгъэм и Мафэ 2005-рэ илъэсым агъэнэфэ­гъагъ. 1612-рэ илъэсым щыIэгъэ хъугъэ-шIагъэм епхыгъэу ар щытыгъ. Польшэм итехэкIо кIуа­чIэхэм Москва къаIэкIэхыжьыгъэным фэгъэхьыгъэ уIэшыгъэ банэм Кузьма Мининымрэ Дмитрий Пожарскэмрэ япэщагъэх.

Адыгеим и ЛIышъхьэ къэзэ­рэугъоигъэхэм закъыфигъазэзэ къызэрэхигъэщыгъэмкIэ, Урысыеу цIыф лъэпкъ зэфэшъхьафыбэ зэгурыIоныгъэ ахэлъэу зыщыпсэухэрэм ягукIуачIэ зы­нэсырэм, къиныгъохэмрэ ушэтынхэмрэ апашъхьэ ахэм зэ­кIакIо зэращырямыIэм итамыгъэу мы мэфэкIыр щыт.
«Урысыем инеущрэ мафэ нахьышIу зэрэхъущтым, цIыфхэм языкIыныгъэ-зэгурыIоныгъэ гъэпытэгъэным ткIуачIэ зэхэлъэу зэкIэми тыфэлажьэ. Сыд фэдэ къиныгъохэр къыкъокIыгъэхэми, къэралыгъом и Президентэу Владимир Путиным унашъоу ышIыгъэхэм адедгъа­штэзэ, Урысыем идзэрэ идзэ­кIолIхэу зэкIэми зэдытие Хэ­гъэгушхом инеущрэ мафэ на­хьышIу шIыгъэным фэгъэхьыгъэ бэнэныгъэм зиIахь хэзышIыхьэ­хэрэмрэ тырягъус. Лъэпкъэу къызхэкIыгъэхэмрэ динэу алэ­жьырэмрэ ямылъытыгъэу, пытэу зэкъотхэу тидзэкIолIхэм япшъэ­рылъ агъэцакIэ, тятэжъ лIы­хъужъхэм зэрахьагъэ блэнагъэм игъогу тетхэу мэзекIох», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, фронтым деIэгъэным, экономикэмрэ социальнэ лъэныкъомрэ хэхъо­ныгъэ ашIыным мэхьанэшхо яI зэкIэми тыгукIэ тызфэблэрэ, зэдытие текIоныгъэр къыдэтхыным пае. Шъолъырым ипащэ къызэриIуагъэмкIэ, лъэпкъэу къызхэкIыгъэхэмрэ динэу алэ­жьырэмрэ ямылъытыгъэу, обществэм зэгурыIоныгъэрэ зыкIыныгъэрэ хэлъынхэм зэкIэми тыфэлэжьэн фае.

КъумпIыл Мурат мэфэкIым пае республикэм щыпсэухэрэм къызафэгушIо нэужым Адыгеим ыкIи зэрэ Хэгъэгоу яфедэ зы­хэлъ IофшIэным къыкIырамы­гъэчэу, гуетыныгъэ ахэлъэу Iоф зышIэрэ пстэуми зэрафэразэр къыIуагъ.
АР-м и Къэралыгъо Совет — Хасэм и Тхьаматэу Владимир Нарожнэр Iофтхьабзэм хэла­жьэхэрэм мэфэкIым пае къыза­фэгушIом къыхигъэщыгъ хэгъэгум ис цIыфхэм языкIыныгъэрэ ящыIэкIэшIурэ афытегъэпсы­хьэгъэ Iофтхьэбзэ пстэуми мэхьанэшхо зэряIэр.
Ащ нэужым искусствэхэмкIэ IэпэIасэхэмрэ творческэ коллективхэмрэ зыхэлэжьэгъэхэ концерт щыIагъ. МэфэкI Iоф­тхьабзэхэр республикэм имуниципальнэ образование пстэуми а мафэм ащыкIуагъэх.