Адыгеим, Къэбэртэе-Бэлъ­къар, Къэрэщэе-Черкес республикэхэм яадыгэ гъэзетхэм язэдэлэжьэныгъэ къыдыхэлъытагъэу «Адыгэ макъэм» ыкIи «Черкес хэкум»(КъЧР) яжурналистхэу Анцокъо Иринэрэ Аслъаныкъо Мадинэрэ мы мафэхэм Къэ­бэртэе-Бэлъкъар респуб­ликэм IофшIэгъу дэкIыгъо щыряI.

Тхьамафэм къыкIоцI ахэр къош республикэм къыщылэжьэщтых, къэбар гьэшIэгъонхэр къагъэхьазырыщтых.
IофшIэгъу мафэхэр журналистхэм гъэзетэу «Адыгэ псалъэм» иредакцие щаублагъ.
ЫпэрапшIэу «Адыгэ псалъэр» зыхэхьэрэ «КъБР-медиа» зыфи­Iорэм ипащэу Бежан Беслъан ахэр IукIагъэх. Къош республикэ­хэм ялъэпкъ гъэзетхэм язэпхыныгъэ гъунапкъэхэр дэгъэзыгъэ­нымкIэ, зэрэшIэнымкIэ мэхьэнэ ин зэриIэр ащ къыхигъэщыгъ.
«Зэдэлэжьэныгъэм илъэс 35-рэ ыныбжь. Сэ зэрэслъытэрэмкIэ, ар игъу, тэрэз ыкIи къош республикэхэм яIофшIэкIэ дахэ ищыс. IофшIэныр тапэкIи лъыгъэ­кIотагъэ хъунымкIэ ищыкIагъэмкIэ сыдигъуи IэпыIэгъу сыхъунэу сыхьазыр, — къыIуагъ Бежан Беслъан.
Джащ фэдэу журналист хьа­кIэхэр «Адыгэ псалъэм» щыла­жьэхэрэ яIофшIэгъухэм нэIуасэ афашIыгъэх. ЯлэжьакIэ зыфэдэм, ягъэзетхэм IофшIэныр зэрэщызэтегъэуцуагъэм, ягумэкIыгъохэм къакIэупчIагъэх, зы Iофыгъоу яIэ­хэм, бзэм, гъэзетеджэхэр зэрэмакIэхэм атегущыIагъэх, хэ­кIыпIэхэм яусагъэх.
Мы тхьамафэм къыкIоцI Анцокъо Иринэрэ Аслъаныкъо Ма­динэрэ зэIукIэгъухэр, гущыIэгъу­хэр къяжэх, Къэбэртэе-Бэлъкъар Республикэм ицIыф гъэшIэгъонхэм нэIуасэ афэхъущтых. IофшIэгъу дэкIыгъо ужым къэбархэр шъхьадж игъэзетхэм къащыхаутыщтых. Къош шъолъырхэр нахь зэрэшIэнхэм, лъэпкъ журна­листикэм зегъэужьыжьыгъэным мыщ фэдэ зэдэлэжьэныгъэр фэ­IорышIэ.