ШэкIогъум и 1-м Мые­къопэ районым ипсэу­пIэу Северо-Восточные Сады адыгэ культурэм и Мафэ фэгъэхьыгъэ мэфэкI Iофтхьабзэ щызэхащагъ. АР-м лъэпкъ Iоф­хэмкIэ, IэкIыб къэралхэм ащыпсэурэ ти­лъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет ащ кIэщакIо фэхъугъ.

Творческэ куп зэфэшъхьаф­хэр зыхэлэжьэгъэхэ мэфэкI Iоф­тхьабзэр къутырым дэт культурэм и Унэ щыкIуагъ. Хьа­кIэхэми мыщ щыпсэухэрэми адыгэ шэн-хабзэхэр арагъэлъэ­гъугъэх. Зэхахьэм ипро­граммэ хэтыгъэх адыгэ лъэпкъ IэпэщысэхэмкIэ IофшIагъэхэм якъэ­гъэлъэгъон. Дышъэ ыкIи тыжьын IуданэхэмкIэ пкъыгъо зэфэшъхьафхэр гъэкIэрэкIэ­гъэнхэмкIэ ижъыкIэ къыщегъэ­жьагъэу лъэп­къым хэлъ хъугъэ IэпэIэсэныгъэм нэIуасэ фашIыгъэх. «Движение Первых» зыфиIорэм хэтхэм нысхъапэхэм яшIын кIэлэцIыкIухэм арагъэ­лъэгъугъ, лъэпкъ шхыныгъохэм яуплъэ­кIун, мэфэкI концерт ыкIи егъэ­джэн сыхьатхэр зэхащагъэх.
Ащ нэмыкIэу зышIоигъо пстэури адыгэ къуаем хэшIыкIыгъэ шхыныгъо зэфэшъхьафхэм яIэшIугъэ ауплъэкIун алъэкIыгъ. Пэлъкъау, хьалыжъу, гуубат, къурамбый, къэб гъэ­жъагъ зыфэпIощтхэр мыщ къырахьылIагъэх.
ЫпшъэкIэ зигугъу къэтшIыгъэ Комитетым иотдел ипащэу Нэ­хэе Саидэ къызэриIуагъэмкIэ, зэгурыIоныгъэрэ зэныбджэ­гъуныгъэрэ азыфагу илъэу псэурэ лъэпкъ зэфэшъхьафхэм Адыгеир зэдыряун.
— Республикэм щыпсэурэ лъэпкъ зэфэшъхьафхэм яшэн-­хабзэхэр къэухъумэгъэнхэмкIэ Iофышхо тэшIэ. Адыгэ ыкIи урыс культурэхэм якъэгъэлъэгъон республикэм ичIыпIэ зэфэшъхьафхэм жъугъэу ащызэхэтэщэ. Адыгэ шэн-хабзэм къыды­хэлъытэгъэ зекIокIэ-шIыкIэхэм ащыщ пычыгъохэр къэтэгъэ-­
лъа­гъо: БэмышIэу Кощхьаблэ «Ныо ежьэжь», къуаджэу Ас­къэлае «КIа­пщэ». Непэ Сэтэ­наерэ Казбекрэ афэгъэхьыгъэ тхыдэжъым техыгъэу къэгъэ­лъэгъоныр рекIокIыщт. КъыткIэхъухьэрэ лIэужхэм адыгэ лъэпкъым итарихъ ядгъэшIэщт, — къыIуагъ Нэхэе Саидэ.
МэфэкIым къекIолIагъэхэр творческэ купхэм къагъэхьа­зырыгъэ къэгъэлъэгъонхэм яплъыгъэх, зэнэкъокъухэм ахэ­лэжьагъэх.
— Адыгеим ис лъэпкъхэм азыфагу зэгурыIоныгъэрэ зыкIыныгъэрэ зэрилъыр текIоныгъэу ыкIи гъэхъагъэу тиIэхэм ащыщ. Адыгэ ыкIи урыс шэн-хабзэхэм ятарихъ ныбжьыкIэхэм зыщамыгъэгъупшэным, якультурэ къаухъумэным мыщ фэдэ Iофтхьабзэхэр фэIорышIэх, — къыIуагъ Лъэпкъ культурэм и Гупчэ ихудожественнэ пащэу Светлана Уклеевам.
Мыекъопэ районым и Ки­ров­скэ къоджэ псэупIэ ипащэу Давид Алиевым гущыIэ фабэ­хэмкIэ мэфэкI зэхахьэр къы­зэIуихыгъ.
— Лъытэныгъэ зыфэсшIырэ хьакIэхэр, тичIыпIэгъу лъапIэ­хэр! Непэ адыгэ культурэм и Мафэ хэтэгъэунэфыкIы, ащ ылъапсэ чыжьэу къыщежьэ, лъэныкъуабэ къызэлъеубыты ыкIи бай дэдэу щыт. Лъэпкъ шэн-хабзэхэр адыгэ культурэм ибаиныгъ. Непэрэ Адыгэ культурэм и Мафэ лъэпкъхэр зэ­фэзыщэрэ хъугъэ-шIэгъэ дахэу, хьалэмэтэу зэрэхъущтым сицыхьэ телъ, — къыIуагъ Давид Алиевым.
Лъэпкъ тарихъыр, шэн-ха­бзэ­хэр къизыIотыкIырэ къэгъэлъэгъоныр дахэу зэхащагъ. Къэлэбый Тэмарэ зипэщэ ныб­жьыкIэ къэшъокIо купэу “Насыпым” «Гум имэкъамэхэр», «Дэхэ къашъу» зыфиIохэрэр къышIыгъ.
Мамыр щыIакIэу ыкIи лъэпкъ зэфыщытыкIэу тиреспубликэ илъыр зэщымыкъонымкIэ мыщ фэдэ мэфэкI Iофтхьабзэхэр зы амалышIоу щыт. «ТкIуачIэр — тизэкъотныгъ, тизыкIыныгъ» зы­фиIорэ гущыIэхэм тиреспуб­ликэ щыпсэухэрэм зэфыщытыкIэ дахэу азыфагу илъыр къыраIотыкIы. Лъэпкъишъэм ехъу зыщыпсэурэ Адыгеим нахь къахэзыгъэщырэр мамыр щы­IакIэу илъыр, лъэпкъ зэфэшъхьафыбэу щыпсэухэрэм язэгурыIоныгъэрэ языкIыныгъэрэ.
Лъэпшъыкъо Фатим.