АР-м ихьыкумышIхэм япшъэрылъ шъхьаIэхэр зэрагъэцакIэ­хэрэм имызакъоу Iофтхьэбзэ зэфэшъхьафхэм ахэлажьэх. Ахэм ащыщ пщэрыхьанымкIэ зэнэкъокъоу мыхэм азыфагу щызэхащагъэр. Ащ кIэщакIо фэхъугъэр АР-м ихьыкумышIхэм я Совет.

ЯтIонэрэ илъэс хъугъэу зэхащэрэ зэнэкъокъум мызыгъэгум хэлэжьагъэх АР-м и Апшъэрэ ыкIи и Арбитражнэ, Мыекъопэ дзэ гарнизоным, зэхэт юрисдикцием яхьыкумышIхэр ары. ПщэрыхьанымкIэ хъулъфыгъэ 11-мэ заушэтыгъ, а охътэ дэдэм бзылъфыгъэ 17 пцэжъые ешагъэх.
— ПщэрыхьанымкIэ зэнэкъокъур зигукъэкIхэр Адыгеим и Апшъэрэ хьыкум итхьаматэу Шумэн Байзэтрэ хьыкумхэм я Совет ипащэу Екатерина Богатыревамрэ. Спорт Iофтхьэбзэ зэфэшъхьаф­хэр зэхэтэщэх: футболымкIэ, волейболымкIэ, щэрыонымкIэ, шахматхэмкIэ. Джащ фэдэу пцэжъыеешэнымкIэ чемпионатхэр ретэгъэкIокIых. Мыщ фэдэ Iофтхьабзэхэм тизыгъэпсэфыгъо мафэхэр къагъэбаи, ахэм нэмыкI кIуачIэ къыуаты, тигуапэу тахэлажьэ, — къыддэгощагъ АР-м ихьыкум Департамент и ГъэIорышIапIэ итхьаматэ игуадзэу Михаил Суралевыр.
Зэнэкъокъум хэлажьэхэрэмкIэ зэкIэ Iэрыфэгъоу зэхэщэгъагъ. ХьыкумышI пэпчъ чIыпIэ гъэнэфагъэ иIэу, пхъэ машIокIэ пщэрыхьагъэх. ГущыIэм пае, Теуцожь районым илIыкIо уха ыгъэ­жъуагъ. Арбитражнэ хьыкумыр къэзыгъэлъэгъуагъэм Кавказым анахьыбэу щаупщэрыхьэрэ грузин шхыныгъохэм ащыщэу — чахохбили, ау адыгэ къонкIэ ыкIи бжьыныфщыгъукIэ ешIушIагъэхэу, Мыекъопэ дзэ гарнизоным ихьыкум иIофышIэ мэлыл хэлъэу плов, Шэуджэн районым къикIыгъэм адыгэ джэнч хэлъэу лобио ыкIи пцэжъые гъэжъагъэ, хьыкум Департаментым и ГъэIорышIапIэ илIыкIо хинкали аупщэрыхьагъэх. Шхыныгъо зэфэшъхьафхэмкIэ Iанэр шыгъагъэ. Шумэн Байзэтрэ Екатерина Богатыревамрэ зипэщэ осэшI купым хэтхэм зэнэкъокъум хэлэжьагъэхэм ашIыгъэ шхыныгъохэм яIэшIугъэ ауплъэкIугъ. ПщэрыхьакIохэм ыкIи пцэжьыяшэхэм язэнэкъокъу зэфэхьысыжьхэр фашIы­гъэх.
Апэ пцэжъые къыхэзыдзыгъэ Красногвардейскэ районым ихьыкум иIофышIэу Виктория Перышкинар щытхъу тхылъкIэ къыхагъэщыгъ. Пцэжъые къы­хэзымыдзышъугъэхэри ахэтыгъэх. Анахь пцэжъые ин къэзыубытыгъэхэр зэцIэгъу­хэу хьыкум Департаментым и ГъэIорышIапIэ илIыкIоу ХьапэкIэ Джэнэтрэ Мыекъопэ дзэ гарнизоным ихьыкум иIофышIэу Шэуджэн Джэнэтрэ, мыхэм апэрэ чIыпIэр зэдагощыгъ.
Лъэныкъо 13-кIэ шхыныгъохэм яIэшIугъэ аушэтыгъ. ГущыIэм пае, шхыныгъо анахь псынкIэр хьыкум Департаментым и ГъэIорышIапIэ къышIыгъ. Мангалым анахь дэгъоу щыпщэрыхьагъэр АР-м и Апшъэрэ хьыкум, пцэжъы­ем хэшIыкIыгъэ гъомылапхъэмкIэ къахэ­щыгъэр Тэхъутэмыкъое районым ихьыкум, анахь ямышIыкIэ шхыныгъор Арбитражнэ хьыкумым къышIыгъ, зишхыныгъо анахь лъэгъупхъоу къэзыгъэлъэгъуагъэр Мые­къопэ дзэ гарнизоныр арэу зэфахьысыжьыгъ. Мыхэм зэкIэм щытхъу тхылъхэр аратыгъэх.
Тэу Замир.
Сурэтыр авторым ий.