АР-м и ЛIышъхьэу КъумпIыл Мурат тыгъуасэ Тэхъутэмыкъое районым зыщэIэм псэупIэу Яблоновскэм щагъэпсырэ еджапIэу нэбгырэ 1100-м телъытагъэм ишIын зэрэкIорэр ыуплъэкIугъ.

ЛIышъхьэм игъусагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, гъэсэныгъэмрэ шIэныгъэмрэкIэ министрэу Евгений Лебедевыр, Тэхъутэмыкъое районым ипащэу Шъэо Аскэр, «Стройзаказчикым» ипащэу Хьаджымэ Аслъан, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвардым» игенеральнэ пащэу Хъодэ Ислъам, Iахьзэхэлъ обществэу «Россети Кубань» икъутамэу Краснодар электрическэ сетьхэм япащэу Андрей Герасько, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм игенеральнэ пащэу ЕкъутэкI Аслъан.
Адыгеим и ЛIышъхьэ къызэрэхигъэщыгъэмкIэ, УФ-м и Президент къыгъэу­цугъэ пшъэрылъхэу гъэсэныгъэмкIэ инфраструктурэм хэхъоныгъэ егъэшIыгъэным епхыгъэхэр гъэцэкIэгъэнхэм пае республикэм IофшIэн гъэнэфагъэ щызэшIуахы, къэралыгъо программэхэр, лъэпкъ проектхэр, партиеу «Единэ Россием» къыпкъырыкIырэ программэхэм къатырэ амалхэр зэкIэ икъоу гъэфедагъэ хъунхэм дэлажьэх. ЕджэпIакIэу Яблоновскэм щашIырэр лъэпкъ проектэу «Гъэсэныгъэм» дештэ. Псэуалъэм сомэ миллиард 1,44-м ехъу тефэ, ащ нэмыкIэу миллион 217-р ящыкIэгъэ Iэмэ-псымэхэм апае къафыхагъэкIыгъ.
КъумпIыл Мурат мы илъэсым ыкIэм ехъулIэу аухын фэе Iофхэр зэрэкIохэрэм уасэ фишIыгъ. Щэу зэтет унитIу агъэ­псыгъах, ахэр зэпырыкIыпIэм зэрепхых. ЕджэпIэ унэхэм кабинетхэр, мастерскойхэр, спортым зыщыпылъыщтхэ ыкIи актовэ залхэр, кружок зэфэшъхьафхэм яIофшIэн фытегъэпсыхьэгъэ унэхэр, тхылъ­еджапIэр, шхапIэр, медицинэ кабинетыр ыкIи нэмыкIхэр ахэтыщтых. Непэ псэолъэшIхэр зыуж итхэр унэ­кIоцI IофшIэнхэр ары, ящыкIэгъэ инженер псэуалъэхэр, шъхьаныгъупчъэхэр, еджапIэм къыпэIулъ чIыпIэхэр зэтегъэпсыхьэгъэнхэр ары зыдэлажьэхэрэр.
КъумпIыл Мурат псэуалъэр къызеплъы­хьэхэ нэужым пIалъэхэр укъуагъэ мыхъунхэм ыкIи Адыгеим джырэ уахътэм диштэрэ еджапIэхэр щышIыгъэнхэмкIэ IофшIэкIэшIоу аIэкIэлъ хъугъэр къы­зэрэзыфагъэфедэщтым телъытэгъэ пшъэрылъхэр афишIыгъэх.
Проектыр икIэухым зыщынэсырэм Iофтхьабзэхэр зэкIэ зэшIохыгъэнхэм АР-м и ЛIышъхьэ анаIэ тыраригъэдзагъ. Ахэр зэпхыгъэхэр джырэ уахътэм диштэрэ Iэмэ-псымэхэмкIэ зэтегъэ­псыхьэгъэнхэр, еджапIэм къыпэIулъ чIыпIэхэм къэгъагъэхэр ыкIи чъыгхэр ащыгъэтIысхьэгъэнхэр, урамхэр тэрэзэу къэгъэнэфыгъэнхэр, транспортыр къякIолIэн амал щыIэным тегъэпсыхьэгъэ Iофхэр зэшIохыгъэнхэр ары.

Электричествэм, гъэстыныпхъэ шхъуантIэм псэуалъэр апышIэгъэным, котельнэр еджапIэм хэгъэуцогъэным шъхьафэу атегущыIагъэх. АР-м иминистрэхэм я Кабинет и Тхьаматэ игуадзэу Хъоткъо Хъызыр пшъэрылъ фашIыгъ агъэнэфэгъэ Iофыгъохэр гъэцэкIагъэ зэрэхъухэрэр икъоу ыуплъэкIунэу, пIалъэхэр укъуагъэ мыхъунхэм ынаIэ тыригъэтынэу.
«Тэхъутэмыкъое районым псынкIэу хэхъоныгъэ ешIы. ПсэолъакIэхэр, цIыфхэр зычIэсыщтхэ унакIэхэр бэу къетаджэх, нэбгырэ пчъагъэу районым исми къы­хэхъо, социальнэ инфраструктурэу дгъэ­псырэри ахэм ящыIакIэ нахьышIу шIыгъэным тегъэпсыхьагъ. Гъогухэм яшIынрэ ягъэцэкIэжьынрэ, инженер коммуникациехэр икъоу гъэпсыгъэнхэм ыпэрапшIэу шъуягупшысэзэ шъушIы. ЕджапIэр игъом тыгъэн ыкIи кIэлэцIыкIухэр чIэхьажьынхэм фытегъэпсыхьэгъэн фае. Ар социальнэ псэолъэ пстэуми афэгъэхьыгъ. ЧIыпIэхэм зэдиштэу хэхъоныгъэ ягъэшIыгъэныр къыдэтлъытэзэ Iоф тшIэн фае», — къыхигъэщыгъ КъумпIыл Мурат.
Шъугу къэтэгъэкIыжьы: мы аужырэ илъэситIум инфраструктурэм хэхъоныгъэ егъэшIыгъэным сомэ миллиарди 9-м ехъу пэIуагъэхьагъ. Адыгэ Республикэм ис кIэлэцIыкIухэу джыри еджапIэм чIэмыхьагъэхэм ящыкIагъэм фэдиз чIыпIэ IыгъыпIэхэм къащараты. ЕджэпIи 7 кIэу ашIыгъ, Тэхъутэмыкъое районымкIэ кIэу 4 агъэпсыгъ, еджэпIэ чIыпIакIэу 3550-рэ щыIэ хъугъэ. Ащ амал къытыщт джырэ еджапIэхэм ачIэсхэр нахь макIэ шIыгъэн­хэмкIэ, джащ тетэу хэгъэгум и Президент къыгъэуцугъэ пшъэрылъэу кIэлэеджа­кIохэр зэкIэ зы сменэм еджапIэм екIолIэнхэм иамал яIэным епхыгъэр зэшIохыгъэ хъущт. Ащ нэмыкIэу еджапIэхэм яигъэкIотыгъэ гъэцэкIэжьын те­лъытэгъэ федеральнэ программэр ящэнэрэ илъэс хъугъэ загъэцакIэрэр. 2024-рэ илъэсым республикэм еджэпIи 5 щагъэцэкIэжьыгъ. ИгъэкIотыгъэ гъэцэкIэжьынхэм япрограммэ къызэрэдилытэрэм тетэу еджэпIэ 20 зэтырагъэ­псыхьажьыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.