Адыгеим игъогу инфраструктурэ изегъэушъомбгъун пащэхэм лъэшэу анаIэ тет. «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектыр пIалъэхэм апэ итхэу зэрэпхыращырэм ар къеушыхьаты.

А проектым къыдыхэлъытагъэу агъэ­цэкIэжьыгъ ыкIи IофшIэнхэр щаухыгъэх шъолъыр гъогухэм ахэхьэрэ лъэмыджхэм анахь кIыхьэхэм ащыщэу Кощхьэблэ районыр зэпызычырэ псыхъоу Фэдз телъыр.
— Метрэ 219-рэ зикIыхьэгъэ лъэ­мыджыр шапхъэхэм адиш­тэу лъэмыджышIхэм ашIы­жьыгъ. Ар Мыекъуапэ икIэу станицэу Джаджэр, поселкэу Псыбай, станицэу Зеленчукскэр зэпичхэзэ къалэу Карачаевскэ кIорэ гъогум хэхьэ. IофшIэнхэм пстэумкIи сомэ миллион 318-рэ апэIухьагъ, — къыIуагъ «Ады­гея­автодорым» псэолъэшIынымкIэ иотдел ипащэу Павел Бахтиным.
Лъэмыджым асфальт-мыжъо зэхэ­лъэу телъыр, зэпыдзапIэхэр, гъучI пкъэушхоу кIэтхэр, лъэмыджыбжъэхэр зэблахъу­гъэх, нэмыкIыбэ рашIылIагъ. Гъогоу мыр зыхахьэрэр Адыгэ Республикэм ыкIи гъунэгъу шъолъыритIум, Краснодар краимрэ Къэрэщэе-Черкесс Республикэмрэ, ащыпсэухэрэм зэдагъэфедэ. Арышъ, лъэпкъ проектым ишIуагъэкIэ гъогухэр щынэгъончъэ зэрэхъухэрэм имызакъоу, зэгъунэгъу шъолъырхэм социальнэ ыкIи культурнэ зэпхыныгъэу азыфагу илъым зиушъомбгъуным фэIорышIэ.
2022 — 2023-рэ илъэсхэм лъэпкъ проектым къыдыхэлъытагъэу Адыгеим лъэмыджи 6 щагъэкIэжьыгъ.

Сурэтыр: «Адыгеяавтодор»