Гъэсэныгъэ тедзэ зыщарагъэ­гъотырэ Гупчэу «Щынэгъон­чъагъэм илабораторие» Iэнэ ­хъурае щыкIуагъ.

КIэлэцIыкIухэр зыхэфэхэрэ гъогу-­транспорт хъугъэ-шIагъэ­хэр нахь макIэ шIыгъэнхэм фэшI ныбжьыкIэхэр егъэ­джэгъэнхэм ыкIи пIугъэнхэм афэIорышIэрэ джырэ екIолIакIэхэр къыхэхыгъэнхэм ар афэгъэхьыгъагъ.
Iофтхьабзэм хэлэжьагъэх АР-м и Къэралыгъо автоинспекцие зэхэщэн-­зэфэхьысыжь Iоф­шIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Му­рат, ны-тыхэм я Ассоциацие ишъолъыр отделение ипащэу Татьяна Гоголевар, кIэлэцIыкIу гъогу-транспорт фыкъоны­гъэхэр дэгъэзыжьыгъэнхэмкIэ Мые­къуа­пэ иеджапIэ ипащэу Елена Павловар, пIугъэнымкIэ ыкIи об­щественнэ объеди­нениехэм зэпхыныгъэ адэшIыгъэнымкIэ еджапIэхэм ядиректорхэм яуп­чIэжьэгъухэр.
Тишъолъыр игъогухэм къатехъухьэгъэ хъугъэ-шIагъэхэм япчъагъэ, ахэм кIэлэцIыкIухэм фыкъоныгъэу ахахыгъэхэм, ушъхьагъоу афэхъугъэхэм афэгъэхьы­гъэу къэгущыIагъ Бзэ­джэ­жъыкъо Мурат. Джащ фэдэу Iофыгъохэр анахьэу къызхэкIы­хэрэм мототранспортыр зэращы­щыр къэзэрэугъоигъэхэм анаIэ тыраригъэ­дзагъ. Ащ къызэрэ­хигъэщыгъэмкIэ, а транспорт лъэпкъым щынагъоу къызди­хьын ылъэкIыщтым икъоу ны-тыхэр емы­гупшысэхэу якIэлэцIыкIухэм къафащэфы ыкIи зефэнымкIэ фитыныгъэ ямы­Iэу агъэфедэх. Хэбзэнчъэ зекIуакIэ­хэм пшъэ­дэкIыжьэу апылъхэм пропаган­дэмкIэ отделым ипащэ ягугъу къышIыгъ.
Бзэджэжъыкъо Мурат ипса­лъэ къыщыхигъэщыгъэхэм ащыщ шапхъэхэм атетэу гъогум щызе­кIонхэм сабыйхэр яцIыкIугъом къыщегъэжьагъэу фэпIу­гъэн­хэр ны-тыхэм зэряпшъэрылъыр. Нэ­ужым ащ къыщежьэ щынэгъончъа­гъэр.
Инспекторыр къызтегущыIагъэхэм ащыщ ныбжьыкIэ отрядхэм (ЮИД) хэхъо­ныгъэ ашIыным­кIэ екIолIакIэу щыIэхэр ыкIи ащкIэ методическэ материалхэу федеральнэ гупчэм (Урысыем и ЮИД исайт, Урысые гъэзетэу «Добрая Дорога Детства) щагъэфедэхэрэр къаригъэлъэгъугъ.
ГущыIэр лъигъэкIотагъ Елена Павловам. КIэлэцIыкIу фыкъоныгъэхэр дэ­гъэзыжьыгъэнхэмкIэ ныбжьыкIэ, ны-ты патрульхэм ыкIи гуфакIохэм отрядхэу гъэсэ­ныгъэм иучреждениехэм ащызэхэщагъэхэм мэхьанэу яIэм ар къатегущы­Iагъ. Джащ фэдэу гъогурыкIоныр щы­нэгъончъэнымкIэ акциехэр ыкIи цIыфыбэ зыхэлэжьэрэ Iофтхьабзэхэр зэхэщэ­гъэн­хэмкIэ IэпэIэсэныгъэу IэкIэлъымкIэ къэ­­зэрэугъоигъэхэм къадэгощагъ.
ПэшIорыгъэшъ Iофтхьабзэу зэхащэхэ­рэм ны-тыхэр къахэгъэлэжьэгъэнхэм, пчэдыжьырэ еджапIэхэм ахэм къулыкъур ащахьызэ, къэнэфырэ ныбалъэхэр ащыгъхэмэ, пчъэIум къызэрэIуащагъэхэр ауплъэкIунхэм ны-тыхэм я Ассоциацие ипащэу Татьяна Гоголевам къыдыригъэ­штагъ. Сыда пIомэ пIуныгъэр апэрапшIэу унагъом къыщежьэ.
Iэнэ хъураем зэфэхьысыжьхэр ща­шIыгъэх, яIофшIэнкIэ лъэныкъо гъэнэфа­гъэхэр къыхахыгъэх, ахэр зэкIэ зы­ныбжь имыкъугъэхэр зыхэфэрэ гъогу хъугъэ­-шIагъэхэр нахь макIэ шIыгъэнхэм фэIорышIэщтых.