Iофтхьабзэу «Гражданский мониторинг» зыфиIорэм къызэрэдыхэлъытагъэу, джащ фэдэу хэгъэгу кIоцI IофхэмкIэ шъо­лъыр Министерствэм иподразделениехэм Iоф зэрашIэрэр ­ауплъэкIунэу Общественнэ советым хэтхэу Елена Абакумовар, Жэдэ Зуриет, Къыкъ Бэллэ тхын-экзаменационнэ отделэу N1-м щыIагъэх.

Общественникхэм къапэгъокIыгъ Мые­къуапэ и МРЭО-у N 1-м ипащэу, полицием иподполковникэу Шэуджэн Рус­лъан. Къэралыгъо фэIо-фашIэхэу подразделением цIыфхэм афигъэцакIэхэрэм игъэ­кIотыгъэу ар къатегущыIагъ. Къэралыгъо ыкIи муниципальнэ фэIо-фашIэхэм я ЗыкI портал непэ бэмэ зэрагъэфедэрэр ащ къыхигъэщыгъ. А амалымкIэ транспортыр ябгъэтхын, номерхэр къы­дэпхынхэ, водительскэ удостоверениер зэблэпхъун плъэкIыщт, нэмыкI IофыгъохэмкIэ бгъэфедэшъущт.
Шэуджэн Руслъан къызэриIуагъэмкIэ, 2024-рэ илъэсым имэзибгъу МРЭО-у N1-м иIофышIэхэм транспортым итхын епхыгъэ фэIо-фэшIэ мин 19-м ехъу агъэцэкIагъ. ГъогурыкIоным ишапхъэхэр зэрашIэрэмкIэ ушэтыныр нэбгырэ мини 10-м ехъурэм атыгъ. Водительскэ удостоверение 5670-м нахьыбэм араты­жьыгъ.
Общественнэ советым илIыкIохэм отделым иIофшIэн осэшIу фашIыгъ: зи­псауныгъэ амалхэр зэщыкъогъэ цIыфхэм арагъэгъотырэ фэIо-фашIэхэр Iэрыфэгъоу гъэпсыгъэх, ищыкIэгъэ къэбарыкIэ­хэр къизыIотыкIырэ стендхэр дэпкъхэм апылъагъэх, узыщежэрэ унэр ины, чэзыур электроннэ шIыкIэм тетэу гъэпсыгъэ ыкIи документхэр зыщатырэ, къызщаIахыжьырэ шъхьаныгъупчъэхэр икъоу зэIухыгъэх.
МРЭО-м икъулыкъушIэхэм яIофышIэ чIыпIэхэри общественникхэм зэрагъэ­лъэгъугъэх. Кабинетхэр зэкIэ къаплъы­хьагъэх: водительскэ удостоверениехэр, транспорт амалхэм апылъ тхылъхэр зыщагъэхьазырхэрэр, транспортыр зыщау­плъэкIурэ хэушъхьафыкIыгъэ станциер.
УплъэкIунхэм якIэух зэфэхьысыжьхэмкIэ, подразделением иIофшIэн общественникхэм осэшIу фашIыгъ, къэуцупIэ чIыпIэхэр зэряIэхэр ыкIи орг­техникэмкIэ икъоу зэрэзэтегъэпсыхьагъэхэр къыхагъэщыгъ.