АР-м и Къэралыгъо автоинспекцие игукъэкIыкIэ республикэм имуниципальнэ образованиехэм пэшIорыгъэшъ Iоф­тхьабзэу «ЛъэсрыкIо зэпырыкIыпI» зыцIэр ащыкIуагъ.

«Движение первых» зыфиIорэм, ныбжьыкIэ отрядхэм ялIыкIохэр, общественникхэр гъогу полицейскэхэм ягъусэхэу щынэгъончъэ зекIоным къыфэджагъэх.
Илъэсыр къызихьагъэм къыщегъэжьагъэу лъэсрыкIохэр зыхэфэгъэ хъугъэ­-шIэгъэ 70-м ехъу республикэм игъо­гухэм ащагъэунэфыгъ. Статистикэм къызэригъэлъагъорэмкIэ, лъэсрыкIохэм анахьыбэрэ ашIырэ хэукъоныгъэр амыгъэунэфыгъэ чIыпIэм зэрэщызэпырыкIыхэрэр ары, нахьыбэрэмкIэ водителым блигъэкIынхэ ашIошIызэ техьэх.
ЦIыфхэм анаIэ зытырарагъэдзагъэхэм ащыщ яIалъмэкъхэм, яджанэхэм къэнэфырэ пкъыгъохэр ахалъхьанхэр. Ахэр джыры фэдэ бжыхьэ лъэхъанэу пасэу мэзахэ зыщыхъурэм ищыкIагъэх.
Iофтхьабзэм изэхэщакIохэр шъхьафэу адэгущыIагъэх автомобилыр зезы­фэхэрэм. ЛъэсрыкIо зэпырыкIыпIэхэм къэсыхэ зыхъукIэ зэрэчъэхэрэм нахь къыщагъэкIэнэу, гъэсэныгъэм иучреждениехэм яIэгъо-благъо къызихьэхэкIэ сакъыныгъэ нахь къызхагъэфэнэу ара­Iуагъ.
НэкIубгъор зыгъэхьазырыгъэр
Iэшъынэ Сусан.
Сурэтхэр: Къэралыгъо автоинспек­циер.