Мыщ фэдэ цIэ зиIэ Iофтхьабзэу Индием щыкIуагъэм Адыгеим илIыкIохэр хэлэжьагъэх. Тэхъутэмыкъое районым лъэпкъ Iэмэ-псымэхэмкIэ иансамблэу «Уджым» адыгэ лъэпкъ культурэр ащ къыщигъэлъэгъуагъ. Адыгэ быракъ уцышъом чIэтхэу лъэпкъ мэкъамэхэр Индием щагъэIугъэх. Нью-Дели, Мумбаи, Тривандрум Iофтхьабзэр ащыкIуагъ.

Лъэпкъ культурэмкIэ Дунэе фестивалэу «RUS_СВЕТ» зыфиIоу Красногорскэ гъэмафэм щыкIуагъэм икIэуххэм атетэу ансамблэу «Уджыр» Индием кIуагъэ.
IэкIыб къэралыгъохэм арысхэм Урысыем фыщытыкIэу къыфыряIэр нахь гъэпытэгъэным, гъэсэныгъэм, шIэныгъэм, технологиякIэхэм, экономикэм алъэныкъо­кIэ Урысыемрэ Индиемрэ язэпхыныгъэ нахь зегъэушъомбгъугъэным Iофтхьабзэр фэIорышIэщт.
Проектым изэхэщакIохэр АНО-у «Центр креативных индустрий «Новый город» зыфиIорэмрэ Урысыем, IэкIыб къэралыгъом ащыпсэурэ тилъэпкъэгъу­хэм яIофхэмкIэ ыкIи дунэе гуманитар зэдэлэ­жьэныгъэмкIэ Федеральнэ агентствэмрэ.
Красногорскэ щыкIогъэ фестивалым Урысыем ишъолъыр 23-мэ къэралыгъо 13-мэ къарыкIыгъэ творческэ купхэм «Уджыр» апэ ишъыгъ ыкIи Дунэе мэхьанэ зиIэ Iофтхьабзэм Адыгеир зэрифэшъуа­шэу къыщигъэлъэгъуагъ.
— ТилъэпкъкIэ адыгэ къашъохэм ыкIи орэдхэм мэхьанэшхо яI, ар тикультурэ игушъхьэлэжь баиныгъэ изы IахьышIу, адыгэм ыгу къигущыIыкIырэ шэн-хабз. ЦIыф лъэпкъ зэфэшъхьафхэм ялIыкIохэр фестивалым къекIолIагъэх, дахэуи къытпэгъокIыгъэх. Индием ис цIыфхэр адыгэ культурэм нэIуасэ фэтшIынхэр типшъэ­рылъ шъхьэIагъ, — къыIуагъ Тэхъутэмыкъое районым культурэмкIэ игъэ­IорышIапIэ ипащэу Хьатит Нурдин.
Купым кIыгъоу Индием ипчэгу зэфэшъхьафхэм закъыщигъэлъэгъуагъ АР-м иартистэу Сергей Шперовым. Къэгъэлъэ­гъонхэм анэмыкIэу фестивалым щызэIукIэгъэ артистхэр нэIуасэ зэфэхъу­гъэх, творческэ сэнаущыгъэмкIэ зэдэгощагъэх, егъэджэнхэр арагъэкIугъэх. Лъэпкъ зэ­къошныгъэм, зыкIыныгъэм атегъэпсыхьэгъэ Iофтхьэбзэ зэфэшъхьафхэм ахэлэжьагъэх.
Дунаим тет лъэпкъ зэфэшъхьафхэм тиискусствэр нахьышIоу ашIэ зэрэхъурэм, адыгэхэм язэлъыIэсыкIэ амалхэр зэрэпытэхэрэм ансамблэм иIахьышIу хэлъ.
Лъэпшъыкъо
Фатим.
Сурэтыр: купым ихъарзынэщ.