Бжыхьэм иаужырэ мазэу шэкIогъур къихьагъ. Мы мазэм Атлантикэм къикIырэ жьыбгъэм илъэшыгъэ хэхъощт. Ащ къыхэкIэу температурэр къеIыхыщт, ощх ыкIи ос цIынэ къыхьыщт, чэщым ыкIи пчэдыжьыпэм чIыпIэ-чIыпIэу ащыпщэгъощт. ГурытымкIэ температурэр градус 0-м кIэхьащт.

ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, шэкIогъум псыхъохэм адэт псым зыкъыIэтыным ищынагъо щыI. ГурытымкIэ температурэр шапхъэхэм афэдизыщт, ощхэу къещхыщтыр шапхъэ­хэм анахь мэкIэщт.
Апэрэ мэфипшIыр: чэщым фабэр градуси 2 — 7, мафэм градуси 6 — 11 щыIэщт, къыхэкIыщтых фабэр градус 15 — 20-м зыщынэсыщтхэр.
ЯтIонэрэ мэфипшIыр: чэщым фабэр градус 0 — 5, градуси 5 — 10-м нэсэу фабэр къеIыхэу къыхэкIыщт. Мафэм фабэу градус 11 – 16 щыIэщт.
Ящэнэрэ мэфипшIым нахь къэучъы­Iыщт, чэщым фабэу градуси 2 — 7 щыIэщт, мафэм градуси 7— 12-м акIэ­хьащт, градус 0-м нэсэу фабэр къызщеIыхыщт мафэхэри къыхэкIыщтых.
Къушъхьэхэм ощх ыкIи ос цIынэр къащехыщт, фабэу градуси 6 — 8 ащы­Iэщт.
ШэкIогъум псыхъохэм адэт псыр шапхъэу щыIэхэм ашIокIыщтэп. Ау мазэм къыкIоцI ощхыр лъэшэу къызещхырэм е ос къызесыкIэ псыхъохэм адэт псыр къыдэкIоен ылъэкIыщт. Ом изытет бжыхьасэхэм гумэкIыгъо къафихьыщтэп.

КIАРЭ Фатим.