Олимпийскэ джэгунхэм ахэт спорт лъэпкъэу тхэквондомкIэ зэнэкъокъухэр Ростов-на-Дону щыкIуагъэх. Къалэм изэIухыгъэ чемпионатрэ ипервенствэрэ Урысыем ишъолъыр 27-мэ ялIыкIохэр ыкIи IэкIыб къэралыгъохэу Афганистан, Армением, Белоруссием, Германием, Узбекистан, Азербайджан яспортсменхэр хэлэжьагъэх, зэкIэмкIи нэбгырэ 538-рэ.

Адыгеир Iофтхьабзэм къыщызыгъэлъэгъуагъэхэр олимпийскэ резервымкIэ республикэ спорт еджапIэу N 2-м испортсменхэр ары. Тренерхэу Олег Тыщенкэмрэ Александр Охрименкэмрэ агъасэхэрэм хагъэунэфыкIырэ чIыпIих къыдахыгъ. ТекIоныгъэр къафагъэшъошагъ Хьашхъо Адам, Ристэ Аминэ ыкIи Даур Сабинэ. Тыжьын медальхэр къахьыгъэх Бырдж Хадиджэрэ Владимир Власовымрэ.
Командэхэм язэнэкъокъу Адыгеим я 7-рэ чIыпIэр къыщыдихыгъ. Ростов хэкум илIыкIохэр атекIуагъэх.