Урысыем ит спорт еджапIэхэмрэ олимпийскэ резервым иучилищхэмрэ тренер ыкIи кIэлэегъэджэ мин 86-м ехъумэ Iоф ащашIэ, нэбгырэ мин пчъагъэ унэе спорт организациехэм аIутых, зыныбжь имыкъугъэхэр ыкIи спортсмен чъэпхъыгъэхэр агъасэх.

Федеральнэ проектэу «Спортыр – щыIэныгъэм ишапхъ» зыфиIорэм къыдыхэлъытагъэу УФ-м спортымкIэ и Министерствэ еп­хыгъэ апшъэрэ еджапIэхэм яс­пециалистхэм яшIэныгъэхэм ахагъахъо.
Джырэ уахътэм ыпшъэкIэ зигугъу къэтшIыгъэ министерствэм ипшъэрылъ шъхьаIэхэм ащыщых тренер сэнэхьатым имэхьанэ къэIэтыгъэныр, спортым пыща­гъэхэм япчъагъэ хэгъэхъогъэныр, мы лъэныкъомкIэ тикIэн бай къэухъумэгъэныр. Спортым идунэе тарихъ хэхьэгъэ тренер шIа­гъохэр тиIэх, ахэм ащыщхэу Валерий Лобановскэр, Виктор Масловыр ыкIи Гавриил Качалиныр дунаим итренер анахь дэ­гъуи 100-м ясатырэ хэхьагъэх. Аркадий Чернышевым илъэс 28-рэ хоккей командэу «Динамэм» пэщэныгъэ дызэрихьагъ. НэмыкI тренер цIэрыIоу Анатолий Тарасовыр игъусэу мы спорт лъэпкъымкIэ дунаим итренер анахь дэгъухэм ащыщ хъугъэх. Татьяна Тарасовам фигурнэ катаниемкIэ чемпион анахьыбэ ыгъэхьазырыгъ, ащ ыгъэсагъэхэм дунэе зэнэкъо­къухэм дышъэ медаль 41-рэ къащахьыгъ.
2023-рэ илъэсым щегъэжьа­гъэу «къэралыгъо тренер» зыфиIорэ IэнатIэр Урысыем щызэтыра­гъэуцожьыгъ. А пшъэрылъыр непэ зыгъэцакIэрэр олимпийскэ джэгунхэм щэгъогогъо ячемпионэу Бувайсар Сайтиевыр ары.