Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэр загъэпсыгъэр илъэс 95-рэ зэрэхъугъэр мэфэкI шIыкIэм тетэу АР-м и Къэралыгъо филармоние щыхигъэунэфыкIыгъ. Институтым иIофышIэхэр, шIэныгъэлэжьхэр, къулыкъу зэфэшъхьафхэм ялIыкIохэр мэфэкIым хэлэжьагъэх.

АР-м и Къэралыгъо Совет — Хасэм и Тхьаматэу Владимир Нарожнэр хэбзэихъухьэхэм ацIэкIэ къафэгушIуагъ институтым щылэжьагъэхэм ыкIи непэ Iоф щызышIэхэрэм. Илъэс пчъагъэхэм лъэпкъымкIэ мэхьанэ ин зиIэ Iофэу ашIэрэр зэрэосэнчъэр ащ ипсалъэ къы­щыхигъэщыгъ.
«Институтым икъежьапIэ Iутыгъэхэмрэ мы мафэхэм а Iофыр ифэшъуашэу лъызыгъэкIуа­тэхэрэмрэ тарэгушхо. Непэ ар джырэ мафэм диштэрэ шIэныгъэ-ушэтэкIо гупч, Урысыем ишIэныгъэ дунай чIыпIэ гъэнэфагъэ щеубыты. Гуманитар ушэтынхэмкIэ институтым ишIэныгъэ IофшIэгъабэхэр Адыгеим, Урысыем ямызакъоу, IэкIыб къэралыгъохэми ащызэлъашIэх, — къыщиIуагъ мэфэкI зэхахьэм Владимир Нарожнэм.
Илъэс пчъагъэхэм шIэныгъэм хьалэлэу фэлэжьагъэхэм къафагъэшъошэгъэ щытхъу ыкIи рэзэныгъэ тхылъхэр зэхахьэм щаратыжьыгъэх. МэфэкI Iоф­тхьабзэр ансамблэхэу «Налмэсымрэ» «Ислъамыемрэ» язэхэт концерт лъагъэ­кIотагъ.
Анцокъо Ирин.
Сурэтыр: АР-м иконцерт зэхахьэ ихъарзынэщ.