Блащэпсынэ ицIыф гъэшIуагъэу, икъоджэ гупсэ лъэужышIу къыщы­зы­гъэнагъэу, Iахьзэхэлъ обществэу «Дондуковскэ элеваторым» игенеральнэ пащэу, УФ-м гъомылэпхъэшIынымкIэ изаслуженнэ Iофы-
шIэу, АР-м мэкъумэщ къыдэгъэкIыжьынымкIэ изаслуженнэ IофышIэу, медалэу «Адыгеим и Щытхъузехь» зыфиIорэм изехьакIоу Бэлокъо Мыхьамэт Адам ыкъор псаоу къызытхэмытыжьыр мыгъэ илъэсищ зэрэхъурэм фэгъэхьыгъэ шIэжь зэхахьэ ичылэ щыкIуагъ.

Ащ ыцIэ зыхьыщт къоджэ гупчэ зыгъэпсэфыпIэм мы­жъобгъу къыщыфызэIуахыгъ.
Мыщ ыпэкIэ къоджэдэсхэм зэхахьэ зашIым, Бэлокъо Мы­хьамэт мыжъобгъу къыфызэIуа­хынэу унашъо ашIыгъагъ, ащкIэ народнэ депутатхэм ячIыпIэ Совет къадыригъэштагъ.
М. Бэлокъом ишIэжь фэгъэ­хьыгъэ Iофтхьабзэм цIыф бэ-дэдэ къекIолIагъ. Ахэр Адыгеим игъэцэкIэкIо ыкIи ихэбзэгъэуцу къулыкъум илIыкIохэр, Дондуковскэ элеваторым иIофышIэхэр, Мыхьамэт иIахьыл гупсэхэр, къуаджэм инахьыжъхэр ыкIи къоджэдэсхэр.
Iофтхьабзэр зэрищагъ Блащэ­псынэ къоджэ псэупIэм ипащэу Шэуджэн Къэплъан. Бэлокъо Мыхьамэт къызщыхъугъэ къуа­джэм изэтегъэпсыхьан иIахьы­шхо зэрэхэлъыр, цIыф къызэрыкIоу, хьалэлэу, гъот макIэ зи­Iэхэм афэгумэкIыныр ишэнэу зэрэщытыгъэр къыIуагъ. Ащ фэдэ цIыфхэр зырыз, ишIэжь агъэлъапIэзэ ар зэращымы­гъупшэщтыр къыхигъэщыгъ.

Джащ фэдэу Iофтхьабзэм къыщыгущыIагъэх АР-м и Къэралыгъо Совет — Хасэм и Тхьаматэ игуадзэу Iэщэ Мухьа­мэд, Блащэпсынэ инахьыжъ гъэшIуагъэу, кIэлэегъэджэ Iоф­шIэным иветеранэу Хъымыщ Хьамид, къуаджэм иефэндэу Къун Ибрахьим, Iахьзэхэлъ обществэу «Дондуковскэ элеваторым» игенеральнэ пащэ игуадзэу Хъуажъ Мурат, Бэло­къо лIакъом инахьыжъэу Мухьад, КIарэ Лъэпшъ, нэ­мыкI­хэри.
«Бэлокъо Мыхьамэт тиреспубликэ ихэхъоныгъэ иIахьышхо хэзышIыхьагъэхэм ащыщ. Фэны­къохэм адеIэу, цIыфхэм ишIуагъэ аригъэкIэу, гукIэгъушхо хэ­лъэу илъэс пчъагъэрэ тикъэралыгъо фэлэжьагъ. Мыхьамэт ныбджэгъушIоу щытыгъ, идунай зехъожьым гукъэошхо тщы­хъугъ. Тхьэм джэнэт къыритынэу ты­фэлъаIо», — къыIуагъ Iэщэ Му­хьамэд.
КъэгущыIагъэ пэпчъ къызэриIуагъэмкIэ, цIыфхэу IэпыIэгъу щыкIэхэрэм адеIэным Бэлокъо Мыхьамэт сыдигъуи пылъыгъ, къызщыхъугъэ псэупIэм, районым, Адыгеим афэгумэкIэу, яхэхъоныгъэкIэ ишIуагъэ къыгъакIощтыгъ.

ЕджапIэхэм, кIэлэцIыкIу IыгъыпIэхэм IэпыIэгъу афэхъу­щтыгъ, икъоджэ гупсэ, Iоф зы­щишIэщтыгъэ станицэм, ирайон ит саугъэтхэм, зыгъэ­псэфыпIэ чIыпIэхэм, культурэм и Унэ, футбол ешIапIэм язэтегъэпсыхьан хэлэжьагъ. Джащ фэдэу ермэлыкъэу зэхащэхэрэм якIуалIэ зышIоигъохэм апае автобус тыригъэхьагъэу Дондуковскэм щыпсэухэу ащ кIон амал зимыIэхэр аригъащэхэти, къаригъэщэжьыщтыгъэх. Дон­дуковскэм ифутбольнэ купэу «Факелым» зыфэныкъохэр ригъэгъотыщтыгъэх. Чылысэу ста­ницэм дэтым изэтегъэуцо­жьыни иIахьышIу хишIыхьагъ. Дин, цIыф зэхэдз Мыхьамэт иIагъэп.
«Пащэм ишIуагъэкIэ «Дон­дуковскэ элеваторыр» къызэтенэгъэ закъоп, ащ иIофшIэн хигъахъозэ лъэхъаным диштэрэ хъызмэтшIапIэ хъугъэ. Ащ щылажьэхэрэр зы унагъо фэ-
дэу зэдэпсэух, нэбгырэ пэпчъ ыцIэ ышIэу, зыфэныкъом щыгъуазэу пащэр щытыгъ, социаль­нэ IэпыIэгъу аригъэкIыщтыгъ, — къыIуагъ Хъуажъ Мурат.
Мыхьамэт республикэм иагропромышленнэ комплекс изегъэушъомбгъун, иэкономикэ зы­къегъэIэтыгъэным иIахьышхо ахишIыхьагъ. Ар IофшIэкIошхоу, пэщэ чанэу щытыгъ, цIыфхэм, Iоф зыдишIэхэрэм ренэу афэгумэкIыщтыгъ.

Къызщыхъугъэ Кощхьэблэ районми, илъэсыбэрэ Iоф зыщишIэгъэ Джэджэ районми Бэ­локъо Мыхьамэт зэрэщашIэщтыгъэр гукIэгъу зыхэлъ, гу­пыкI зиIэ цIыф хьалэлэу ары.
Бэлокъо Мыхьамэт Адыгэ Республикэм и Къэралыгъо Со­вет — Хасэм идепутатэу зыщэтым, ичIыпIэгъухэм яфедэхэм якъэгъэгъунэн ишъыпкъэу пылъыгъ, Iоф зыдишIэхэрэм ренэу алъытэщтыгъ, хэдзакIохэм цыхьэ къыфашIыщтыгъ. Мы­хьа­мэт ищыIэныгъэ зэрэщытэу игупсэ республикэ хэхъоныгъэ егъэшIыгъэным, ичIыпIэгъухэм ящыIэкIэ-псэукIэ зыкъегъэIэтыгъэным афигъэIорышIагъ. Тиреспубликэ нахь зэтегъэпсыхьагъэ хъуным фэлэжьэгъэ цIыфэу ары зэкIэми ар агу къызэри­нэжьыщтыр.
ШIушIэным пылъыгъэ, пэщэ чанэу щытыгъэ Бэлокъо Мы­хьа­мэт Адыгэ Республикэмрэ ащ щыпсэухэрэмрэ яфедэхэм ренэу афэлэжьагъ. Иныбджэгъухэми, иIофшIэгъухэми ар сыдигъуи шIукIэ агу илъыщт.

Бэлокъо лIакъом инахьыжъэу Му­хьад:
— ТилIакъокIэ лъэ­шэу зэхэтшIагъ Мы­хьамэт къызэрэтхэмытыжьыр. Лъэп­къыр шIу ылъэгъоу, шъхьэкIэфэныгъэшхо зэкIэми афишIэу ежь­ми къыфашIэу Мыхьамэт къытхэ­тыгъ. Нэгъэсыгъэу кIэлэ дэгъугъ, цIыф хьалэлыгъ, хэт лъэIу иIэу екIолIагъэми ишIуагъэ ригъэкIыщтыгъ. ЛэжьэкIо­шхуагъ, зипэщэ эле­ва­торым илъэс пчъагъэхэм апэрэ чIыпIэр ыIыгъэу Iоф ышIагъ, ар къеушыхьаты УФ-м ыкIи АР-м ятын лъапIэу къыфа­гъэшъошагъэхэм. ТилIакъокIэ тыфэраз, шIу нэмыкI тыгу къы­финагъэп.
Мыхьамэт ышнахьыкIэу Мурат шIэжь зэхахьэм къе­кIолIагъэхэм «тхьашъуегъэ­псэу» къа­риIуагъ:
— Хэбзэ гъэцэкIэкIо къулыкъум иIофышIэхэм ыкIи къо­джэдэсхэм, анахьэу Мыхьамэт мыжъобгъу къыфызэIухыгъэныр зыгу къэкIыгъэ Хъымыщ Хьамид ыкIи ащ дезыгъэштагъэхэм лъэ­шэу сафэраз. Сшы шIушIагъэу иIэм осэшIу зэрэфэшъушIыгъэм урымыгушхон плъэкIыщтэп. Зэ­кIэ Iофтхьабзэм къекIолIагъэхэм псауныгъэ Тхьэм къышъует, тинахьыжъхэр бэрэ тиIэнхэу, тинахьыкIэхэр тижьау чIэтхэу рэхьатэу псэунхэу сафэлъаIо.
КIэухым къоджэ псэупIэм ипащэу Шэуджэн Къэплъан къыIуагъ Мыхьамэт гъэхъагъэу ыкIи шIушIагъэу иIэхэр сыхьат заулэкIэ къипIотыкIынэу зэрэщымытыр. Унэгъо дахэу Мы­хьамэт къыгъэнагъэм къыфэ­лъэIуагъ гъэшIэ кIыхьэ хъунхэу, шIоу щыIэр ягъогогъоу псэунхэу. Къуаджэм зэгурыIоныгъэ-
рэ мамырныгъэрэ дэлъэу, хъяр­кIэ зэхэхьанхэу къоджэдэсхэм къариIуагъ.
КIАРЭ Фатим.
Сурэтхэр: Бэлокъохэм яхъар-­зынэщ.