Физкультурэм зыщыпылъхэ ыкIи япсауныгъэ зыщызэтырагъэуцожьырэ организациехэм яфэIо-фашIэхэр ыпкIэ хэлъэу къызIэкIэзыгъа­хьэ­хэрэм хэбзэIахьэу атырэм щыщ къырагъэгъэзэжьын амал яIэ хъугъэ.

Ащ фэгъэхьыгъэ хэбзэгъэуцугъэм кIуачIэ зиIэр 2022-рэ илъэсым ищылэ мазэ и 1-м къыщегъэжьагъ. 2024-у тызхэтым ащ игъэпсын нахь къызэрыкIо къашIыгъ.
Мы хэбзэгъэуцугъэм къыхиубытэхэрэр хэбзэIахьхэр зытыхэрэр ары. Унэе хъызмэтшIапIэ (ИП) зиIэхэр, ежь-ежьырэу IофшIэн къызфэзгъотыжьыгъэхэр (самозанятые) нэмыкI Iоф пылъхэу, ащ хэбзэIахьхэр щамытырэмэ, «вычетыр» къаIызыхыжьын зылъэкIыщтхэм къахиубытэхэрэп.
ЦIыфыр ежь ышъхьэкIэ физкультурэм зыщыпылъхэ ыкIи япсауныгъэ зыщызэтырагъэуцо­жьырэ организацием ыпкIэ хэ­лъэу макIоми, исабый, ыпIунэу къаIызыхыгъэхэри зэрахэтхэу, егъакIоми, хэбзэIахьэу ытыгъэм щыщ къыфигъэзэжьынэу ыгъэ­псын фит. КIэлэцIыкIум ­ыныбжь илъэс 18-м, очнэ шIыкIэм те­тэу еджэмэ, 24-м нэсыфэкIэ а фитыныгъэр иIэщт. Мыщ дэжьым къыщыхэгъэщыгъэн фаер ор­ганизациеу зэолIагъэхэр УФ-м и Правительствэ ыгъэпсыгъэ спискэм хэтын фаеу хэбзэ­гъэуцугъэм законым къызэрэщиIорэр ары. УФ-м хэбзэIахьхэмкIэ икъулыкъу и ГъэIорышIапIэу АР-м щыIэм къызэрэщытаIуагъэмкIэ, Адыгеим ащ фэдэ псэуалъэу итым щыщэу 11-р ары спискэм хэхьагъэр. Ахэм ахэтых комплексышхохэри, ста­дионхэри, унэе спортзал цIыкIухэри.
Илъэсэу узщыкIуагъэр икIымэ ары хэбзэIахьэу а уахътэм пты­гъэм къыгъэзэжьынэу зыбгъэ­псышъущтыр. ГущыIэм пае, мы хэбзэгъэуцугъэм 2022-м кIуачIэ иIэ хъугъэ, ау а илъэсым спортзалым е ФОК-м ыпкIэ ытызэ кIуагъэм «вычетыр» зи­гъэпсын ылъэкIыгъэр 2023-р ары.
Адыгеим щыпсэоу 2022-рэ илъэсымкIэ ар зыгъэпсыгъэр нэбгыри 122-рэ, 2023-мкIэ нэбгыри 161-рэ мэхъу. Правительст­вэм испискэ хэхьэрэ комплексышхоу республикэм Iоф щызышIэхэрэм ащыщ къызэрэ­щытаIуагъэмкIэ, ыпкIэ хэлъэу ипсау­ныгъэ зэтыригъэуцожьынэу е физкультурэм пылъынэу зы мафэм нэбгыри 170-м нэсэу къяуалIэ. ЗэрэхъурэмкIэ, хэбзэ­Iахьым щыщ къезыгъэгъэзэжьырэр мэкIэ дэд.
Мыщ фэдэ спорткомплексым е спортзалым хабзэ фэхъугъэу кIохэрэм ащыщхэм гущыIэгъу тафэхъугъ.
Залинэ илъэс 32-рэ ыныбжь, Мыекъуапэ щэпсэу, IофшIапIэм Iутэу хэбзэIахьхэр етых:
— Илъэсыбэ хъугъэшъ бассейным сэкIо, ау хэбзэIахьым щыщ къезгъэгъэзэжьынэу зыпарэкIи згъэпсыгъэп. Ащ фэдэ хэбзэгъэуцугъэ щыIэ хъугъэми джы шъо къашъуIоу зэхэсхыгъ ныIэп. Ау джы сшIэщт, илъэсыр икIымэ згъэпсынэу ыуж сихьащт.
Бассейнэу Залинэ зыдакIорэр зыхэт комплексыр нахьыпэкIэ зигугъу къэтшIыгъэ спискэм хэ­хьагъэхэм ащыщ.
Сусаннэ илъэс 45-рэ ыныбжь, Мыекъуапэ щэпсэу, медицинэ учреждением Iоф щешIэ, хэбзэIахьхэр етых:
— Спортзалым сыкIоным бэшIагъэу сыкIэхъопсыщтыгъ, ау ыпкIэ зэрэстыщтым сы­къыгъэуцущтыгъ, фэIо-фашIэхэр зэрагъэцакIэхэрэр сшIолъэпIагъ. ХэбзэIахьэу стырэм щыщ къезгъэгъэзэжьынэу фитыныгъэ сиIэ зэхъум, сигуапэу сежьагъ. 2022 — 2023-рэ илъэсхэмкIэ ахъщэр къысфырагъэхьажьыгъ. Зыпари къин хэлъэп игъэпсыни.
ХэбзэIахьым щыщ къыпфи­гъэзэжьынэу бгъэпсыным ищыкIагъэм тыкIэупчIагъ. ГъэIоры­шIапIэм къызэрэщытаIуагъэмкIэ, физкультурэм зыщыпылъхэ ыкIи псауныгъэр зыщызэтырагъэуцожьырэ организациеу уздэ­кIуагъэм зэзэгъыныгъэу дэпшIыгъэр, ахъщэр зэрэптыгъэр къэзыушыхьатырэ тхылъхэм якопиехэр, декларациеу 3-НДФЛ шIыкIэм тетэу гъэпсыгъэр хэ­бзэ­Iахь­хэмкIэ къулыкъоу узпэ­бла­гъэм ептынхэ фае. Ахэм зэрахэплъэщтхэм мэзищ пIалъэ иI. Ащ ыуж мазэм къыкIоцI ахъ­щэр уисчет къихьажьыщт. Зы нэбгырэм къыратыжьыщтыр сомэ мини 150-м шIо­кIыщтэп.
Джащ фэдэу IофшIапIэу узIутым щыбгъэпсыни плъэкIыщт. Джащыгъум уилэжьапкIэ хэбзэ­Iахь процент 13-р хаубытыкIыщтэп. Ащи физкультурэм зыщыпылъхэ организациеу уздакIо-
рэм зэзэгъыныгъэу дэпшIыгъэр, ахъщэр зэрэптыгъэр къэзыу­шыхьатырэ тхылъхэм якопиехэр ищыкIагъэх. ХэбзэIахьхэмкIэ къулыкъоу узпэблагъэм «вы­четыр» бгъэпсынэу фитыныгъэ зэрэуиIэм фэгъэхьыгъэ тхылъ къыIыпхын фае.
ШъунаIэ тешъудз! ХэбзэIахьхэмкIэ Федеральнэ къулыкъум иинтернет нэкIубгъо «унэе кабинет» щызиIэм тхылъхэм ягъэ­псын нахь IэшIэх къыфэхъущт.
Организациеу узэуалIэмэ пшIоигъор УФ-м спортымкIэ и Министерствэ испискэ хэхьа-
гъэ­мэ ащ иинтернет нэкIубгъо щызэбгъэшIэн плъэкIыщт. Мары адресыр: minsport.gov.ru.
ХЪУТ Нэфсэт.