Тинахьыжъхэм ащыщэу, общественнэ IофшIэным чанэу пылъэу, икъэлэ гупсэ ипатриотэу, Шъачэ хэхьэрэ къуаджэу Нэжьыгу щыпсэурэ ­Шъхьэлэхъо Щамсудинэ ыныбжь илъэс 70-рэ зэ­рэхъугъэр хигъэунэфыкIыгъ.

Лъытэныгъэр къылэжьыгъ. Илъэсыбэ хъугъэу мыгупсэф Щамсудинэ «тимэркIэ» еджэх. ИчIыпIэгъухэм цыхьэу къыфа­шIырэр къытефэ дэдэу зэрэ­щытым Iо хэлъэп. Общественнэ IофшIэным Шъхьэлахъом опытышхоу IэкIэлъым фэдиз зиIэм, къушъхьэ къоджэ цIыкIур хэгъэ­кIыри, къэлэшхоми ущылъыхъун фае. Илъэс 40-м ехъугъэу, ар къыгъэшIагъэм ызыныкъом на­хьыб, икъоджэ гупсэ иIофыгъо­хэм ядэгъэзыжьын рипхыгъ.
ЗэкIэри псынкIэу къыдэхъу­рэп, ежь зэрэфаеуи зэпыфэрэп, амалэу щыIэри гъунэнчъэп, ау Шъхьэлахъомрэ ащ игъусэхэмрэ шъхьэихыгъэу, хьэрамыгъэн­чъэу, зыпари чIамыукъуащэу зэкIэри зэшIуахы. Электроэнергием, псым, зэпхыныгъэм, социальнэ псэуалъэхэм IэпыIэгъу ятыгъэным, ныбжьыкIэхэм язы­гъэпсэфыгъо уахътэ зэрагъэ­кIощтым изэхэщэн, унагъохэм яIо­фыгъохэм ядэгъэзыжьынкIэ адеIэгъэным, ом къыздихьыгъэ тхьамыкIагъохэм ядэгъэзыжьын, къуаджэм изэтегъэпсыхьан… А зэпстэумэ ауж итынхэ фаеу мэхъу.
Щамсудинэ Махьмуд ыкъор зэкIэми анэсынэу игъо ефэ. Ар чIыпIэ зэфэшъхьафхэм: ад­министрацием изэхэсыгъохэм, се­минархэм, цIыф зэхахьэхэм, зэфэсхэм, конференциехэм, ыкIуачIэ, иамалхэм къызэрахьэу икъоджэгъухэм яIофыгъохэр зыщызэшIуихырэ инстанциехэм, ащыплъэгъущт. Ылъакъо тет зэпыт. ИIофшIэн шъхьаIэ пшъэ­рылъэу щыриIэ заулэр къыздэплъытэкIэ, Щамсудинэ илъэсыбэрэ Нэжьыгу и «Чылэ Хасэ» ипэщагъ, аужырэ илъэсиплIым Шъачэ и Къэлэ ЗэIукIэ идепутатэу Павел Афанасьевым иIэ­пыIэгъу, ар къызэрэдэхъурэр къэшIэгъуае мэхъу.
Общественнэ Iофыр, ар зэ­рэбэдэдэр хэти къыгурэIо, зэшIопхыныр, Шъхьэлахъом иIуа­кIэу, къызэрыкIоу щытэп, чIэудзыжьынэуи уахътэ къыхэкIы, ау уичылэ гупсэ ихэхъо­ныгъэ­хэм, изэтегъэпсыхьан афэгъэ­хьыгъэу хъумэ, нэбгырэ пэпчъ ащ пай ышIагъэмкIэ зэупчIы-жьын фае.
— Щамсудинэ тиобщественнэ организацие анахь бэшIагъэу хэтхэм ащыщ, — къыкIегъэтхъы чIыпIэ Адыгэ Ха­сэм итхьаматэу КIакIыхъу Мэджыдэ. — Къарыушхоу иIэм, шIэныгъэу IэкIэ­лъым, мыухы­жьын оптимизмагъэу хэлъым яшIуагъэкIэ илъэсыбэ хъугъэу тисатырхэм ахэт, ныбжьыкIэ­хэмкIэ щысэтехыпI.
Шъхьэлэхъо Щамсудинэ ичаныгъэ, IофшIэкIошхоу зэрэщытыр, ащ лIэшIэгъуныкъо Iоф­шIэгъэ илъэсэу иI, ПсышIопэ районым иветеранхэм яорганизациеу 2005-рэ илъэсым къыщегъэжьагъэу зыхэтыми къыщыхагъэщы.

— Щамсудинэ Махьмуд ­ыкъом ичIыпIэгъухэм алъытэ ыкIи цыхьэ къыфашIы, — къы­Iуагъ организацием итхьаматэу Анатолий Карташовым. — Икъоджэ гупсэ иIофыгъохэм ядэгъэзыжьын зэрэхэла­жьэрэм имызакъоу, Шъачэ хэ­хъоныгъэхэр ышIынхэми, ащ изэтегъэпсыхьани иIахь ахэлъ, нахьыжъхэми, ныбжьыкIэхэми Iофышхо адешIэ. Хэгъэгу кIоцI къулыкъухэм илъэсыбэрэ зэрахэтыгъэм, шIуагъэ къэзыхьырэ общественнэ Iофэу ышIэрэм апае тынхэр мызэу, мытIоу къы­фагъэшъошагъэх, щытхъу ыкIи рэзэныгъэ тхылъхэмкIэ къыхагъэщыгъ.
Шъхьэлэхъо Щамсудинэ къа­лэм ыкIи районым япащэхэр, Адыгэ Хасэм, Нэжьыгу и Чылэ Хасэ и Совет ахэтхэр, нэмыкI псэупIэхэм къарыкIыгъэхэр, икъо­джэгъухэр къыфэгушIуагъэх. Илъэс тIокIищрэ пшIырэр биографием чIыпIэ ин щызыу­бытырэ пIалъ ныIэпэу еIо ежь. Зэфэхьысыжьхэр пшIынхэу, пен­­сионер статусыр пштэнышъ узэкIэкIожьыныр джыри жьы, Iофэу щыIэр бэ. Ныбжьым емы­лъытыгъэу иIофшIэн егъэцакIэ, «зыпари зымышIэрэр ары зыпари къыздэмыхъурэр» зэреIо­жьы ежь-ежьырэу.
Шъыпкъэ ащ ыIорэр, мыжъоу щылъым ычIэгъ псыр кIэчъыщтэп, Iоф пшIэн, нахьышIум уфэбэнэн фае. Мэхагъэ къыз­хэб­гъафэу, укъызэкIакIоу зы­къэптымэ зэкIэми ухыпIэ тамыгъэ ащыбгъэуцун фаеу хъущт. Шъхьэлахъор ащ фэдэхэм ащы­щэп, арышъ, зэкIэри къыдэхъущт!
НЫБЭ Анзор.