Комсомолым иветеранхэу лъытэныгъэ зыфэтшIыхэрэр! Ныбджэгъу лъапIэхэр!

Адыгэ хэку комсомол организациер зызэхащагъэр илъэси 100 зэрэхъу­гъэмкIэ тышъуфэгушIо!
ЯныбжьыкIэгъум комсомолым хэтхэу пэрыт комсомольскэ псэолъэшIыным хэлажьэхэзэ Адыгеим ыкIи къэралыгъом зэрэщытэу язэтегъэпсыхьан, яхэхъо­ныгъэ зиIахьышIу хэзылъхьагъэхэмкIэ мы мэфэкIым мэхьанэшхо иI.
Гъэсэныгъэм шъолъырым зыщи­ушъом­бгъунымкIэ, Адыгеим ипро­мы­шленнэ кIуачIэ хэгъэхъогъэнымкIэ комсомолым хэтхэр кIочIэшIу цы­хьэ­шIэгъухэу яшIогъэшхо къагъэкIуагъ, мэкъу-мэщым псэемыблэжьэу щылэ­жьагъэх, колхозхэр, совхозхэр къаIэ­тыгъэх.
Хэгъэгу зэошхом илъэхъан Адыгеим ицIыфхэу нэбгырэ мин 80-у пыим пэуцугъэхэм комсомольцэхэр бэу ахэтыгъэх. Ахэм ащыщыбэм ацIэхэр ти Хэгъэгу итарихъ хэхьагъэх.
Зэоуж илъэсхэми народнэ хъыз­мэтым изэтегъэуцожьын Адыгеим икомсомольцэхэр хэлэжьагъэх, къэра­лыгъом игъусэхэу чIыгукIэр зэдаIэтыгъ, промышленнэ псэолъэ инхэр зэтыра­гъэпсыхьагъэх.
Патриотизмэм, IофшIэным ыкIи къэралыгъом ыпашъхьэ пшъэдэкIыжь щыхьыгъэным зыщыфагъасэщтыгъэхэ щыIэныгъэ еджапIэ лIэуж пчъагъэхэм комсомолыр афэхъугъ. Къиныгъохэм уапэшIуекIоным, шэн пытэ гъэпсыгъэ хъуным ыкIи шапхъэхэм уаблэмыкIыным комсомолым уфигъасэщтыгъ.
Комсомолым ишэн-хабзэхэмрэ изэгъэуIугъэ шIэныгъэхэмрэ непэрэ мафэхэми къашъхьапэ.
Гражданственностыр, патриотизмэр, ти Хэгъэгу ыкIи лъэпкъыбэу ащ щы­псэухэрэм псэемыблэжьэу уафэ­лэжьэныр ныбжьыкIэхэм ахэлъ­хьэ­гъэным сыдигъокIи мэхьанэ иIэщт. Комсомолым хэлъыгъэ шэпхъэшIухэм арыгъуазэхэзэ ныбжьыкIэ органи­зациехэм хэхъоныгъэшIухэр ашIышъущт, тигупсэ Адыгеим ыкIи тихэгъэгушхо яшIогъабэ рагъэкIышъущт.
Непэрэ мэфэкI мафэм Адыгеим икомсомол иветеранхэм псауныгъэ пытэ, мамырныгъэ ыкIи щыIэкIэшIу яIэнэу афэтэIо! ШъуишIэныгъэрэ зэгъэ­уIугъэ шIыкIэ-амалхэмрэ тиреспубликэ ыкIи къэралыгъом зэрэщытэу хахъоу ашIыхэрэм тапэкIи фэрэлажьэх!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет – Хасэм и Тхьаматэу Владимир Нарожнэр