Урысые патриотическэ Iофтхьабзэу «Хэгъэгум и ЛIыхъужъхэм я Вахтэ» тыгъуасэ Адыгеим щырагъэ­жьагъ. Ащ фэгъэхьыгъэ зэхахьэу Мыекъуапэ и Гуп­чэ саугъэт зэхэтэу «ЕгъэшIэрэ машIом» дэжь щыкIуагъэм хэлэжьагъэх хэбзэ къулыкъухэм, ветеран ыкIи общественнэ организациехэм ялIыкIохэр.

Проектэу «Хэгъэгум и ЛIыхъужъхэм я Вахтэ» пхырызыщырэр общественнэ организациеу «ЛIыхъужъхэм я Урысые Ассоциаций» ары, ащ иIэпыIэгъух УФ-м и Президент и Администрацие ыкIи и Общественнэ палатэ. Проектым пэщэныгъэ дызэрехьэ Урысыем и ЛIыхъу­жъэу, Ассоциацием ипрезидентэу, генерал-полковникэу Владимир Шамановым. Патриотизмэр ыкIи къыткIэхъухьэрэ лIэужхэм ядзэ-патриотическэ пIуныгъэ гъэпытэгъэным Iофтхьабзэр фэIорышIэ.
«Хэгъэгум и ЛIыхъужъхэм я Вахтэ» къыдыхэлъытагъэу зэо зэфэшъхьафхэм ахэлэжьэгъэ дзэ офицерхэр, лIыхъужъхэр Адыгеим къэкIуагъэх. Хэгъэгур къаухъу­мэзэ, ахэр щыIэныгъэм зыщырихьылIэгъэ хъугъэ-шIагъэхэр кIэлэеджакIохэм, ныбжьыкIэхэм, кадетскэ корпусхэм ащеджэ­хэрэм къафаIотэщтых. Республикэм ирайонхэми лIыхъужъныгъэм иурокхэр ащызэхащэщтых.
Общественнэ организациеу «ЛIы­хъужъхэм я Урысые Ассоциацие» илIыкIоу, Урысыем и ЛIыхъужъэу, полковникэу Владимир Алимовым къызэриIуагъэмкIэ, я 126-рэ Вахтэр Адыгеим щызэхащэ ыкIи ащ нэмыкI шъолъырхэри къыкIэлъыкIощтых.
— Зищытхъу языгъэIорэ дзэкIолIхэр зыщыщ Адыгеим тигуапэу тыкъеблэгъагъ, мыр дзэ шъолъырэу щыт, лъытэныгъэ фэтэшIы. Тикъэралыгъо къызэрымыкIо уахътэу зыхэтым, пыим тыкъызщиухъу­рэигъэм мыщ фэдэ зэIукIэгъухэм мэхьанэшхо яI. Неущырэ мафэр лъызыгъэ­кIотэщтыр къыткIэхъухьэрэ лIэужхэр ары, ахэм Урысыем итарихъ ишъыпкъапIэ тэщ фэдэ лIыхъужъхэм алъамыгъэIэсымэ, зыми къафиIотэщтэп. Урысыем къытекIонхэ алъэкIыщтэп, ар ыгукIи ыпсэкIи апэуцужьы, кIочIэшхо къезытырэ цIыфхэр мыщ щэпсэух, — къы­Iуагъ Владимир Алимовым.
Непэ хэушъхьафыкIыгъэ дзэ операцием щытхъу хэлъэу зидзэ пшъэрылъхэр щызыгъэцэкIэрэ тидзэкIолIхэм зэрафэразэхэр, лъытэныгъэ зэрафашIырэр зэхахьэм хэлэжьагъэхэм къаIуагъ. Джащ фэдэу зыпсэ зыгъэтIылъыгъэ дзэкIолIхэми шъхьащэ зэрафашIырэр, яшIэжь егъашIэм тарихъым къызэрэхэнэщтыр къыхагъэщыгъ. Ахэм ащыщхэм къэралыгъо тын лъапIэхэр къафагъэшъошагъэх. Урысыем и ЛIыхъужъ щытхъуцIэр тичIыгогъухэу щымыIэжьхэу къызэратыгъэхэм ащыщых гвардием истаршэ лейтенантэу Валерий Заволянскэр, майорэу Вадим Лемеш, генерал-лейтенантэу Олег Цоковыр, полковникэу Роман Тороховыр.
ТидзэкIолIхэм яшIэжь зэрагъэлъапIэрэм фэгъэхьыгъэ гущыIэхэр пчэгум щыIугъэх, афэшъыгъуагъэх. Iофтхьабзэм хэлэжьагъэхэм «ЕгъэшIэрэ машIом» къэгъэгъэ блэрхэр ыкIи къэгъэгъэ Iэрамхэр кIэралъхьагъэх.
Iэшъынэ Сусан.