НыбжьыкIэхэр нэIуасэ фэхъугъэх
Проектэу «Хэгъэгум и ЛIыхъужъхэм я Вахт» зыфиIорэм къыдыхэлъытагъэу тыгъуасэ Мыекъопэ къэралыгъо технологическэ университетым лIыхъужъныгъэм иурок щыкIуагъ. Апшъэрэ ыкIи гурыт сэнэхьат зэзыгъэгъотырэ студентхэр, кIэлэеджакIохэр ащ хэлэжьагъэх.
УФ-м илъэпкъ гвардие Къыблэ шъолъырым идзэхэмкIэ икомандующэу, генерал-полковникэу, Урысыем и ЛIыхъужъэу Олег Козловыр ыкIи Адыгэ Республикэм иветеранхэм я Совет ипащэу Къоджэ Аслъан ныбжьыкIэхэм гущыIэгъу афэхъугъэх.
Мыекъопэ къэралыгъо технологическэ университетым мыщ фэдэ Iофтхьабзэ зэрэщызэхащэрэм мэхьэнэшхо зэрэратырэр проректорэу БрантI Мурат ипэублэ псалъэ къыщыхигъэщыгъ. Урысыем и ЛIыхъужъ нэбгырэ 15 Мыекъуапэ къэкIуагъэхэу чIыпIэ зэфэшъхьафхэм ныбжьыкIэхэм гущыIэгъу зэращафэхъухэрэм шIогъэ ин зэрэхэлъыр ащ къыкIигъэтхъыгъ. КъыткIэхъухьэрэ лIэужхэм я Хэгъэгу шIу алъэгъунымкIэ, ятарихъ ашIэнымкIэ, лIыхъужъхэм нэIуасэ афэхъунхэмкIэ ыкIи зыгъэгумэкIырэ упчIэхэм яджэуапхэр агъотыжьынхэмкIэ мыщ фэдэ Iофтхьабзэхэм яшIогъэшхо къэкIо.
Генерал-полковникэу Олег Козловыр 1996-рэ илъэсым я 131-рэ хэушъхьафыкIыгъэ мотострелковэ бригадэу Мыекъуапэ щыIэм ипащэ игуадзэу щытыгъ. УФ-м и Президент иунашъокIэ 1996-рэ илъэсым чъэпыогъум и 19-м «Урысыем и ЛIыхъужъ» зыфиIорэ щытхъуцIэр къыфагъэшъошагъ. Дзэ къулыкъур Афганистан, Туркмением, Венгрием, Белоруссием ащихьыгъ. Зэо-зэпэуцужь пчъагъэхэм ахэлэжьагъ.
— Проектым къыдыхэлъытагъэу Урысыем ичIыпIэ зэфэшъхьафхэм тэкIо, ныбжьыкIэхэм гущыIэгъу тафэхъу. Iофтхьэбзи 126-рэ фэдиз зэхэтщагъ. Непэ Адыгеим тыщыI. АР-м и ЛIышъхьэу КъумпIыл Мурат ныбжьыкIэхэм патриотическэ пIуныгъэ яIэу къэтэджынхэм мэхьанэшхо реты. Адыгеир сыгукIэ къыспэблагъ, мыщ щыщ дзэкIолIхэр тигъусэхэу зэо-зэпэуцужь пчъагъэмэ тахэлэжьагъ, ахэм ащыщ Чэчэным щыкIогъэгъэ заор. Мы республикэм щыщэу апэрэу нэIуасэ сызыфэхъугъагъэр Къоджэ Аслъан, ащ щысэ тепхынэу щыт, ишIэныгъэхэм яшIуагъэкIэ кIэлэ ныбжьыкIэ пчъагъэ псаоу янэхэм афэкIожьыгъэх. Непэрэ мафэм Урысыем и ЛIыхъужъыцIэр зыфагъэшъошагъэу нэбгырэ 700-м ехъу къэралыгъом щэпсэу, идунай зехъожь ужым мы цIэр къызфагъэшъошагъэуи бэ тиIэр. Ахэм яшIэжь дгъэлъэпIэн фае. Непэрэ дунай мамырым фэбэнагъэхэу, Советскэ Союзым и ЛIыхъужъэу ветеран 42-рэ ныIэп къытфэнагъэр, — къыIуагъ Олег Козловым.
Нэужым ныбжьыкIэхэм лIыхъужъым къафиIотагъ заоу зыхэлэжьагъэхэр, ошIэ-дэмышIэ Iофэу зыхэфагъэхэр, ахэм хэкIыпIэу къафигъотыщтыгъэхэр. АшIогъэшIэгъонэу ныбжьыкIэхэр ащ едэIугъэх, упчIэхэр ратыгъэх.
ДЕЛЭКЪО Анет.
Сурэтхэр: Iэшъынэ Аслъан.