Урысые культурнэ-спорт фестивалэу «Мамырныгъэр зэрылъ Кавказыр» зыфиIорэр къалэу Владикавказ щыкIуагъ.

Адыгеим икIыгъэ спортсменхэм гъэхъэгъэшIухэр ашIыгъэх, бэнэным илъэныкъоу «муайтай» зыцIэм ахэм зыщаушэтыгъ ыкIи медалих къахьыгъ. Лъэпкъ проектэу «Демографием» къыдыхэлъытэгъэ федеральнэ проектэу «Спортыр — щыIэныгъэм ишапхъ» зыфиIорэм ишIуагъэкIэ Iофтхьабзэр рагъэкIокIыгъ.
Урысыем ишъолъыр зэфэшъхьафхэм, джащ фэдэу Къыблэ Осетием ыкIи Абхъазым яспортсмен ныбжьыкIэхэр Темыр Осетием икъэлэ шъхьаIэ щызэрэугъоигъэх. ЗэкIэмкIи нэбгырэ минрэ ныкъорэ фэдиз зэнэкъокъугъ, ахэм аныбжь илъэс 16-м шIокIырэп.
Республикэм ихэшыпыкIыгъэ командэ хэтхэм физическэ ухьазырыныгъэ дэгъу къагъэлъэгъуагъ. Максим Кузнецовым, Сергей Снежко ыкIи Милана Лапинам текIоныгъэр къыдахыгъ. Дамэкъо Тамирлан тыжьын медаль къыфагъэшъошагъ, Муса Мусаевымрэ Ермолай Лященкэмрэ ящэнэрэ чIыпIэр къахьыгъ.
Къэралыгъом щыпсэурэ цIыф лъэпкъ зэфэшъхьафхэм языкIыныгъэ гъэпытэгъэным, спортсмен ныбжьыкIэхэм заушэтыным, язэпхыныгъэ зырагъэушъомбгъуным фестивалыр фэIорышIагъ.