Ныбджэгъу хьалэлхэр, цыхьэшIэ­гъухэр комсомолым къызэрэситыгъэхэмкIэ насыпышIоу зысэлъытэжьы. Тхылъ шъхьаф ахэм афэстхынэу атефэ.

Ау джыдэдэм сэ зигугъу къэсшIы сшIоигъор илъэс 42-кIэ узэкIэIэбэжьмэ, тичIыпIэгъоу, летчик-космонавтэу А. Н. Березовоир космосым быбыгъэу сыдэгущыIэнэу зэрэхъугъагъэр ары. ЗэхашIэу джащыгъум сшIыгъагъэхэр непи къыздесэхьа­кIых.
Хэку комсомол организацием илIыкIо куп 1982-рэ илъэсым жъоныгъуакIэм и 14-м гъогу техьагъ, ВЛКСМ-м ия ХIХ-рэ Зэфэс ар хэлэжьэнэу щытыгъ. Комсомольци 5 лIыкIо купым хэтыгъ. Ахэр: хьалыгъугъэжъэ комбинатым икомсомол-ныбжьыкIэ бригадэ ибригадирэу С. Бгъуашэр, объединениеу «Зэ­къошныгъэм» ирабочэу, Ле­нинскэ комсомолым ишIухьафтын илауреатэу С. Бессмертнэр, Роспотребсоюзым и Мые­къопэ производственнэ объеди­нение иIофышIэу Л. Рожковар, Теуцожь районымкIэ колхозэу «Ок­тябрэм» имеханизаторэу А. Янэкъор ыкIи сэры —ВЛКСМ-м ихэку комитет иапэрэ секретарэу а лъэхъаным сыщытыгъ.

Москва тыкIонэу тызежьэм, космонавтхэу А. Н. Березовоимрэ В. В. Лебедевымрэ ятIо­нэрэу быбыгъэхэу космосым щыIагъэх. Краснодар тыкIо зэ­хъум Анатолий Березовоим янэ зэдгъэлъэгъунэу сыгу къэ­кIыгъ. Космонавтыр зыщапIугъэ унэр Инэм къыщыдгъотыныр къин къытщыхъугъэп. Наталья Яков ыпхъур а пчэдыжьым нэгушIоу къытпэгъокIыгъ. ИкIалэ зэрэфэгумэкIырэр ащ къыхэщыщтыгъ.
Сыхьатныкъо зыкъудыигъэ зэдэгущыIэгъур псынкIэ дэдэу кIуагъэу къытщыхъугъ. ГумэкIи, гушIуагъуи, икIалэ зэрэрыгу­шхо­рэри ащ ынэхэм акIэтлъэгъуагъ. А зэIукIэгъум ыуж нэфынэ, зэхэфыгъуае горэм сы­лъыIэсыгъэу къысщыхъугъагъ.
ЖъоныгъуакIэм и 18-м, комсомолым ия ХIХ-рэ Зэфэс къы­зэIуахы зэхъум, космонавтхэм яшIуфэс псалъэу зэфэсым къы­фагъэхьыгъэм къеджэгъагъэх. Краснодар краим иделегатэу щытыгъэ летчик-космонавтэу В.В. Горбатко нэIуасэ сызыфэ­хъум, Березовоим янэ сызэрэ­IукIагъэр къыфэсIотагъ. Джащыгъум Виктор Василий ыкъом сыкъыгъэгугъагъ космонавтхэм адэгущыIэхэ зыхъукIэ гъусэ сишIынэу.
Космонавтхэм тызадэгущы­Iэщт мафэри къэсыгъ. Зэфэсыр кIозэ тыкъычIэкIи, орбитальнэ комплексэу «Салют-7» — «Союз Т-5» зыфиIорэм радио,- телевизионнэ зэпхыныгъэ зыщыдыряIэ унэм тихьагъ.
Слъэгъурэ пстэури сшIогъэшIэгъоныгъ. Виктор Горбатко тIэкIурэ Березовоим дэгущыIи, етIанэ сэ гущыIэр къыситыгъ. СцIэрэ IэнатIэу сIыгъымрэ къес­Iуи, космонавтым ипсауныгъэ изытет сыкIэупчIагъ, янэ тызэ­рэIукIагъэр тичIыпIэгъу къы­фэсIотагъ. А уахътэм ащ ынэгу нахь къызэлъынэфыгъэу къысщыхъугъ. Анатолий Березовоим янэ зэрэзэдгъэлъэгъугъэм фэшI къызэрэтфэразэр къыIуагъ, гъэ­хъагъэхэр тшIынэу къытфэлъэ­Iуагъ. ИлIакъо щыщхэр, Адыгей гупсэр, комсомолым зыхэтыгъэ илъэсхэр ренэу ыгу зэри­лъхэр ащ къысиIуагъ. ЧIыгум къызигъэзэжькIэ хэкум къэкIо­нэу, зы­къытIуигъэкIэнэу тыкъы­гъэгугъагъ.
Космонавтым янэ сызэрэ­IукIагъэр, космосым щыIэу ти­чIыпIэгъу сызэрэдэгущыIагъэр егъэшIэрэу сыгу къинагъэх.
Мыекъуапэ сыкъызэкIожьым, телекъэтынэу «Уахътэ» зыфи­IорэмкIэ космонавтым сызэ­рэдэгущыIагъэр къызэрагъэлъэ­гъуагъэр къысаIожьыгъ.
2008-рэ илъэсым А. Березовоим аужырэу Мыекъуапэ сызыщыIокIэми Адыгеим къызэрэщыхъугъэм, ныбджэгъу дэгъухэр ащ зэрэщыфэхъугъэхэм зэ­рарыгушхорэр къысиIогъагъ.
Советскэ Союзым тыкъызэрэщыхъугъэм, комсомолым тызэрипIугъэм тарэгушхо.
Комсомолым пэщэныгъэ щызесхьэзэ, къулаиныгъэу, амалэу сIэкIэлъ хъугъэхэр ыужыкIэ нау­кэмкIи, егъэджэн IофымкIи къы­зэрэсшъхьапэжьыгъэхэр къасIо сшIоигъу. СищыIэныгъэкIэ анахь шъхьаIэу слъытэрэр ныбжьыкIэхэм сызэрадэлажьэ­рэр ары.
Шъоджэ Асиет.
1981 — 1983-рэ илъэсхэм ВЛКСМ-м и Адыгэ хэку комитет иапэрэ секретарэу щытыгъ, философие шIэныгъэхэмкIэ доктор, Адыгэ къэралыгъо университетым ипрофессор.