Адыгеим икомсомол организацие ныбжьыкIэ миллион пчъагъэ хэтыгъ. Ахэр зэрапIущтхэ, зэрэрагъэджэщтхэ шIыкIакIэхэм якъэгъотынкIэ комсомолым IэкIэлъыгъэ амалышIухэр джыри лъэшэу къашъхьапэ. Комсомолым хэтыгъэ пстэуми хэгъэгум ихэхъоныгъи, къыткIэхъухьэрэ ныбжьыкIэхэм япIуни яIахьышхо непи хашIыхьэ.
Геополитическэ Iофхэр зыщыхьылъэхэ джырэ лъэхъаным СССР-м ихэхъоныгъэ, къэралыгъом иэкономикэрэ илъэшыгъэрэ зыкъягъэIэтыгъэным, фашизмэм изэхэкъутэн, зэоуж илъэсхэм хъызмэтыр зыпкъ игъэуцожьыгъэным, чIыгукIэхэм якъэIэтын, космосым иушэтын, наукэмрэ культурэмрэ алъэныкъокIэ гъэхъэгъэшхохэу ашIыгъэхэм, советскэ спортым итекIоныгъэхэм яIахьышIу шъуилэгъухэм зэрахашIыхьагъэр зэхэшъушIыкIыным мэхьэнэ ин иI.
Адыгеим икомсомол хэгъэгуми, Пшызэ шъолъырми яныбжьыкIэхэм я Союз иапэрэ сатырхэм сыдигъуи ахэтыгъ. ЦIыф лъэпкъыбэ зыщызэдэпсэухэрэ хэкум икомсомол анахьэу зыдэлажьэщтыгъэр заомрэ IофшIэнымрэ яветеранхэм, нахьыжъхэм лъытэныгъэ афашIэу, лъэпкъхэм ахэлъ хэбзэшIухэм, тарихъым уасэ афашIэу ныбжьыкIэхэр пIу­гъэнхэр ары.
Ныбджэгъу лъапIэхэр! НыбжьыкIэхэр хэгъэгум икIэгъэкъон пытэу сыдигъуи щытыгъэх. КъэIогъэн фае мамырныгъэмрэ щынэгъончъа­гъэмрэ якъэухъумэнкIэ хэбзэшIоу щыIэхэр Адыгеим икIалэхэмрэ ипшъашъэхэмрэ непи зэрэлъагъэкIуатэхэрэр. Мамыр щыIакIэ тапэкIи зэрэтиIэщтым тицыхьэ телъ!
Тэ, комсомолым иветеранхэр, ныбжьыкIэхэм япIун, хэбзэшIоу щыIэхэр лъыдгъэкIотэнхэм Адыгеимрэ Урысыемрэ янеущырэ мафэ нахь дахэ хъуным тадэлэжьэным тыфэхьазыр!
Урысые къэралыгъом изыкIыныгъэ игъэпытэн акIуачIэ рахьылIэнэу тиныбжьыкIэхэм тыкъяджэ! Тихэгъэгу ис лъэпкъхэм азыфагу илъ зэгурыIоныгъэр, якультурэ кIэн бай, яшэн-хэбзэшIухэр къэтэжъугъэу­хъумэх!
Къэралыгъошхом ицIыф шъыпкъэхэу, хэгъэгупсэхэу шъущыт!
Адыгеими Урысыеми апае текIоныгъакIэхэр шъушIынэу шъуфэтэIо!
Адыгеим икомсомол ия 100-рэ илъэс игъэмэфэкIын
фэгъэзэгъэ зэхэщэкIо комитетыр