Лъытэныгъэ зыфэтшIырэ тиIофшIэгъухэр, ныбджэгъухэр!

НыбжьыкIэхэм япIункIэ IэпыIэгъу афэ­хъурэ Урысые общественнэ организа­циеу «Воспитанники комсомола — Мое Отечество» зыфиIорэм и Гупчэ Совет комсомолым хэтыгъэ пстэуми Адыгэ хэку комсомол организацием ия 100-рэ илъэскIэ афэгушIо!
Адыгеим икомсомольцэхэм цIыф жъу­гъэхэм тхэкIэ-еджакIэ ягъэшIэгъэным, щы­IэкIакIэм техьанхэм, хэкум исоциальнэ-­эко­номикэ хэхъоныгъэ яIахьышхо ахашIы­хьагъ. Iофхэр нахь зыщыкъинхэм зафагъа­зэщтыгъ, янеущрэ мафэ нахьышIу зэрэхъу­щтым яцыхьэ телъыгъ. Комсомол-ныбжьыкIэ бригадишъэ пчъагъэмэ щысэтехыпIэу Iоф ашIагъ, яIэпэIэсэныгъэ къызыщылъэ­гъорэ, янаучнэ-техническэ творчествэ зы­зыщиушъомбгъурэ зэнэкъокъухэм ныбжьыкIэхэр якIэщэкIуагъэх.
Комсомольцабэмэ Хэгъэгу зэошхом лIыхъужъныгъэ щызэрахьагъ, зэоуж илъэс­хэми народнэ хъызмэтыр зыпкъ игъэуцо­жьыгъэным яIахьышхо хашIыхьагъ. Адыгеим икомсомол хэтыгъэхэр сыдигъуи я Хэгъэгу фэшъыпкъагъэх, лIыхъужъныгъэ зэрахьагъ, зэкъошныгъэмрэ интернацио­нализмэмрэ осэшхо аратыщтыгъ. Комсомольцэхэм заом илIыхъужъхэм саугъэтхэр афагъэуцущтыгъэх. Нахьыжъхэр зыщызэогъэ чIыпIэхэр хамыгъэкIуакIэхэу зекIохэр, лъэужзефэ цIыкIухэм язэхахьэхэр, дзэ-спорт джэгукIэхэу «Зарницэмрэ» «Орленкэмрэ» зэхащэщтыгъэх.
Адыгеим икомсомол ныбжьыкIэхэм япIуни, шъолъырым исоциальнэ-экономикэ хэхъоныгъи иIахьэу ахишIыхьагъэм уасэ фэ­шIыгъуай. Адыгеим мамырныгъэрэ ­лъэпкъ зэгурыIоныгъэрэ зэрилъхэр ащ къыкIэкIуа­гъэу плъытэми хъущт.
Непэ, Урысыем лъэшэу къызыщыпэуцу­жьыхэрэ лъэхъаным, Хэгъэгу зэошхор зы­кIогъэ илъэсхэми, ыужкIи Адыгеим икомсомольцэхэмрэ иныбжьыкIэхэмрэ зэшIуахын фаеу хъугъэ пшъэрылъхэмкIэ къашъхьэ­пэгъэ опытымрэ шIэныгъэмрэ къызфэгъэфедэгъэнхэм мэхьанэшхо зэриIэр зыщыдгъэгъупшэ хъущтэп.
Урысыем ис ныбжьыкIэхэми, тихэгъэгуи янеущрэ мафэ зыфэдэщтыр тэ бэкIэ къы­тэлъытыгъ. Ятэжъ пIашъэхэр, комсомолым иветеранхэр къамыгъэукIытэжьхэу ныб­жьыкIэхэр пIугъэнхэм кIуачIэу тиIэр зэкIэ етэжъугъэгъэхьылI.
Тыгу къыддеIэу тышъуфэлъаIо псауныгъэ пытэрэ щыIэкIэшIурэ шъуиIэнэу, шъунасыпышIонэу, шъуигъашIэ кIыхьэнэу, шIоу щыIэр къыжъудэхъунэу, тыдэрэ лъэныкъуи гъэхъагъэхэр щышъушIынхэу!
Ныбджэгъу лъапIэхэр, шъуимэфэкIкIэ тышъуфэгушIо!
НыбжьыкIэхэм япIункIэ IэпыIэгъу афэхъурэ Урысые общественнэ органи­зациеу «Воспитанники ком­сомола — Мое Отечество» зыфиIорэм и Гупчэ Совет
чъэпыогъум и 29-рэ, 2024-рэ илъэс