ШахматхэмкIэ Адыгеим изэIухыгъэ первенствэ Мыекъуапэ щыкIуагъ. КIэ­лэцIыкIу тренерэу Иван Строевскэм ишIэжь фэгъэхьыгъэ зэ­нэкъокъум республикэм икъэлэ шъхьаIэ, Апшеронскэ, Шытхьалэ, Приморскэ-Ахтарскэ, Мыекъопэ ыкIи Тэхъутэмыкъое районхэм ялIыкIохэр хэлэжьагъэх. ЗэкIэмкIи нэбгырэ 54-мэ заушэтыгъ.

Iофтхьабзэм хэлэжьагъэхэм зэкIэми анахьыкIагъ илъэси 6 зыныбжь Сэмэгу Тимур. Ащ текIоныгъитIу къыдихын ылъэ­кIыгъ. Пстэуми анахьыжъыгъэр илъэс 83-рэ зыныбжь Эдуард Сотниковыр ары.
Зэнэкъокъум тури 7 къыды­хэлъытэгъагъ, швейцарскэ шIыкIэм тетэу ар рагъэкIокIыгъ. Зэ­фэхьысыжьхэм къызэрагъэ­лъэгъуагъэмкIэ, нэбгыритIумэ очко зэфэдиз рагъэкъугъ, ау къэгъэлъэгъон тедзэхэмкIэ Шы­тхьалэ щыпсэурэ Андрей Дашко текIоныгъэр фагъэшъошагъ. Псэу­пIэу Яблоновскэм дэс Александр Сергеевым ятIонэрэ чIыпIэр къыхьыгъ, ящэнэрэ хъугъэ Краснодар краим илIыкIоу Борис Апостолиди. БзылъфыгъэхэмкIэ къэгъэлъэгъон анахь дэгъу зиIэр Мыекъуапэ щыпсэурэ Мария Пи­воваровар ары, мыщ я 7-рэ чIыпIэр къыдихыгъ.
ХагъэунэфыкIырэ чIыпIэхэр къыдэзыхыгъэхэм медальхэр ыкIи дипломхэр афагъэшъошагъэх. Джащ фэдэу Иван Строевскэм иунагъо ыгъэнэфэгъэ ахъщэ ыкIи нэмыкI шIухьафтынхэр ахэм аратыжьыгъэх.