Мы мафэхэм Адыгэ къэралыгъо университетым я V-рэ Урысые конференциеу «ХьисапымкIэ сэнаущыгъ ыкIи хьисап гъэсэныгъ» зыфиIорэр щызэхащагъ. Джащ фэдэу хьисапымкIэ кIэлэегъаджэхэм ыкIи ушэтакIохэм апае я III-рэ Урысые форумэу «Градиент» зыфиIорэр макIо. Iофтхьабзэхэр непэ зэфашIыжьыщтых.

Хьисап гъэсэныгъэм епхыгъэ гумэкIыгъохэм, мы лъэныкъомкIэ сэнаущыгъэ ин зыхэлъхэр къыхэгъэщыгъэнхэм япхыгъэ Iофыгъохэм, хьисапыр нахь игъэкIотыгъэу зэрагъэшIэнымкIэ ашIэн фаехэм ыкIи нэмыкIхэм къэзэрэугъоигъэхэр атегущыIагъэх.
Адыгэ къэралыгъо университетыр, Москва дэт къэралыгъо кIэлэегъэджэ институтыр, Москва щыIэ физикэ-техническэ институтыр ыкIи Тюменскэ къэралыгъо университетыр Iофтхьабзэхэм кIэщакIо афэхъугъэх.
Хэгъэгу зэфэшъхьафхэм къарыкIыгъэ кIэлэегъэджэ ыкIи кIэлэеджэкIо 80 фэдиз конференцием ыкIи форумым хэлэжьагъэх. ХьисапымкIэ сэнаущыгъэ ин зыхэлъхэм Iоф адэзышIэрэ кIэлэ­егъаджэхэр, зэлъашIэрэ кIэлэегъаджэхэр, хьисапымкIэ Урысыем ихэшыпыкIыгъэ командэ итренерхэр Адыгеим къэкIуа­гъэх. Ахэм ахэтых РАН-м ыкIи РАО-м иакадемикэу, Москва дэт къэралыгъо университетэу М.В. Ломоносовым ыцIэ зыхьырэм икафедрэ ипащэу Алексей Семеновыр, хьисапымкIэ кIэлэеджакIо­хэм ятренер шъхьаIэу Кирилл Суховыр, хьисапымкIэ институтэу В.А. Стекловым ыцIэ зыхьырэм илабораторие ипащэу Николай Андреевыр ыкIи хьисап гъэсэныгъэмкIэ Московскэ гупчэм ипащэу Иван Ященкэр.
ШIэныгъэ форумым къыдыхэлъыта­гъэу хьисапым хэхъоныгъэхэр ышIынхэмкIэ шIэгъэн фаехэм, сэнаущыгъэ зыхэлъ кIэлэеджакIохэм Iоф адэзышIэрэ кIэлэегъаджэхэм ягъэхьазырын, профильнэ классхэм ащеджэхэрэм Iоф зэрадэпшIэн фаем, хьисап гъэсэныгъэм епхыгъэ проектхэр зэрагъэхьазырыщтхэм атегущыIагъэх.
Урысые конференциер 2018-рэ илъэ­сым къыщегъэжьагъэу Адыгэ къэралыгъо университетым щызэхащэ, форумыр апэрэу апшъэрэ еджапIэм щэкIо. Мыщ къекIолIагъэхэр пленарнэ ыкIи секционнэ зэхэсыгъохэм зэрахэлажьэхэрэм нэмыкIэу проектхэр агъэхьазырыщтых, ахэм лъэтегъэуцо афашIыщт.
— ТиуниверситеткIэ мы Iофтхьабзэхэм мэхьанэшхо яI, хьисапым изэгъэ­шIэн типшъэрылъ шъхьаIэхэм ахэхьэ. ЧIыпIэ зэфэшъхьафхэм къарыкIыгъэ хьакIэхэр тадэжь къэкIуагъэх. Хьисапым изэгъэшIэнкIэ, хэхъоныгъэхэр егъэшIыгъэнхэмкIэ мы Iофтхьабзэхэм шIогъэ ин къатыщт, — къыIуагъ апшъэрэ еджапIэм иректорэу Мамый Даутэ.

ДЕЛЭКЪО Анет.