НАТО-м хэхьэрэ хэгъэгухэм ятехникэу ыкIи яIашэхэу хэушъхьафыкIыгъэ дзэ операциер ­зыщыкIорэ чIыпIэм тидзэхэм къызщыIэкIа­гъэ­хьагъэхэм якъэгъэлъэ­гъон къалэу Мыекъуапэ игупчэу Лениным ыцIэ зыхьырэм тыгъуасэ къы­щызэIуахыгъ. Адыгеим и ЛIышъхьэу КъумпIыл Мурат а Iофтхьабзэм хэлэжьагъ.

Джащ фэдэу мыщ хэлэжьагъэх Къыблэ дзэ коим идзэхэм япэщэ пшъэрылъ зыгъэцэкIэрэ генерал-лейтенантэу Владимир Кочетковыр, УФ-м и Федеральнэ ЗэIукIэ ФедерациемкIэ и Совет илIыкIохэу экономикэ политикэмкIэ Комитетым итхьаматэу Андрей Кутеповыр зипащэр, Адыгеим ыцIэкIэ сенаторэу Хъопсэрыкъо Мурат, АР-м и Къэралыгъо Совет — Хасэм и Тхьаматэу Владимир Нарож-
нэр, министрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, минист­рэхэм я Кабинет хэтхэр, рес­публикэ парламентым идепутат­хэр, ветеран, ныбжьыкIэ дзэ-­патриот организациехэм ялIыкIохэр, республикэм щыпсэухэ­рэм ыкIи ихьакIэхэм ащыщхэр.

Республикэм и ЛIышъхьэ ишIуфэс псалъэ къызэрэщы­хи­гъэщыгъэмкIэ, мы къэгъэлъэ­гъоным джыри зэ къеушыхьаты тидзэкIолIхэм ялIыхъужъныгъэрэ яблэнагъэрэ.
«ТикIалэхэм мафэ къэс ­НАТО-м идзэ машинэ пэуцужьхэзэ теубытагъэ ахэлъэу лIы­хъужъныгъэ зэрахьэ, пыим итех­никэ уфырикъун умылъэкIыщтэу зэраIорэр зэрэпцIыр къагъэшъыпкъэжьы. Ахэм тызэрапэуцужьын тэри тиI. Тарихъым мызэу, мытIоу къыгъэшъыпкъэ­жьыгъ Урысыеу цIыф лъэпкъ зэфэшъхьафыбэмэ къахэкIыгъэ­хэм язэкъотныгъэрэ акIуа­чIэрэ зынэсырэр. Тидзэ хъыбэй ышIынэу пыир бэрэ пылъыгъ, Украинэм дзэ техникэр къы­IэкIигъахьэзэ, ыгъэщтэнхэу гугъагъэми, тиухъумакIохэм къаушыхьатыгъ урысые Iашэм иамал зыфэдэр. Тидзэкъулыкъу­шIэхэм зэрифэшъуашэу ядзэ пшъэрылъ агъэцакIэ, зышъхьамысыжьхэу ыпэкIэ лъэкIуатэх. ТекIоныгъэр къызэрэдэтхыщтым уехъырэхъышэнэу щытэп. Мы къэгъэлъэгъонми ар джыри зэ нахь къеушыхьаты», — къы­Iуагъ КъумпIыл Мурат.

Республикэм и ЛIышъхьэ къызэрэхигъэщыгъэмкIэ, тичIыпIэгъухэр зыхэлэжьэгъэхэ заохэм къащызIэкIагъэхьагъэхэр ары непэ мыщ къыщагъэлъа­гъохэрэр. Ахэм ащыщыбэм къэралыгъо шIухьафтын инхэр афагъэшъошагъэх. Ядунай за­хъожьым ыуж тичIыпIэгъу нэбгыри 4-мэ Урысыем и ЛIыхъужъ цIэ лъапIэр къафагъэшъошагъ.
«Урысыем зыкъэухъумэжьынымкIэ и Министерствэ, Къыблэ дзэ коим ипащэхэм мыщ фэдэ къэгъэлъэгъон Мыекъуапэ щызэхэтщэным иамал къызэрэтатыгъэм пае сызэрафэразэр къасIомэ сшIоигъу. Урысыем и УIэшIыгъэ КIуачIэхэм ыкIи анахь гумэкIыгъо инхэм апэуцужьынхэмкIэ Урысыем ис цIыф пстэуми язэкъотныгъэ итамыгъэу ар щэрэт. Тидзэ тырэгушхо! Ти­дзэкIолI пстэуми Хэгъэгум икъэу­хъумэнкIэ зи къызэратемынэрэм, япшъэрылъ зэрэфэшъыпкъэхэм ыкIи бланэу зэрэзаохэрэм апае сызэрафэразэр къэсэIо. ТапэкIи ахэм ыкIи яунагъохэм тадеIэщт, заом щыIэ кIалэхэм тызэракъотыр ренэу зэхашIэным тыпылъыщт. ТичIыпIэгъухэм ыкIи зэрэхэгъэгоу дзэкIолIхэм яцыхьэ ателъыщт ыкIи ахэм адеIэщтых. ТекIоныгъэр къыдахыгъэу тикIалэхэм къагъэзэжьынэу тяжэ!», — къы­Iуагъ АР-м и ЛIышъхьэ.

Генерал-лейтенантэу Владимир Кочетковым ипсалъэ къыщыхигъэщыгъ Адыгеим икIы­гъэхэу хэушъхьафыкIыгъэ дзэ операцием хэлажьэхэрэм Iэпэ­Iэсэныгъэ инрэ чаныгъэрэ зэрахэлъыр.
«Украинэм зышъхьэ къыщызыIэтыгъэ фашизмэр зэхэкъутэгъэным Адыгэ Республикэм икIыгъэхэм апэрэ мафэм къыщегъэжьагъэу яIахьышхо ха­шIыхьэ. Заом лIыхъужъныгъэу щызэрахьагъэм пае ахэм ащыщыбэмэ къэралыгъо тынхэр къа­­фагъэшъошагъэх. Непэ шъуи­нэрылъэгъу хъугъэх Урысые Дзэм игъэхъагъэхэр», — къы­Iуагъ В. Кочетковым.
ХэушъхьафыкIыгъэ дзэ операцием хэлэжьэрэ дзэ къулыкъушIэхэм лIыхъужъныгъэу зэрахьагъэм пае мыщ тын лъапIэхэр щаратыжьыгъэх. Идзэ пшъэрылъ ыгъэцакIэзэ лIы­хъужъ­ныгъэу зэрихьагъэм пае Суворовым ыцIэкIэ щыт медалыр къыфагъэшъошагъ сержантэу ОсылI Аминэ. Жуковым ыцIэкIэ щыт медалыр афагъэшъошагъ старшэ лейтенантэу Иван Федоренкэм, прапорщикэу Андрей Сорокиным, младшэ сержантэу Алексей Ткаченкэм, ефрейторэу Александр Филь, рядовоеу Тополян Мурат.
Ащ нэужым хьакIэхэм нэIуасэ зафашIыгъ техникэу ыкIи Iашэу Гупчэм къыщагъэлъагъохэрэм. Ахэм ахэтыгъэх: нэмыц маши­нэу «Мардер», швед БМП-у Sv-90-р, украинскэ танкэу «Булат», британскэ БТР-у «Spar-tan», американскэ БМП-у М2 «Бредли», автомобилэу «Хамви», ук­раинскэ бронемашинэ-
хэр, джащ фэдэу автоматхэр, топхэр, шхончхэр, цIыф зэрымыс быбырэ аппарат лъэпкъ зэфэшъхьафхэр, нэмыкIхэри. Къэ­гъэлъэгъоным мэфи 4-м къыкIоцI, чъэпыогъум и 27-м нэс, Iоф ышIэщт.
Пресс-зэIукIэр
Ащ хэлэжьагъ Къыблэ дзэ округым дзэ-политикэ гъэIорышIэнымкIэ ипащэ игуадзэу, полковникэу Михаил Досуговыр.
— Украинскэ нацистхэм ыкIи НАТО-м къаIэкIахыгъэ техникэм икъэгъэлъэгъон Адыгеим щы­псэухэрэр тигуапэу къетэгъэ­благъэх. Мыр къызщыдгъэлъэгъуагъэхэмкIэ Мыекъуапэ я 6-рэ къалэ хъугъэ. Ащ ыпэкIэ Рос­тов-на-Дону, Владикавказ, Волгоград, Ставрополь, Красно-
дар тащыIагъ. Къэгъэлъэгъоным тех­никэ зэфэшъхьафэу 18 хэхьэ, ащ нэмыкIэу Iашэхэри хэтых. Мы мафэхэм цIыфхэм алъэгъун алъэкIыщт тиурысые дзэкIолIхэм, сержантхэм, офицерхэм яIоф­шIагъэхэм кIэухэу къахьырэр, ахэм ядзэ пшъэрылъхэр агъэцэкIэнхэм сыдигъуи зэрэфэхьазырхэр ыкIи къатекIонхэ зэрамылъэкIыщтыр, — хигъэунэфыкIыгъ Михаил Досуговым.

Полковникым къыхигъэщы­гъэхэм ащыщ хэушъхьафыкIыгъэу джыри зы лъэныкъо мы къэгъэлъэгъоным къызэрэдыхэ­лъытагъэр. Ар анахь цIыкIоу къекIолIэщт хьакIэхэм атегъэ­псыхьагъ, хэушъхьафыкIыгъэ нэ­гъунджэхэр аIулъхэу авиа­цием ипилотхэу заушэтын алъэ­кIыщт. ЦIыф зэрымыс быбырэ пкъыгъом гранатэр чIыгум къы­зэрэтыридзэрэр къарагъэлъэгъущт. ЫпэкIэ зыдэщыIэгъэхэ къалэхэм мы едзыгъор лъэшэу зэрашIогъэшIэгъоныгъэр зэхэщакIохэм къаIуагъ.
— МэфиплIым НАТО-м ибронетранспортерхэм, тыди апхырыкIырэ лъэныкъуабэм атегъэ­псыхьэгъэ автомобильхэм, лъэ­сыдзэм ыгъэфедэрэ машинэ­хэм, танкым, зэлъашIэрэ анахь лъэшэу алъытэрэ пистолет-автоматэу Джон Томпсон ыцIэ зыхьырэм цIыфхэр яплъынхэ алъэкIыщт. Шэмбэтым, тхьаумафэм «дзэкIолI пщэрыхьапIэм» Iоф ышIэщт, фаехэм дзэкIолI кашэм, хьалыгъу гъэжъэгъакIэм ыкIи щаим яIэшIугъэ ауплъэкIун алъэкIыщт, — къыIуагъ Михаил Досуговым.
Журналистхэм къатыгъэ упчIэхэми яджэуапхэр къыритыжьыгъ Къыблэ дзэ коим дзэ-политикэ гъэIорышIэнымкIэ ипащэ игуадзэ.
ЗэзэгъыныгъэкIэ къулыкъур зыхьыщтхэм яугъоин фэгъэзэгъэ кощырэ мобильнэ пунктми гупчэм Iоф щишIагъ.
АР-м и ЛIышъхьэ ипресс-къулыкъу
къытыгъэ къэбархэмкIэ Тхьаркъохъо Сафыет,
Iэшъынэ Сусан.