Студентхэр хэлэжьагъэх
Физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм къыдыхэлъытэгъэ фестиваль Мыекъуапэ щырагъэкIокIыгъ.
Студентхэр зыхэлэжьэгъэхэ Iофтхьабзэм кIэщакIо фэхъугъэх Адыгеим икъэлэ шъхьаIэ гъэсэныгъэмкIэ, физическэ культурэмкIэ ыкIи спортымкIэ икомитетхэр.
Мызыгъэгум команди 7-мэ заушэтыгъ. Мыекъуапэ дэт колледжхэм ыкIи техникумхэм, джащ фэдэу Адыгэ къэралыгъо ыкIи Мыекъопэ къэралыгъо технологическэ университетхэм ястудентхэм яухьазырыныгъэ къагъэлъэгъуагъ.
Унэе зэнэкъокъухэм очко анахьыбэ ащизыгъэкъугъэхэр Адыгэ къэралыгъо университетым истудентхэу Роберт Раджабовымрэ Екатерина Анохинамрэ. Мы апшъэрэ еджапIэм команднэ зэнэкъокъухэм текIоныгъэр къащыдихыгъ. Гурыт сэнэхьат зыщарагъэгъотырэ еджапIэхэм къахэщыгъ АКъУ-м и Мыекъопэ къэралыгъо гуманитар-техническэ колледж.