Бжыхьэ дзэ дэщыгъом къыдыхэлъытагъэу, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм яапэрэ куп ты­гъуасэ гъогу техьагъ.

Нэбгыри 5-р мэфэкI шIыкIэм тетэу агъэкIотагъэх. Ащ фэгъэ­хьыгъэ Iофтхьабзэу АР-м идзэ комиссариат щыкIуагъэм хэлэжьагъэх гъэцэкIэкIо хэбзэ къулыкъухэм, патриотическэ ыкIи общественнэ организа­циехэм ялIыкIохэр, ны-тыхэр, нэмыкIхэри.
АР-м идзэ комиссариат ипащэу Александр Авериным пэублэ псалъэ къышIызэ, къэзэрэугъоигъэхэм шIуфэс къарихыгъ ыкIи апэрэ дэщыгъом къыхиубытэхэрэр непэ зэрагъэкIуа­тэхэрэр къыхигъэщыгъ.
— Непэ гъогу техьэрэ ныбжьыкIэхэм зыкъышъуфэсэгъазэ, шэн-хабзэу тиIэхэм шъуа­дэмыхынэу, шъуищытхъу яжъугъэIонэу, тыкъэшъумыгъэу­кIы­тэжьынэу. Псаоу, узынчъэу шъуиунагъохэм къафэжъугъэзэ­жьынэу сышъуфэлъаIо, — хигъэунэфыкIыгъ А. Авериным.
Джащ фэдэу республикэм идзэ комиссар шъхьаIэ мыгъэ дащыщт ныбжьыкIэхэр плъыр-­стыр чIыпIэхэм зэрамыщэщтхэр ипсалъэ къыщыхигъэщыгъ.
Къыблэ дзэ шъолъырым изэ­хэт стратегическэ командование иинспектор куп хэтэу Александр Дорофеевым ныбжьыкIэхэм закъыфигъэзагъ.
— Урысыем и УIэшыгъэ КIуачIэхэм шъуахэтэу Хэгъэгур къэшъуухъумэным игъо къэ­сыгъ. Анахь пшъэдэкIыжь ин зыхэлъ едзыгъоу щыIэныгъэм къыха­фэхэрэм мыр ащыщ. Ащ унагъом, еджапIэм, шъущыфагъэ­хьазырыгъ. Дзэ къулыкъум зы­зэрыщышъумыдзыягъэр щытхъоу шъуфэсэлъэгъу. Дзэ сэнэ­хьатэу шъузфагъэзэщтхэр игъо­рыгъозэ шъуIэ къызэрижъугъэ­хьащтхэм, ухъумэкIо дэгъу къы­зэрэшъухэкIыщтым сицыхьэ телъ. Шъугъогу маф!, — къы­Iуагъ генерал-майорым.
ГущыIэр лъигъэкIотагъ АР-м заом ыкIи дзэ къулыкъум иветеранхэм я Совет итхьаматэу, подполковникэу Анатолий Вербицкэм.
— ХэушъхьафыкIыгъэ дзэ операциер зыщыкIорэ, къэралыгъуабэхэр Урысыем къызыщыпэуцугъэхэ лъэхъан мы­псынкIэу тызыхэтым хэгъэгум дзэ лъэш иIэн фае. ШъугукIи шъупсэкIи шъуфаеу дзэ Iофым зыфэжъугъасэмэ хъулъфыгъэ шъыпкъэ шъухэкIыщт. Шъо дзэ операцием шъуащэщтэп, ау зэрифэшъуашэу Хэгъэгур къэшъуухъумэнэу тыкъышъущэгугъы, — къыIуагъ ветераным.
Ны-тыхэм ацIэкIэ къэгущыIагъ Борис Хайбулиныр. НыбжьыкIэхэм къафаIогъэ гущы­Iэхэм ащ адыригъэштагъ, лIыгъэрэ щэIагъэрэ къызхагъэфэ­нэу, зэращыгугъыхэу къычIэ­кIыжьынхэу къафэлъэIуагъ.
Нэбгыритфэу гъогу техьа­гъэхэм ащыщэу Стефан Хайбулиным псэлъэ кIэкI къышIыгъ. Гъэсэпэтхыдэ гущыIэу нахьыжъхэм къараIуагъэхэр шъхьапэ зэрафэхъущтым ицыхьэ зэ­рэтелъыр ащ къыхигъэщыгъ. Щытхъу хэлъэу къулыкъур зэрахьыщтымкIэ къэзэрэугъои­гъэхэр къыгъэгугъагъэх.
ЗикIалэ дзэ къулыкъум зы­гъэкIотагъэхэм ащыщ Кощхьаблэ къикIыгъэ КIуращынэ Марзет.
— ТэгумэкIа пIомэ, ары. Тхьэм зэкIэ кIэлэцIыкIухэр гъогу мафэ тырегъахьэх, къеу­хъумэх. Псаоу, узынчъэу зэ­рэдэкIыхэрэм фэдэу къытфехьыжьых. Щытхъу хэлъэу, тыкъамыгъэукIытэжьэу къулыкъур къахьынэу тащэгугъы. СикIэлэ нахьыжъи дзэм къулыкъу щихьыгъ, къэкIожьыгъэу
Iоф ешIэ, джы нахьыкIэр тэ­гъэкIуа­тэ, — къыIуагъ ным.
Ащ икIалэу Алим гущыIэгъу тыфэхъугъ, дзэ къулыкъум зэ­рэфэхьазырыр къедгъэIотагъ.
— Сэ илъэс 22-рэ сыныбжь, РАНХиГС-м икъутамэу Ростов­на-Дону дэтым июридическэ факультет сыщеджагъ. Сыд фэ­дэрэ IофшIапIэ уIухьаным пае джы дзэм къулыкъур щыпхьы­гъэн фае. Теубытагъэ хэлъэу, сыгукIи сыфэхьазырэу къулыкъум сежьагъ, — хигъэунэ­фыкIыгъ кIэлэ ныбжьыкIэм.
Мыекъопэ гарнизоным иофицерхэм я Унэ къыгъэхьазырыгъэ концерт программэмкIэ зэхахьэр аухыгъ. Нэужым къэзэрэугъоигъэхэр щагум дэхьагъэх, гъогу техьэгъэ дзэкIолIхэр агъэкIотагъэх.
Шъугу къэдгъэкIыжьын, мыгъэрэ бжыхьэ дзэ дэщыгъом къыдыхэлъытагъэу Адыгеим щыщ ныбжьыкIэ 400 фэдизмэ къулыкъур ахьыщт, ахэр чIыпIэ зэфэшъхьафхэм ащэщтых. Тыгъуасэ гъогу техьагъэхэр Краснодар дэт дзэ частэу 33594-м къулыкъур щахьыщт.
Iэшъынэ Сусан.