Адыгэ кIэлэегъэджэ колледжым (училищым) ия 100-рэ илъэс къи­хьащт 2025-м игъэкIотыгъэу хи­гъэунэфыкIыщт. Сыд фэдэрэ уахъти лъытэныгъэшхо зыфашIырэ еджапIэм сыщеджэнэу синасып къыхьыгъ. 2004-рэ илъэсым мыщ сычIэхьагъ ыкIи кIэлэегъэджэ сэнэхьатыр щызэзгъэгъотыгъ.

Илъэс еджэгъухэр псынкIэу кIуагъэх, колледжыр къэтыухыгъ, ау а уахътэр егъашIэм тщымыгъупшэжьынэу тыгухэм къарынагъ. Сэнэхьатым ишъэфхэр къызIэкIэдгъэхьанхэм, ащ дакIоу къиныгъоу тызэуалIэхэрэр зэпытчынхэм тикIэлэегъаджэхэм тафагъэсагъ, цIыфыныгъэ тхэлъыным тыфапIугъ.
Анахьэу сыдигъуи сыгу илъыр ыкIи непэ апэу зигугъу къэсшIымэ сшIоигъор тикураторыгъэу Шэуджэн Светлан ары. ИлъэсиплIым къыкIоцI ар тянэм фэдэу къытхэтыгъ, игукIэгъурэ ицIыфыгъэрэ зэхэтшIагъ.
КIэлэегъэджэ шъыпкъэ тыхъуным, тисэнэхьат хэшIыкI фытиIэным тафагъэсагъ Нэгъой Галинэ, Владимир Шевченкэм, Ольга Борозинец, Валерия Лебедь, Наталья Гайворонскаям, Анжелика Ковязинам.
Шъхьащэ афэтэшIы илъэс пчъа­гъэ­м къытхэтыгъэхэ ыкIи щыIэныгъэм игъогу тытезыщэгъэхэ Татьяна Шангиреевам, Анзэрэкъо Светланэ, Пэнэшъу Марьянэ, АфэшIэгъо Асе, Юлия Шацкаям, Марьяна Михайловскаям, КIуае Любовь, Уджыхъу Динарэ, Шэртэнэ Хъанэ. Мы пстэуми апэ итыгъ а уахътэм колледжым ипэщагъэу Ацумыжъ Казбек.
Илъэсхэр лъэкIуатэх, ау колледжым чIахьэмэ зышIоигъохэм япчъагъэ къыщыкIэрэп, сыда пIомэ, ыпшъэкIэ къызэрэщыхэзгъэщыгъэу республикэм иеджэпIэ анахь лъэшхэм ащыщ.
Колледжым ия 100-рэ илъэсэу къэблагъэрэмкIэ ащ Iутхэм, студентхэм, ар къэзыухыгъэхэм сафэгушIо, тапэкIи гъэхъагъэхэр ашIынхэу, творческэ текIоныгъэхэм къафэкIонхэу, шIоу щыIэр къадэхъунэу афэсэIо. ТикIэлэегъэджэ гупсэхэм тафэраз!
Куних
(Саусэрыкъо) Росита.