ХьакIэщхэм ыкIи зекIоным епхыгъэ сатыум пылъэу Мыекъопэ рай­оным гъэбы­лъыгъэу Iоф щы­зы­шIэхэ-рэм ягъэунэфын чIыпIэ адми­нистрациер ыуж ихьагъ.

Ащ фэгъэхьыгъэ зэхэсыгъоу яIагъэм муниципальнэ образованием ипащэу Михаил Марьиным къызэрэщиIуагъэмкIэ, хьэкIэ унэхэм, нэмыкI гъэпсэфыпIэхэм ащыщыбэхэм гъэбылъыгъэу Iоф ашIэ, шапхъэхэр агъэцакIэхэрэп. Анахьэу Iэпэдэлэл ашIыхэрэм ащыщ хэкIым идэщын. Шапхъэхэр зыукъохэрэр къыхагъэщынхэм фэшI къулыкъу пстэумэ зэпхыныгъэ зэдыряIэу уплъэкIунхэр зэдызэхащэнхэу, псэуалъэхэр зэдауп­лъэкIунхэу район администрациер къя­джагъ.
— ЗекIоным епхыгъэ сатыум пы­лъ­хэм ащыщхэм шъолъыр операторым зэзэ­гъыныгъэ дамышIэу, цIыфхэм афагъэуцугъэ контейнерхэм пыдза­фэхэр аратакъох. Ащ ыпкъ къикIкIэ ахэм хэкIыр арызы мэхъу, площадкэ­хэр зэлъакIух, экологием зэрар къыфахьы. Шапхъэхэр зы­укъохэрэм якъычIэгъэщын епхыгъэ IофшIэнхэр зэхэтщэнхэу едгъэ­жьагъ. Арышъ, мы районым иадминистрации, нэмыкI къулыкъухэми Iоф адэтшIэнэу тыхьазыр, — къыIуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый.
КIэлэцIыкIухэм яIэшIагъэхэм тыкъяжэ
«ЭкоЦентрэм» зэхищэгъэ зэнэкъо­къоу «Выбирает детвора: жить без мусора» зыфиIорэм кIэлэцIыкIухэм ашIыгъэ сурэт­хэр къыхагъэлэжьэнхэу къетэгъэбла­гъэх. Шъуисабый сурэтшIынымкIэ сэнаущыгъэ хэлъэу, ар шIу елъэгъумэ, зыкъыгъэлъэ­гъон амал зэриIэщтым имызакъоу, тыкъэзыуцухьэрэ дунаим игъэ­къэбзэни иIахь хилъхьан ылъэкIыщт.
КIэлэцIыкIухэм хэкI зыщыщымыIэ дунаир зэралъэгъурэр къыраIотыкIынэу, тикъалэ, тичIыопс нахь къабзэ зэрэпшIын плъэкIыщтымкIэ гухэлъэу яIэхэмкIэ къыд­дэгощэнхэу зэнэкъокъум амал къа­реты.
«Чисто не там, где убирают, а там где не мусорят» зыфиIорэ лъэныкъом къэбзэныгъэм упылъыным мэхьанэу иIэм анаIэ тырязгъадзэрэу, экологиемкIэ культурэ зыгъэпсырэ плакатхэр щызэрагъэпшэщтых.
«Мой друг – регоператор» зыфиIорэм хэкIыр Iузыщырэ техникэм иводительхэм афэгъэхьыгъэ сурэтхэр щызэрагъэнэ­къокъущтых.
«Это вам не мусор!» ыцIэр ящэнэрэ лъэныкъом. Жъы хъугъэ пкъыгъохэр икIэрыкIэу бгъэфедэжьын, пыдзафэхэм икIэрыкIэу псэ къапыбгъэкIэжьын зэрэплъэкIыщтыр къэзыгъэлъэгъорэ сурэтхэр ары зыфэгъэхьыгъэр.
Зэнэкъокъур адрэхэм къахэзгъэщырэр блэкIыгъэ илъэсхэм къахэлэжьагъэхэм ясурэтхэр шIухьафтынхэм яшIын зэрэщыдгъэфедагъэхэр ары. Мэфэпчъхэм ыкIи блокнотхэм ахэр атетых. Мыгъэ къырахьылIэхэрэм анахь дэгъухэр бэу къыхаутыщтых. ЕтIанэ сурэтышIэ цIыкIухэм яIофшIагъэхэр гъомылапхъэхэр зыкIоцIыщыхьагъэхэм атыралъэгъощтых.
Чъэпыогъум и 31-м нэс сурэтхэм тыкъяжэ. ШIоигъоныгъэ зиIэхэм электроннэ почтэмкIэ къагъэхьын алъэкIыщт. Мары адресыр: conkurs01@clean-rf.ru.
«ЭкоЦентрэм» и Адыгэ шъолъыр къутамэ ипресс-къулыкъу.
Сурэтыр: «ЭкоЦентрэр».