БРИКС-м хэхьэрэ хэгъэгу­хэм яуниверситетхэм яапэ­рэ форум Москва дэт къэ­ралыгъо университетэу Ломоносовым ыцIэ зыхьырэм (МКъУ) бэмышIэу щыкIуагъ. Ащ изэхэщакIох ректорхэм я Урысые Союз, Урысые Федерацием гъэсэныгъэмрэ шIэныгъэмрэкIэ и Министерствэ, МКъУ-р. Ректорхэм я Урысые Союз ипрезидентэу, МКъУ-м ирек­торэу, академикэу Виктор Садовничэм форумым тхьамэтагъор щызэрихьагъ.

БРИКС-м хэхьэрэ хэгъэгухэм (Урысыем, Бразилием, Египет, Индием, Иран, Китаим, ОАЭ-м, Эфиопием, Къыб­лэ Африкэм), Белоруссием, Бахреин, Иорданием, Ирак, Йемен, Ливан, Ливием, Мавританием, Палестинэ, Судан яуниверситетхэм, янаучнэ учреждение пэрытхэм япэщэ ыкIи ялIыкIо 250-рэ фэдиз ащ хэлэжьагъ.
Хэгъэгу зэфэшъхьафхэм яапшъэрэ еджапIэхэм япащэхэм язэфэхьысыжьхэр форумым къыщашIыгъэх. Адыгэ къэралыгъо университетым иректорэу Мамый Даутэ хьисапым фэгъэхьыгъэ проектхэу зипэщэ апшъэрэ еджапIэм щагъэцакIэхэрэм, БРИКС-м хэхьэрэ хэгъэгухэм яапшъэрэ еджапIэхэр къыхэ­лажьэхэзэ, ахэр агъэцэкIэнхэ зэралъэкIыщт шIыкIэм къатегущыIагъ. Конференцием хэлэжьэрэ хэгъэгухэм ащагъэфедэн алъэкIыщтхэм ащ ахилъытагъ АКъУ-м и Кавказ хьисап гупчэ иIоф­тхьабзэхэр. Урысыем ишъо­лъыр 59-мэ, дунаим ихэгъэгу 20-мэ якIэлэеджакIохэр ахэм ахэлажьэх. Кавказ хьи­сап олимпиадэр, хьисапымкIэ олимпиадэу «Ассара» зыфиIоу пшъэшъэжъыехэм атегъэпсыхьагъэр, хьисап фестивальхэр зэрэзэхащэ­хэрэм, хьисап лабораториехэм Iоф зэрашIэрэм игъэкIотыгъэу АКъУ-м ипащэ къатегущыIагъ. Хьисапыр, искусствэр, зекIоныр зэзыпхырэ проектхэм шъхьафэу Мамый Даутэ къа­щыуцугъ. МыщкIэ зигугъу къэпшIы хъущтмэ зэу ащыщ проектэу «Тридцатка с математикой» зыфиIоу илъэси 2 хъугъэу АКъУ-м ыгъэцакIэрэр.
Адыгэ къэралыгъо университетым ипресс-къулыкъу