Адыгэ Республикэм и ­Комиссиеу терроризмэм пэшIуекIогъэным фэгъэзагъэм изимычэзыу зэхэсыгъо АР-м и ЛIышъхьэу КъумпIыл Мурат тыгъуасэ зэрищагъ. Терроризмэм щыухъумэгъэнхэм, цIыф ­лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьхэрэм зэпэу­цужьныгъэзэгурымыIоныгъэ къахэмыхъухьаным япхыгъэ Iофыгъо­хэм ащ щатегущыIа­гъэх.

Комиссием иIофшIэн хэлэжьагъэх АР-м и Къэра­лыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, министрэхэм я Кабинет и Тхьаматэу КIэрэщэ Анзаур, Прокуратурэм, хэгъэгу кIоцI IофхэмкIэ Министерствэм, ФСБ-м и ГъэIорышIапIэу Адыгэ Республикэм щыIэм, МЧС-м, джащ фэдэу уплъэ­кIокIо-лъыплъэкIо къулыкъу­хэм ялIыкIохэр, муниципалитетхэм япащэхэр.
Зэхэсыгъом къызэрэщыхагъэщыгъэмкIэ, мы лъэхъаным республикэм а лъэныкъомкIэ зыпкъитыныгъэ илъ, терроризмэм къыпкъырыкIырэ тхьа­мыкIагъохэр щыгъэзыегъэнхэмкIэ ищыкIэгъэ Iоф­тхьабзэхэр зэрахьэх. Терроризмэм пэшIуекIорэ Комиссием иаппарат ипащэу ЛIый Азэмат къызэриIуагъэмкIэ, Комиссием иIофышIэхэм муниципальнэ образованиехэм ащызэхэщэгъэ комиссиехэм яIофшIэн чIыпIэхэм ащауплъэкIугъ. Ахэм яIофшIэн зэрэгъэпсыгъэр ыкIи зэрэзэхэщагъэр шэпхъэ гъэнэфагъэу щыIэхэм адештэ ыкIи зыфэгъэхьыгъэр зигъо пшъэ­рылъхэр зэшIохыгъэнхэр ары. Муниципальнэ образованиехэм терроризмэм ылъэны­къокIэ яIофхэм язытет зыпкъ­итыныгъэ нэшанэ хэлъ. Муниципалитетхэм терроризмэм пэшIуекIорэ комиссиехэу ащызэхэщагъэхэм терроризмэм пэуцужьыгъэнымкIэ, ныбжьыкIэхэр гъогу пхэндж темыхьанхэмкIэ, цIыф лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьхэрэм зэгурыIоныгъэ азыфагу илъынымкIэ Iофы­гъуабэ къызщаIэтырэ Iэнэ хъураехэр зэхащэх. Ащ дакIоу комиссиехэм яIофшIэн щыкIагъэу фэхъу­хэрэри къыхагъэщынхэу, ахэр зэрэдагъэзыжьыщтхэм анаIэ тырагъэтынэу афагъэпытагъ. Мы лъэныкъомкIэ Мыекъуапэрэ Тэхъутэмыкъое районымрэ якомиссиехэм Iофэу ашIырэм осэшIу къафашIыгъ. ЫпэкIэ къахэфэгъэгъэ хэукъоныгъэхэу къыхагъэщыгъагъэхэр зэрэдагъэзыжьыщтхэм дэгъоу Iоф да­шIагъ, комиссиехэм яIофшIэн нахь тэрэзэу зэрэзэхащэщтым илъэныкъохэми зэдяусагъэх.
КъызэрэхагъэщыгъэмкIэ, хэу­шъхьафыкIыгъэ дзэ операциер зыщыкIорэ лъэхъаным шъо­лъырхэр зэкIэ терроризмэм пэуцужьынхэм фэхьазырынхэ фае. Анахьэу муниципальнэ лъэгапIэм тетэу Iофэу ашIэрэм мэхьэнэ ин иI, сыда пIомэ чIы­пIэ зыгъэIорышIэжьыным икъулыкъухэм яIофшIэн зэрэзэхащэрэм елъытыгъ терроризмэм пэшIуекIорэ комиссиехэу а му­нициапальнэ образованиехэм ащызэхэщагъэхэм яIофшIэни зэрэкIэкIыщтыр.

«Терроризмэм къыпкъырыкIырэ бзэджэшIагъэхэр щыгъэзыегъэнхэм пае IофшIэн гъэнэфагъэ ренэу гъэцэкIэгъэн фае. Мыщ дэжьым а комиссиехэм унашъоу аштэхэрэм зэкIэ муниципалитетхэм анаIэ ащытырагъэтын, хэбзэукъоныгъэу къыхагъэщыхэрэр дэгъэзы­жьыгъэ хъунхэм дэлэжьэнхэ, чIыпIэхэм а IофшIэныр нахьы­шIоу ащызэхэщэгъэным пае нахьыбэу IэпэIэсэныгъэрэ къулайныгъэрэ къызхафэхэрэм акIырыплъыхэзэ ашIын фае», — къыхигъэщыгъ КъумпIыл Мурат.
Ащ нэужым цIыф лъэпкъ зэ­фэшъхьафхэм къахэкIыгъэ­хэм-рэ дин зэмылIэужыгъохэр зы­лэжьхэрэмрэ непэкIэ язэфыщытыкIэхэр зэрэгъэпсыгъэхэм япхыгъэ Iофыгъохэм ахэплъагъэх. АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр лъэпкъ зэфэшъхьафхэм къа­хэкIыгъэхэм зэмызэгъыныгъэ къахэмытэджэнымкIэ, цIыфхэр жъугъэу зэхэтхэу хабзэр амыукъонымкIэ, гумэкIыгъоу къыкъокIыхэрэм ядэгъэзыжьын псынкIэу зэшIохыгъэ хъунымкIэ Iофтхьабзэу зэрахьэхэрэм афэгъэхьыгъэу къыIотагъ.
Ащ къызэрэхигъэщыгъэмкIэ, республикэм къулыкъу гъэнэфагъэхэр щызэхащагъэх, цIыф жъугъэхэм яшIошI къыдэлъытэгъэным пае зэIукIэхэр ашIых. Къэбар жъугъэм иамалхэм ренэу ащ фэгъэхьыгъэ тхыгъэ­хэр къарэхьэх, лъэпкъ зэгурыIоныгъэр къэухъумэгъэным фытегъэпсыхьэгъэ Iофтхьабзэхэр зэхащэх, экстремизмэмрэ тер­роризмэмрэ къапкъырыкIын ылъэкIыщт тхьамыкIагъохэм ащыухъумэгъэнхэм фэгъэхьыгъэ IофшIэн гъэнэфагъэ агъэцакIэ. Ахэм ахэлажьэх хэгъэгу кIоцI IофхэмкIэ Министерствэм и Гупчэу экстремизмэм пэшIуе­кIогъэным фытегъэпсыхьагъэм иIофышIэхэр, муниципалитетхэм, къоджэ псэупIэхэм япащэхэр, нахьыжъхэм я Совет хэтхэр, дин организациехэм ялIыкIохэр. ПIуныгъэ IофшIэным тегъэпсы­хьагъэу цIыф лъэпкъ зэфэшъхьафхэм зэгурыIоныгъэрэ зэзэ­гъыныгъэрэ азыфагу илъыным фэIорышIэрэ Iофтхьэбзэ зэфэшъхьафхэр зэшIуахых.
Ащ нэмыкIэу цIыфыгъэ шэпхъэ дахэхэм арыгъуазэхэу ныбжьыкIэхэр къэтэджынхэм тегъэпсыхьэгъэ IофшIэнри гъэцэкIагъэ мэхъу. Къэбар жъугъэм иамалхэм ялIыкIохэм IэпыIэгъу гъэнэфагъэ ятыгъэным пае экспертхэр рагъэблэгъагъэх, терроризмэм пэшIуекIогъэнымкIэ цIыфхэр анахь зыгъэ­гумэкIырэ лъэныкъохэм ягъэу­нэфынкIэ семинар заулэ зэхащэгъагъ. Шъолъырым иIофхэм язытет зэщызыгъэкъон зылъэ­кIыщт къэбар нэпцIхэр ахамытIупщыхьанхэм телъытэгъэ уплъэкIун-зэхэфынхэри ренэу зэхащэх.
ИкIэухым къызэрэхагъэщыгъэмкIэ, общественнэ-политикэ лъэныкъомкIэ ыкIи цIыф лъэпкъ зэфэшъхьафхэм къахэкIыгъэхэм азыфагу илъ зэфыщытыкIэхэм непэкIэ зыпкъитыныгъэ нэшанэ яI. Лъэпкъ зэфыщытыкIэхэм, экстремизмэм алъэныкъокIэ зэпэуцужьыныгъэ горэхэр щыIагъэхэу агъэунэфыгъэп.
Адыгеим и ЛIышъхьэ анаIэ тыраригъэдзагъ къулыкъухэмрэ ведомствэ зэфэшъхьафхэмрэ нахь шIуагъэ къатэу яIофшIэн зэхащэн зэрэфаем, ныбжьыкIэ­хэр я Хэгъэгу фэшъыпкъэхэу, шIу алъэгъоу пIугъэнхэм, ащкIэ псэупIэ пэпчъ шъхьэкIэфэшхо зыфашIырэ цIыфхэу адэсхэр гурыгъэIон, зэхэфын IофшIэным къыхагъэлажьэхэзэ ашIыным. Республикэм гъэпсын IофшIэным нахь зыщегъэушъомбгъугъэным пае амалэу щыIэр зэкIэ нахь икъоу гъэфедэгъэн зэ­рэфаем мэхьанэшхо зэриIэр Къум­пIыл Мурат къыхигъэщыгъ.
АР-м и ЛIышъхьэ ипресс-къулыкъу
къытыгъэ къэбархэмкIэ
Тхьаркъохъо Сафыет.