Урысыем ижурналистхэм я Союз и Краснодар шъолъыр къутамэ иправление итхьаматэу, гъэзетэу «АиФ — Юг» зыфиIорэм ире­дактор шъхьаIэу Шэуджэн Фатимэ игъонэмысэу идунай ыхъожьыгъ. Ащ илъэс 48-рэ ыныбжьыгъ.

Фатимэ еджапIэм джыри чIэ­сыгъ тхэныр икIасэу, икъо­джэгъухэм апае район гъэзетым къэбархэр къыригъахьэхэ зэхъум. Лъэустэнхьэблэ еджапIэр къызеухым Пшызэ къэралыгъо университетым журна­ли­стикэмкIэ ифакультет ар чIэ­хьагъ, ащ щеджэщтыгъ «АиФ — Югым» зэкIом. 2011-рэ илъэ­сым къыщыублагъэу ащ иредактор шъхьэIагъ. Гъэхъа­гъэу исэнэхьаткIэ ышIыгъэхэм апае 2021-рэ илъэсым Фатимэ Пшызэ шъолъырым изаслуженнэ журналистыцIэр къыфагъэшъошагъ.
Шэуджэн Фатимэ зышIэщтыгъэхэм зэкIэми лъэшэу агу къеуагъ игъонэмысэу дунаим зэрехыжьыгъэр. «Адыгэ м­а­къэм» щылажьэхэрэр ащ иIа­хьылхэм афэтхьаусыхэх, якъин адагощы. Тхьэм джэнэт лъапIэ къырет…
Фатимэ иIофшIэгъухэм, зы­шIэщтыгъэхэм ягукъэкIыжьхэр непэ тигъэзет къыхеутых.

Нэфынэр къытфыщинагъ…
Чъэпыогъум и 21-м, зэрэ­сихабзэу, дунэе къэбарыр зэ­рылъ хъытыум пчэдыжьыпэм сыхэхьагъ. Телефоныр къызэ­рэзэдэсхэу, къызэIусхыгъэ нэ­кIубгъом апэрэ сурэтэу ислъэгъуагъэр журналистэу Шэуджэн Фатим. СыдигъокIи зэрэщытэу, сэ сшIэрэ бзылъфыгъэ дэхэ сурэтыр нэгушIоу, нурэр ынэ-
мэ къакIихэу къысэплъыщтыгъ. Апэрэ гупшысэр — «сыд шъуIуа Фатимэ гъэшIэгъонэу къытхыгъэр ежьым исурэти тхыгъэм игъусэжьэу?». ИнэкIубгъо къыс­пэкIэфагъэу апэ къысшIошIыгъ, етIани зэрэтхэрэр сыгу рихьэу щытыти, сыдэгуIэзэ къэбарыр нахь игъэкIотыгъэу къызэIус­хыгъ.
«Къэбар гухэкI… Шэуджэн Фатимэ чIэтынагъ… Хьылъэу сымэджагъ…». Сыд мы сызаджэрэр? Ащ фэдэ мэхъуа? Сэ сшIэрэ Фатима мы гомыIу къэбарыр зыфэгъэхьыгъэр?
СшIошъ хъурэп сыджырэр. БэмышIэу тызэдэгущыIагъэуи къэсэшIэжьы, илъэсныкъо ыпэу телефонкIэ тызэфытеогъагъ. Зыгорэ илажьэми зыпари къы­хэмыщэу къыздэгущыIагъ, яни тIо-щэ мыгъэ гущыIэгъу сыфэ­хъоу къыхэкIыгъ. Фатимэ янэу ЦIыкIу Нэфсэт культурэм и Унэу Лъэустэнхьаблэ дэтым ипащ, къэбар дэй горэ щыIэу ащи къыIоу зэхэсхыгъэп. Ар сэIо шъхьаем, унагъом игууз шъхьарытIупщ ашIынэу фэмыягъэ­хэнкIи хъун.
Джы къызгурэIо а телефонкIэ сызыдэгущыIэм, IэкIыбым къикIыгъэ тилъэпкъэгъу хьакIэ­хэр сигъусэу Краснодар сыкIуа­гъэти, Фатимэ аIузгъэкIэнэу сы­фаеу шхапIэм къызесэгъэ­благъэм, къэмыкIошъунэу къызэрэсиIуагъэм иушъхьагъу.
Шэуджэн Фатимэ сызыкIыры­плъырэ сиIофшIэгъухэм ащы­щыгъ. ЗэрэсшIагъэр итхыгъэхэр ары. Краснодар къыщыдэкIырэ гъэзетэу «АиФ — Югым» ащ къыщыхиутыщтыгъэ къэбархэм сшIогъэшIэгъонэу салъыплъэщтыгъ. АпэрэмкIэ — адыгэ пшъашъ, ятIонэрэмкIэ — купкI хэлъэу, узIэпищэу, джырэ нэс умышIагъэ горэ къыпфызэIуихэу къатхэщтыгъ.
Икъэлэмыпэ бэрэ адыгэ тарихъым, культурэм, хабзэм анэсыщтыгъэ. Ащ фэдэу адыгэ­хэм афэгъэхьыгъэ тхыгъэхэр Адыгеим къыщыдэмыкIырэ гъэ­зетым къызэрихьэщтыгъэхэр сшIогъэшIэгъоныгъ. ЕтIани, Фатимэ журналист купэу зыхэт­хэм къахэлыдыкIыщтыгъ, итеп­лъэкIи, ифэпакIэкIи къахэщыщтыгъ. Дэхагъэ. Урыгушхонэу щытыгъ.
Фатимэ иаужырэ гъогу зэрэтехьажьыгъэр дунэе хъытыум къызэрэсигъэшIагъэм фэдэу интернетым нэIуасэ сыщыфэ­хъугъ. Илъэсищ ыпэкIэ ар къыс­фэтхагъ. Ащыгъум проектэу «Лъапсэ» тыдэлэжьэнэу тыублэгъагъ. Дэгъоу зэрэсшIэрэр, итхыгъэхэм сызэряджэрэр зе­сэIом, игопагъ.
ЛIэкъо къэбарэу тыугъоихэ­рэр Шэуджэн Фатимэ шIо­гъэшIэгъоныгъ, ежьыми илъэс заулэ хъугъэу «СилIэкъо тхыд» ыIоу едзыгъо шъхьаф гъэзетым къызэрэригъахьэрэр къысиIуагъ. Апэрэу телефонкIэ тызызэдэгущыIэм, умышIэрэмэ егъашIэм тызэрэшIэрэм фэдэу сыхьатитIо фэдизрэ тызэдэпсэлъагъ. Къэбарыбэ журналиститIум тыу­гъоигъ, тызэхъожьынэу икъун тшIэу къычIэкIыгъ. «Лъапсэр» тетхынэу зэрэхъугъэр Фатимэ шIогъэшIэгъонэу зэдэгущыIэгъу ин къыздишIи, зыщылажьэрэ «АиФ-м» къыригъэхьэгъагъ. Сэ ежь илIэкъо тхыдэу ыугъоижьыгъэхэр къезгъэIотэнхэу Лъэустэнхьаблэ фэгъэхьыгъэ «Лъа­псэр» тесхы зэхъум, яунагъо зыIузгъэкIэгъагъ, яунэ сыкIо­гъагъ. Анахь шIолъапIэу къы­гъо­тыгъэ хъишъэр ащыгъум къыддигощыгъагъ. Янэ зипхъу­хэу Бэчмыкъохэм ар афэгъэ­хьыгъагъ. Ахэр хьакурынэхьаблэ ЛIышэхэм къахэкIыгъэхэу хъарзынэщым Фатимэ къыхигъотагъэу щытыгъ. Джащ фэдэу зыщыщ Лъэустэнхьаблэ итарихъ упкIэпкIыгъэу къытфиIотэгъагъ. Фатимэ игущыIэхэр уасэ зыфэшIыгъуаехэу джы мары тэри тихъарзынэщ къыхэнагъэх.
Шэуджэн Фатимэ дахэу къыс­фэтхагъ, сикъэбар, сиIофшIэн гъэзетым къыщыхиутыгъ. Ежьыр мэпсэуфэ сэ ащ фэдэу сыфэ­тхэнэу игъо сифагъэп. Мы къэ­бар гухэкIыр зызэ­хэсэхым, апэ си­гъэкъыгъ, ау къы­кIэлъыкIорэ гукъэ­кIэу сыкъыфатхэ сшIоигъо сыхъугъ. «Адыгэ макъэм» еджэ­хэ­рэм адыгэ журналист чаныр зэ­рэ­псэугъэр, исэ­нэ­хьат фаблэу, ыгу етыгъэу зэрэлэ­жьа­гъэр афэсIотэ­нэу сыфэягъ.
Илъэс 48-рэ. Сыдэу мэкIэ дэд къыгъэшIагъэр мы ­адыгэ бзылъфыгъэ Iушым! Мыщ фэди­зэу псынкIэу къызкIэнэфыгъэр мырэущтэу псын­кIэу тхыдэм къызэрэхэнэщтым паещтын.
Илъэс 30-рэ икIэ­сэ сэнэхатым ар ры­лэжьагъ.
«Къытхахьэрэм — упсэ къэ­гъэлъагъу.
ТхэкIыжьырэм — нэфынэр къыщын» ыIуагъ зэлъашIэрэ тхакIоу Къуекъо Налбый.
Шэуджэн Фатимэ ар дэгъоу ыгъэцэкIагъ. Ыпси къытхилъ­хьагъ, инэфыни къытфыщинагъ. Тхьэм джэнэт лъапIэр къырет.
ТIэшъу Светлан.

Къэбар гухэкI къытэнэсыгъ, тилъэпкъэгъоу, «АиФ — Югым» иредактор шъхьаIэу Шэуджэн Фатимэ дунаим ехыжьыгъ.
Фатимэ цIыфышIоу, гушIу­бзыоу, ынэгу зэIухыгъэу, сэнэхьатэу къыхихыгъагъэм фэIэзэ дэдэу сыгу къинагъ. ­Илъэпкъ шIу дэдэ ылъэгъущтыгъ, Пшызэ шъолъырым ис цIыф нэбгырэ миллион пчъагъэхэм адыгэхэм яхьылIэгъэ шIэныгъэхэр алъигъэIэсыным пылъыгъ. Темэ зэ­­фэшъхьафхэм атегущыIэщтыгъ, ау гухахъо нахь зыхигъуатэщтыгъэу сшIошIырэр иадыгэ лъэпкъ фэгъэхьыгъэ тхыгъэхэр ары. Ащ гущыIэгъу фэхъугъагъэх зэлъашIэрэ адыгэ тхакIоу МэщбэшIэ Исхьакъ, филологие шIэныгъэхэмкIэ кандидатэу Кушъу Сулет, «Налмэсым» ихудожественнэ пащэу Хъоджэе Аслъан, КъТРК-м ижурналистэу ТIэшъу Светланэ, нэмыкIхэри. Сэри а сатырым сыщыщ, Фатимэрэ сэрырэ 2021-рэ илъэсым нэIуасэ тызэфэ­хъуи, нэужым тIогъогогъо сэщ пае тхэнэу хъугъагъэ.
Джыри итхыгъэхэм изы чIыпIэ щаубыты адэбзым фэгъэхьыгъэхэм. Зы илъэсым къыкIоцI зытIо-зыщэ уз Iаем тегущыIэщтыгъ. КъыхиутырэмкIэ цIыфмэ агу амыгъэкIодынэу, узым Iэзэгъу зэриIэр ыкIи цIыфхэр зэрэхъужьыхэрэр къариIощтыгъ. А тхыгъэ закъохэмкIи цIыфмэ агу къыдищаещтыгъ ыкIи псэпэшхо ыгъахъэщтыгъ.
Фатимэ гухэлъышIоу бэ иIагъэр, ау игъонэмысэу тхэкIы­жьыгъ. Сыгу хэкIэу сIомэ, мэкIаIо, ау гущыIэ нахь лъэш къысфэгъотырэп. Зэрэадыгэ лъэпкъэу чIэнэгъэшхо тиI, арышъ, Бэчмыкъохэми Шэу­джэнхэми тафэтхьаусыхэ. Фатимэ зыдэкIожьыгъэм щышIу хъунэу, джэнэтым щыщ хъунэу Алахьым телъэIу!
Барцо Рустам.

СищыIэныгъэ Фатимэ сыщыIукIэнэу синасып къыхьыгъ. ТизэIукIэгъу гукъэкIыжь фабэхэр къысфигъэнагъэх. Iофым хэ­шIыкI фызиIэ зэдэгущыIэгъу зэкIэми апэу къыздэзышIыгъэр ары. Исэнэхьат дэгъоу ышIэщтыгъ, зыдэгущыIэрэм лъэшэу ынаIэ тетэу, лъытэныгъэ фишIэу щытыгъ, сэмэркъэу дахэ хэлъыгъ, цIыф псынкIагъ. ЩыIэныгъэр шIу ылъэгъущтыгъ, ащ фаблэщтыгъ, ылъэгъурэ пстэуми гухахъо ахигъуатэщтыгъ.
Иунагъо, иIахьылхэм сыгу къыздеIэу сафэтхьаусыхэ, Тхьэм джэнэт къырет.
Кушъу Сулет.