Урысые Федерацием и Президент и УказкIэ Джэджэ районым щыпсэурэ зэшъхьэгъусэхэу Шека Сергей Иван ыкъомрэ Наталья Иван ыпхъумрэ унагъом игъэпытэнкIэ ыкIи кIэлэцIыкIухэм япIункIэ гъэхъэгъэшхоу яIэхэм апае орденэу «Родительская слава» зыфиIорэм имедаль къафагъэшъошагъ.

Адыгеим и ЛIышъхьэу КъумпIыл Мурат а тын лъапIэм пае ителеграм-каналкIэ зэшъхьэгъусэхэм афэгушIуагъ.
— Ны-тыхэр щысэ афэхъухэзэ, кIэлэ­цIыкIухэр спортым хащэх, гъэсэныгъэ зэрагъэгъотынымкIэ IэпыIэгъу афэхъух, унэгъо шэн-хабзэхэр къаухъумэнхэм фагъасэх. 2018-рэ илъэсым Урысые зэнэкъокъоу «Илъэсым иунагъу» зыфиIорэм илъэныкъоу «Сабыибэ зэрыс унагъор» зыфиIорэмкIэ муниципальнэ чэзыум текIоныгъэр къыщыдахыгъ. Наталья Иван ыпхъум Щытхъу дипломэу «Материнская слава» зыфиIорэр къыфагъэшъошагъ. ЦIыфхэр ары тихэгъэгу ибаиныгъэ шъхьаIэр. Унагъохэм, ныхэм ыкIи кIэлэцIыкIухэм IэпыIэгъу ятыгъэным федеральнэ пащэхэм непэ лъэшэу анаIэ тырагъэты. Тэри Урысые Iофтхьабзэу IэпыIэгъу ятыгъэным фытегъэпсыхьагъэ­хэр зэкIэ республикэм щытэгъэцакIэх, шъолъыр фэгъэкIотэныгъэ заули а лъэ­ныкъомкIэ щыI. Сабыибэ зэрыс унэгъо насыпышIохэр нахьыбэ хъунхэм пае тапэкIи тфэлъэкIыщтыр зэкIэ Адыгеим щызэшIотхыщт, — къытхыгъ респуб­ликэм и ЛIышъхьэ.
Илъэс 30 хъугъэ Шека зэшъхьэгъусэхэр зызэдыщыIэхэр, ахэм кIэлэцIыкIуи 6 апIу. Наталья Иван ыпхъум Джаджэм дэт гурыт еджапIэу N 2-м биологиемкIэ щырегъаджэх, Сергей Иван ыкъом информационнэ технологиехэм алъэныкъо­кIэ Iоф ешIэ. Къо нахьыжъитIумэ Iоф ашIэ, нахьыкIитIумрэ пшъэшъэжъыемрэ еджапIэм чIэсых, анахьыкIэ шъэожъыер кIэлэцIыкIу IыгъыпIэм ащэ.