Кощхьэблэ районым ит пстэупIэу Майскэм модельнэ тхылъеджэпIакIэр зыщылажьэрэр мазэм кIахьэ. Ащ икъызэIухын цIыфхэмкIэ аужырэ уахътэм ихъугъэ-шIэгъэ ин хъугъэ.

ЧъыIэу, IыгъэкIэу щытыгъэ тхылъеджапIэр джы культурэм и Унэ зэтегъэпсыхьагъэ хэт, къатитIу еубыты. Нэфын, фабэ,шъхьадж зыдэлэжьэщтым елъытыгъэу чIыпIэ-чIыпIэу зэтеутыгъ, анахь шъхьаIэр — уеджэным, шIэныгъакIэхэр зэб­гъэгъотынхэм фытегъэпсы­хьагъ, ахэм уафещэ. Джырэ технологиякIэхэр щыгъэфеда­гъэх, компьютерхэр, проектор­хэр чIэтых, дунэе хъытыум ущы­хэхьашъу, тхылъ зэмылIэ­ужыгъуабэ чIэлъ. ГъэкIэжьыным дакIоу ахэм япчъагъи хагъэ­хъуагъ: тхылъ мин 13 мэхъу, 2700-р кIэу къаратыгъ.
Татьяна Чикаловар — псэупIэу Майскэм дэт модельнэ тхылъеджапIэм ипащ:
— ТхылъеджапIэр цIыфхэм лъэшэу агу рехьы, ягуапэу, идэхагъэрэ иIэрыфэгъугъэрэ кIэгушIухэзэ ини цIыкIуи къэкIох. КIэлэцIыкIухэр жъугъэу зычIэс­хэрэр еджэгъу ужыр ары. Компьютерхэр нахь къыхахы, десэхэр щашIыжьых. Инхэри ренэу тихьакIэх. Сэри сигуап мыщ фэдэ чIыпIэ дахэм сыщылэжьэныр.
Татьяна Чикаловар тхылъ­еджапIэм ипащ ыкIи иIофышIэ закъу. ИщыIэныгъэ зыщыкIогъэ лэжьапIэм илъэхъанышIухэри икъиныгъохэри къешIэжьых. 1994-рэ илъэсым къыщегъэжьагъэу Iут. КультурэмкIэ институ­тэу Краснодар дэтыр тхылъеджэпIэ сэнэхьатымкIэ къыухи къыгъэзэжьыгъагъэми, ащ дэ­жьым тхылъеджапIэм чIыпIэ нэкI иIагъэп. Арыти, тхьэкIакIоу Iухьэгъагъ. Ащ ыуж библиотекарь ашIыгъ, 1999-рэ илъэсым къыщегъэжьагъэу тхылъеджапIэм ипащ.
— Ары, ащ дэжьым типсэупIэ заводэу дэтыгъэм еджакIо сигъэкIогъагъ, стипендии къыситызэ сыригъэджэгъагъ. Ау къызысэгъэзэжьым, сисэнэхьаткIэ сыIухьэшъугъагъэп. Ащ дэжьым Майскэм щыжъотыгъ, цIыфыбэ дэсыгъ. Сэ литературэр лъэшэу сикIас, сиIофшIэн шIу сэлъэгъу, — еIо Татьяна Чикаловам.

«Библиоблогер» зыфиIорэ творческэ студиер тхылъеджапIэм джы хэт. Ащ ишIуагъэкIэ кIэлэцIыкIухэр егъэджэнхэм ахэлэжьэнхэ алъэкIыщт, технологиякIэхэм зафагъэсэщт, проект гъэшIэгъонэу агъэхьазыр­хэрэр агъэцэкIэшъущтых. ШэпхъэшIухэм адиштэрэ дунэе хъытыу псынкIэу къекIуалIэрэм ихьатыркIэ шIоигъоныгъэ зиIэхэр Лъэпкъ тхылъеджапIэм инэкIубгъо зыфэе тхылъым щеджэ­шъущтых.
Шъугу къэдгъэкIыжьын, лъэпкъ проектэу «Культурэм» къыды­хэлъытагъэу модельнэ тхылъеджапIэр Майскэм иIэ хъугъэ. Ащ фэдэхэр зыщагъэпсыщтхэм якъыхэхынкIэ зэнэкъокъоу блэкIыгъэ 2023-рэ илъэсым рекIокIыгъэм къыщыдихыгъэ текIоныгъэм ар ихьатыр. Пстэ­умкIи, ишIыни изэтегъэпсыхьани къэралыгъо ыкIи республикэ бюджетхэм къахэхыгъэ сомэ миллионий пэIуагъэхьагъ.
Майскэм бэкIэ ыуж къимынэу мыщ фэдэ модельнэ тхылъ­еджапIэ къыщызэIуахыгъ Красногвардейскэ районым ит псэупIэу Улапэ. Къоджэ тхылъеджапIэщтыгъэр къэмышIэ­жьы­нэу зэхъокIыгъ: джырэ шап­хъэхэм адиштэу зэтырагъэ­псыхьагъ ыкIи нахь Iэрыфэгъу хъугъэ. ПстэумкIи квадрат метрэ 255,6-р зэлъеубыты, къа­титIоу зэтет. ШIэныгъэхэм язэгъэгъотынкIэ амалэу иIэ хъугъэмкIэ къэлэ тхылъеджапIэхэм джы янэкъокъун ылъэ­кIыщт.
Лъэпкъ проектэу «Культурэр» зыфиIорэм къыдыхэлъытэгъэ Iофтхьабзэу «Культурная среда» зыцIэм ишIуагъэкIэ 2019-рэ илъэсым къыщегъэжьагъэу модельнэ тхылъеджэпIэ 16 Адыгеим иIэ хъугъэ. Ахэм япчъагъэ джыри хэхъощт, мы лъэныкъом­кIэ IофшIэныр лъагъэкIуатэ.
Анцокъо Ирин.
Сурэтхэр: авторыр, АР-м культурэмкIэ и Министерств.