ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мамырыкъом» дэгъэшI заводышхоу ыгъэпсырэм Адыгеим и ЛIышъхьэу КъумпIыл Мурат щыIагъ. Ащ игъусагъэх АР-м и ЛIышъхьэрэ министрэхэм я Кабинетрэ я Администрацие ипащэ игуадзэу Къонэ Заур, мэкъу-мэщымкIэ министрэу Къуанэ Анзаур, муниципальнэ образованиеу «Кощхьэблэ районым» ипащэу Хьамырзэ Заур.

Шъугу къэтэгъэкIыжьы: пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мамырыкъор» Къыблэ федеральнэ шъолъырым дагъэ къыщызышIыхэрэм анахь пэрытхэм ащыщ. Кощхьэблэ районымкIэ къуаджэу Еджэркъуае предприятие шъхьаIэр дэт. 2021-рэ илъэсым къыщегъэжьагъэу псэупIэу Дружбэм унэе предприятиеу «Р.Д. Мамырыкъор» зыфиIорэм заводыкIэр щешIы. Ащ изэхэщакIор ыкIи ипащэр унэе предпринимателэу Мамырыкъо Руслъан. Ащ республикэм и ЛIышъхьэ къыфиIотагъ инвестиционнэ проектыкIэр зэрагъэцэкIэщтыр ыкIи пшъэрылъэу яIэхэмрэ производствэм хэхъоныгъэ ышIынымкIэ амалэу щыIэхэмрэ афэгъэ­хьыгъэу.
Инвесторым къызэрэхигъэщыгъэмкIэ, чэщ-зымафэм тыгъэгъэзэ чылэпхъэ тонн 500 – 600 фэдиз дэгъэшI заводым егъэ­федэ, технологиякIэхэм атегъэпсыхьагъэу ар ашIы. Квадрат метрэ мин 60 фэдиз зыубытырэ чIыпIэм цеххэр, гъэтIылъыпIэхэр, офисхэр ыкIи щэчалъэхэр щагъэуцугъэх. Чылапхъэр зэрэзэха­дзыщт, зэрагъэушкъоищт Iэмэ-псымэхэри къащэфыгъэх. Зэхэубытагъэу инвестициехэр сомэ миллиард 1,5-рэ фэдиз хъущтых. 2025-рэ илъэсым ыкIэм ехъу­лIэу псэолъэшIыныр аухынэу мэгугъэх.
Илъэсым исыд фэдэрэ уахъти ащ Iоф ышIэщт: чылапхъэр къащэфыщт, чIыпIэ гъэнэфагъэм агъэтIылъыщт, дагъэ зыхашIыкIырэ культурэхэм ячылапхъэхэм адэлэжьэщтых, дагъэр къыдагъэкIыщт, IуагъэкIыщт, пыдзафэу фэхъурэм мэку­хэр хашIыкIыщт. Ащ къыготыщт гупчэшхоу цIыфхэм зызщагъэпсэфын, яуахътэ тынчэу зыщагъэкIон алъэкIыщтыр, заводым къыдигъэкIырэ дагъэри зыщы­Iуа­гъэкIыщт чIыпIэхэри гъэнэфагъэх. Предприятием IофшIэпIэ чIыпIэ 500 фэдиз иIэщт, лэжьапкIэр иныщт.
Адыгеим и ЛIышъхьэ республикэм иэкономикэкIэ ыкIи исоциальнэ лъэныкъокIэ проектым мэхьанэшхо зэриIэр къыхигъэщыгъ. Ащ къызэриIуагъэмкIэ, предприятием шIуагъэ къэзытырэ Iоф­шIэнэу ыгъэцэкIагъэм, ренэу гъэ­кIэ­жьын Iофтхьабзэхэм зэрадэлэжьагъэм, къэралыгъо IэпыIэгъум иамалхэр икъоу къызэрэзыфигъэфедагъэхэм къакIэ­кIуагъ производствакIэр. 2019-рэ илъэсым къыщыублагъэу «Мамырыкъом» фэгъэ­кIотэныгъэ зыхэлъ чIыфэхэм атетэу чылапхъэхэр къызIэкIегъахьэх.
«Масло Мамруковское» зыфиIорэ тамыгъэр тетэу илъэс 30-м ехъугъ дагъэр мы компанием къызыдигъэкIырэр. НепэкIэ ар уахътэм диштэрэ завод, чэщ-зымафэм тыгъэгъэзэ тонн 500 егъэфедэ, а уахътэм дэгъэ тонн 220-рэ фэдиз къыдегъэкIы. Технологиер нахьышIу шIыгъэным ренэу компаниер дэлажьэ, цIыфхэми дэгъэ дэгъу аIэкIегъахьэ. 2022-рэ илъэсым тыгъэгъэзэ дэгъэ тонн мин 30,45-рэ фэдиз фирмэм къыдигъэкIыгъ, ащ дакIоу мэкухэ тонн мин 29,1-рэ аIэкIигъэхьагъ. 2023-рэ илъэсым дагъэу къыдигъэкIыгъэр тонн мин 34,9-м нэсыгъ, мэкухэр – тонн мин 35,8-м. Мамырыкъо Руслъан къызэриIуа­гъэмкIэ, Урысыем ичIыпIэ зэфэшъхьафыбэмэ ипродукцие аIэкIегъахьэ. Ахэм ащыщых Китаир, Вьетнам, Катар, Зэхэт Араб Эмиратхэр, Армениер, Азербай­джан, Киргизиер, Грузиер ыкIи Ливиер. Ащ дакIоу предприятиер шIушIэным пылъ, Урысыем ишъолъырыкIэхэм ипродукцие аIэкIегъахьэ, гъэпсэфыгъо ма­фэхэм зэхащэрэ ермэлыкъхэми ахэлажьэ.
КъумпIыл Мурат къызэриIуагъэмкIэ, хэгъэгум къыщыдагъэкIыхэрэм нахь заушъомбгъуным пае непэ къэралыгъом амалышIухэр арегъэгъотых. Республикэм ихэбзэ къулыкъухэри езыгъэжьэгъакIэ­хэм ямызакъоу, пэрыт предприятиехэми IэпыIэгъу аритыным ренэу фэхьазырых. Анахьэу аграрнэ лъэныкъор ары ар зыфэгъэхьыгъэр. Нафэу зэрэщытымкIэ, Адыгеим иэкономикэ пэрытныгъэр ащ щиIыгъ.
«Адыгеир адыгэ къое закъор арэп цIэрыIо зышIыгъэр. Ащ нэмыкIэу гъомылэпхъэ дэгъухэри къыдэтэгъэкIых. Дагъэу «Мамруковское» зыфиIорэр тиреспубликэ ыцIэ чыжьэу зыгъэIугъэхэм ащыщ хъугъэ ыкIи къалэжьыгъэ шъыпкъэу ахэм тарэгушхо, тишIуагъи ядгъэ­кIыщт. Хэгъэгум итучан зэфэшъхьафхэм типродукцие атетлъэгъоныр гуапэ тщэ­хъу, тегъэгушIо. Дагъэр къыдэзыгъэ­кIыхэрэм ренэу анаIэ зытырагъэтырэр ащ идэгъугъэ къыкIырамыгъэчыныр ары. Компанием социальнэ пшъэдэкIыжь ехьы, IофшIэпIэ чIыпIакIэхэри зэхещэх. Ащ фэдэ IофтхьэбзэшIухэм адетэгъаштэ, ащ фэдэ пэрыт предприятиехэм IэпыIэгъоу яттырэри лъыдгъэкIотэщт. Респуб­ликэм лъэныкъо зэфэшъхьафхэмкIэ хэхъоныгъэ ышIыным ахэр икIэщакIох, продукцие дэгъур аIэкIэгъэхьэгъэным лъэпсэшIу фашIы», — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.