АР-м икъэралыгъо программэу IэкIыбым щыпсэурэ тилъэпкъэгъоу ежь ишIоигъоныгъэкIэ Адыгеим къэзыгъэзэжьыхэрэм IэпыIэгъу ятыгъэным фэгъэхьыгъэм ипхырыщын фэгъэзэгъэ межведомственнэ комиссием зэхэсыгъо иIагъ.

Ащ къызэрэщаIуагъэмкIэ, 2019 — 2026-рэ илъэсхэм ателъытэгъэ программэм игъэцэкIэн мыгъи лъагъэкIуатэ. 2024-м пыкIыгъэ мэзи 9-р пштэмэ, АР-м хэ­гъэгу кIоцI IофхэмкIэ и Министерствэ кощын IофхэмкIэ и ГъэIорышIапIэ иучет нэбгырэ 36-рэ хигъэуцуагъ.
АР-м лъэпкъ IофхэмкIэ, IэкIыб къэрал­хэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет мы къэралыгъо программэм хэлэжьэн зылъэкIыщтхэм якъыхэхын фэгъэзагъэу комиссие иI. Илъэсэу тызхэтым ищылэ мазэ къыщыублагъэу ар гъогогъу 11-рэ зэхэсыгъ, лъэIу тхылъ 25-мэ ахэплъагъ, 14-мэ адырагъэштагъ. Программэм къыдыхэлъытэгъэ шапхъэхэм адиштэу тхылъхэр къызэрамыгъэхьазырыгъэхэм ыпкъ къи­кIэу 11-р зэкIагъэкIожьыгъ.
Джащ фэдэу зэхэсыгъом къызэрэщыхагъэщыгъэмкIэ, программэм хэлажьэ зышIоигъоу тхылъхэр къэзытыхэрэм янахьыбэр Тыркуер, Абхъазыр, Германиер, Иорданиер, Казахстан, Туркменистан, Таджикистан, Киргизиер, Эстониер ары къызэрыкIыгъэхэр. Нахьыбэу тилъэп­къэгъухэм псэупIэу къыхахыхэрэр къалэу Мыекъуапэрэ Тэхъутэмыкъое районымрэ.

УФ-м игражданствэ къызэратырэм хэгъэгум исхэм яфитыныгъэхэмрэ япшъэ­рылъхэмрэ иIэ мэхъух. Джащ фэдэу ар УФ-м ыкIи АР-м якъэралыгъо программэу псэукIэ амалхэр нахьышIу шIыгъэнхэм фытегъэпсыхьагъэхэм ахэлэжьэн фит.
IэкIыбым щыпсэурэ тилъэпкъэгъоу ежь ишIоигъоныгъэкIэ Адыгеим къэзыгъэзэжьхэрэм IэпыIэгъу ятыгъэным фэгъэхьыгъэ программэм хэлэжьагъэхэмрэ ахэм яуна­гъохэм арысхэмрэ гъэсэныгъэ ыкIи медицинэ фэIо-фашIэхэри къызIэкIагъэ­хьанхэ алъэкIыщт.
А зэпстэумэ анэмыкIэу, Адыгеим ихэбзэ гъэцэкIэкIо къулыкъухэм къэкощыжьыгъэхэр щыIэныгъэм хэгъэгъозэжьыгъэнхэм ылъэныкъокIэ общественнэ организациехэм Iоф адашIэ. Ахэр къыхагъэлажьэхэзэ, къэкIожьыгъэ тилъэпкъэ­гъухэр общественнэ ыкIи культурнэ, мэфэкI ыкIи творческэ Iофтхьабзэхэм къарагъэблагъэх.

­