Чъэпыогъум и 20-р — гъогу хъызмэтым иIофышIэ и Маф
Адыгэ Республикэм игъогу хъызмэт иIофышIэхэу, иветеранхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIымкIэ тышъуфэгушIо!
Шъолъырхэм яэкономикэ зыкъегъэIэтыгъэнымкIэ, инвестициехэр нахьыбэу къахалъхьанхэмкIэ, цIыфхэм ящыIэкIэ-псэукIэ нахьышIу шIыгъэнымкIэ джырэ шапхъэхэм адиштэу зэтегъэпсыхьэгъэ автомобиль гъогухэм мэхьанэшхо яI.
IэпэIэсэныгъэ зыхэлъ гъогушIхэм япшъэрылъ шъхьаIэр автомобиль гъогухэр щынэгъончъэнхэр, ахэр икъоу зэтегъэпсыхьэгъэнхэр ары.
Гъогу хъызмэтым иIофышIэ чанхэм шэпхъакIэхэм адиштэрэ автомобиль гъогухэр, инженер псэуалъэхэр Адыгэ Республикэм непэ щагъэпсых, автомобиль бащэ гъогухэм ащымызекIонымкIэ, общественнэ транспортым нахь дэгъоу Iоф ышIэнымкIэ ищыкIэгъэ амалхэр зэрахьэх.
Урысые Федерацием и Президентэу Владимир Путиныр зикIэщэкIо лъэпкъ проектэу «Щынэгъончъэ ыкIи шэпхъэшIухэм адиштэгъэ гъогухэр» зыфиIорэм ишIуагъэкIэ Адыгеим зэхъокIыныгъэшIухэр фэхъух. 2024-рэ илъэсымкIэ планыр ипIалъэм къыпэу, илъэскIэ ыпэ итхэу республикэм непэ щагъэцакIэ. 2019-рэ илъэсым къыщегъэжьагъэу 2023-рэ илъэсым нэс зэхэубытагъэу километрэ 450-м ехъу зикIыхьэгъэ гъогу 337-рэ Адыгеим щатыгъ.
Гъогу хъызмэтым иIофышIэхэр хьалэлэу зэрэлажьэхэрэм, IофшIэнымкIэ хэбзэшIоу щыIэ хъугъэхэм зэрарыгъуазэхэрэм тицыхьэ тырагъэлъы республикэм ыпашъхьэ ит зигъо Iофыгъохэм язэшIохын яшъыпкъэу ахэр тапэкIи зэрэдэлэжьэщтхэм, республикэм игъогу хъызмэт лъэгэпIакIэхэм зэрэнагъэсыщтым.
Ныбджэгъу лъапIэхэр, гуетыныгъэ шъухэлъэу шъузэрэлажьэрэм, Адыгеим ихэхъоныгъэ шъуиIахьышIу зэрэхэшъушIыхьэрэм афэшI тызэрэшъуфэразэр къэтэIо. Гъогу хъызмэтым иветеранхэу зишIэныгъэкIи, зиIофшIакIэкIи специалист ныбжьыкIэхэм адэгуащэхэрэм «тхьашъуегъэпсэушхо» ятэIо.
Псауныгъэ пытэ, щыIэкIэ-псэукIэ дэгъу шъуиIэнэу, шIуагъэ къытэу тапэкIи Адыгеимрэ Урысыемрэ шъуафэлэжьэнэу тышъуфэлъаIо!
Адыгэ Республикэм и ЛIышъхьэу, Урысые политическэ
партиеу «Единэ Россием» и Адыгэ шъолъыр къутамэ
и Секретарэу КъумпIыл Мурат
Адыгэ Республикэм и Къэралыгъо Совет — Хасэм
и Тхьаматэу Владимир Нарожнэр