Сэнэхьат мэфэкIыр хагъэунэфыкIы инженерхэм, гъогурхэр зышIыхэрэм, зыгъэцэкIэжьхэу, язытет лъыплъэхэрэм, гъогухэм яшIынкIэ ищыкIагъэхэр зыгъэхьазырхэрэм.

ЦIыпIынэ Адам мы мафэр имэфэкI зыхъугъэр илъэситф икъугъ. Джащ фэдиз уахътэм Кощхьэблэ гъогушI гъэцэкIэжьын ГъэIорышIапIэм щэлажьэ. Гъэщ- лыхэкI IофшIэнэу зыхэтыгъэм къыхэкIи хэшIыкI зыфыримыIэгъэ лъэныкъом ар хэхьагъ. Фемыджагъэу, ау IофшIэным хэтэу зыдигъасэзэ, ыпаIокIэ Iухьагъэхэм акIырыплъызэ, сэнэхьатыр къызIэкIигъэхьагъэу джы фэIазэу гъогухэр ешIых. Апэрэ илъэситIум зэрысыгъэ асфальттелъхьэ машинэжъри кIэмкIэ фызэблахъу­гъэшъ, ащи Iофым нахь фегъэчэфы.
АМ: Адам, километрэ тхьапша илъэситфым къыкIоцI асфальт зытеплъхьагъэр? Къэолъыта?
— Ар къыпфэлъытэнэу щытэп. Кощхьэблэ районыр зэрэщытэу пIоми хъущт (мэщхы Адам).
Адам Iофым къыпэкIи къыддэгущыIагъ. Мы мафэхэм ащ иIофшIэн ижъотыпI. Куп-купэу Кощхьэблэ районым хэгощагъэхэу гъогухэр ашIых, гъэцэкIэжьын зищыкIагъэхэр агъэкIэжьых. Ежьыр зыхэт купыр Кощхьэблэ дэхьагъум, Чехракымрэ район гупчэмрэ азыфагу иль гъогу Iахьым фэгъэзагъ, асфальтыкIэ тыралъхьэ.
— Километри 2,5-рэ хъурэ гъогу Iахьыр тэшIы. Асфальтыр зэ тетлъхьагъ, джы ятIонэрэу тыкъырэкIо. Мы гъогу дэдэм изы Iахь километрих хъоу ащ ыпэкIэ мыгъэ дгъэтIылъыгъэ. Джы лъыпытыдзэжьыгъ. Ащ ыпэкIэ Фэдз лъэмыджыр тетлъхьагъ. Джыри Кощхьэблэ лъэмыджэу Лабэ телъыр тапэ илъ. IофшIэныр хъои, — еIо тигущыIэгъу.
КIымафэм гъогухэр ашIыхэрэп, арышъ, чъыIэр къэмысызэ Iофэу яIэр гъогушIхэм зэлъыкIагъэхьан фае. ПсынкIэу, ау мыгуIэхэу, тэрэзэу, бэрэ лэжьэнэу гъогур тыралъхьаныр пшъэрылъ шъхьаI. Мыщ дэжьым Адами бэ елъытыгъэр, ежьми ар зыдешIэжьы.
— Шъыпкъэр пIощтмэ, къинэп ыкIи гъэшIэгъоны цIыфхэм агъэфедэщт гъогур пшIыныр. ЗанкIэу, зэщизэу, иIужъуагъэ умыукъоу, курбы-щырбэу щымытэу бгъэтIылъын фае. Ары шъхьаIэр — узэримыдзэу урыкIошъуныр. Оператор сигъусэу зэрегъэзафэ, — къыддэгуащэ иIофшIэн ишъэфхэмкIэ.
АМ: Адэ, мы сэнэхьатым ухэмыхьэзэ, водителыбэхэм афэдэу, машэ горэм уипкIэмэ угу къызэкIигъаблэщтыгъэба, гъогушIхэм угу афэплъыщтыгъэба?
— Ары адэ, гъогу къутагъэм сырычъэ зыхъукIэ, бэрэ сыгубжыщтыгъ. Джы сэ сшIырэм ащ фэдэ къырамыIолIэным пае сыфэсакъзэ асфальтыр сэгъэтIылъы (мэщхы Адам).
Анцокъо Ирин.