Адыгеим икIэлэеджакIохэм яIофшIагъэу Урысые кIэлэцIыкIу экологическэ форумым къыщагъэлъэгъуагъэр анахь дэгъоу къыхахыгъ.

Технопаркэу «Кванториумым» икоманд Iофтхьабзэм хэлэжьагъэр. Лъэныкъоу «Лучшее экомероприятие в школе или детском саду» зыфиIорэмкIэ текIоныгъэр ащ къыдихыгъ. Эколог ныбжьыкIэхэм зынэхэм къащыкIэгъэ кIэлэцIыкIухэр зычIэс еджапIэхэм ыкIи IыгъыпIэхэм экологием фытегъэ­псыхьэгъэ Iофтхьабзэу ащызэхащэщтхэм япроект агъэхьазырыгъ. КIэлэцIыкIоу зымылъэгъухэрэр е дэеу зылъэгъухэрэр тишъо­лъыр иархитектурэ ыкIи экологие саугъэтхэм нэIуасэ афашIынхэу ары ахэм гухэлъэу яIэр.
Форумым изэхэщэкIо комитет мэкъэ­тынхэр зызэхещэхэм, Адыгеим икIэлэ­еджакIохэм япроект анахьыбэу баллхэр къыхьыгъэх ыкIи анахь дэгъоу къыхахыгъ. Проектыр пхыращыным фэшI сомэ мини 100 шIухьафтынэу ахэм къаратыгъ.
— Республикэ «Кванториумым» икомандэ текIоныгъэр къызэрэдихыгъэм фэшI сыфэгушIо! ГугъуемылIыныгъэ зыхэмылъ кIэлэ чанхэр зэрэтиIэхэм, нахьыжъхэм аготхэу социальнэ пшъэ­рылъхэм ягъэцэкIэн ахэр къызэрэхэлажьэхэрэм, гъэхъагъэхэр зэрашIыхэрэм тарэгушхо, — къы­Iуагъ АР-м и ЛIышъхьэу КъумпIыл Мурат.