Унагъом и Илъэс къыдыхэлъы­тэгъэ Iофтхьабзэхэр жъугъэу Адыгеим щызэхащэх. Ахэм ащыщ республикэм иобщественнэ зэхахьэу «Туристическэ Адыгеим» ипроектэу «Унагъор – зэ­кIэми алъапс» зыфиIоу игъэцэ­кIэн пае грант къызэратыгъэр.

ЛIэужыбэ хъурэ унагъохэр Мыекъуапэ щаугъоигъэх, ахэм ящытхъу аIуагъ, рэзэ­ныгъэ тхылъхэр афагъэшъошагъ, шIухьафтынхэр афашIыгъ. Республикэм иахъщэ IэпыIэгъурэ президент фондым имылъкурэкIэ проектыр гъэцэкIагъэ хъугъэ.
Зэхахьэр къызэIуихыгъ IофшIэнымкIэ ыкIи социальнэ хэхъоныгъэмкIэ АР-м и Министерствэ иотдел ипащэу Циникова Жаннетэ.
— Сыд фэдэрэ къэралыгъуи ылъапсэр унагъор ары. Унагъо пэпчъ зэфыщытыкIэ гъэнэфагъэ илъ, ар зэрыпсэурэ хэбзэ цIыкIу горэхэри иIэх. Адыгеим ибаиныгъэх хэбзэшIоу, хэбзэ дахэхэу пстэуми зэдыряе хъугъэхэр шапхъэу зиIэхэ унэгъо лэжьэкIо-псэуакIохэр, унэгъо бынышIухэр, унэгъо рэхьат зэгурыIо-зэдэIужьхэр. ЛIэужитф зэзыубытылIэрэ унагъохэм непэ ящытхъу тIонэу, игугъу тшIынэу шъукъедгъэблэгъагъ,— къыIуагъ Ж. Циниковам.
ГущыIэ фабэхэмкIэ унагъохэм закъы­фигъэзагъ общественнэ зэхахьэу «Туристическэ Адыгеим» ипащэу Уджыхъу Юныс.
— Шэн-хэбзэ дахэхэр зыщызэрахьэу, зэгурыIоныгъэрэ рэхьатныгъэрэ зэрылъ унагъом илъэуж хэкIокIэщтэп, — къы­Iуагъ Юныс.
МэфэкI Iофтхьабзэм республикэм ичIыпIэ зэфэшъхьафхэм къарыкIыгъэ унэгъуипшI рагъэблэгъагъ.
АдыгэкъалэкIэ — ГъукIэлIмэ яунагъо, Красногвардейскэ къикIыгъэ Хъутхэр, Теуцожь районымкIэ — Тыгъужъхэр, Кощхьэблэ районымкIэ ПIатэкъомэ яуна­гъо, Шэуджэн районым щыпсэурэ Исупхэр ыкIи нэмыкIхэри Iофтхьабзэм хэлэжьагъэх. Унагъом илъ шэн-хабзэхэр, ягъэ­хъагъэхэр ахэм къаIотагъэх.
Унагъо пэпчъ тарихъ гъэнэфагъэ пылъ ыкIи щыIэныгъэ гъогу гъэшIэгъон къыкIугъ. Красногвардейскэ районым къикIыгъэ Хъут Нуриет иунагъо анахь лIэкъо инхэм ащыщ. Ишъхьэгъусэрэ ежьыррэ илъэс 59-рэ зэдагъэшIагъ, пшъэ­шъиплIырэ зы кIалэрэ зэдапIугъ, пхъо­рэлъф 17, пхъорэлъфхэм япхъорэлъфы­жьэу нэбгырэ 45-рэ ыкIи ахэм къапыхъо­жьыгъэ нэбгыриплI зэкIэмкIи мэхъух. Хъут Нуриет лэжьэкIо пэрытэу сыдигъокIи щытыгъ, ыныбжь илъэс 94-рэ хъугъэ. Нуриет ыпхъоу Шъаукъо Людмилэ къызэриIотагъэмкIэ, Адыгеир илъэси 100 зэрэхъурэм ипэгъокIэу янэ шIухьафтын сомэ мини 100-м кIыгъоу медаль къыфагъэшъошагъ. Мы Iофтхьабзэм лIэуж зэтекIыр къеблэгъагъ. Унагъор хабзэм зэрищыкIагъэр зэхашIагъ.
— «Унагъор — зэкIэми алъапс» зыфиIорэ Iофтхьабзэм лIэужхэр зэрепхых. ЗэгурыIоныгъэу унагъом илъыр нахь егъэпытэ. Адыгеим щыпсэурэ унагъохэм онлайн шIыкIэу видеороликхэр къытфагъэхьыгъэх, анахь IофшIэгъэ дэгъухэр къыхэтхыгъ, — къыIуагъ Адыгеим изекIо-къэбарлъыгъэIэс Гупчэ ипащэу, Iофтхьабзэм изэхэщакIоу Ольга Ивановам.
— ТихэгъэгукIэ унагъор ары обществэм изэкъотныгъэ, цIыфыгъэ шэпхъэ дахэхэр къэухъумэгъэнхэм, культурэм ыкIи лъэпкъым афэгъэхьыгъэ хэбзэшIоу щыIэхэм алъапсэр. Унагъор ары кIэлэцIыкIум идунэееплъыкIэ зыфэдэ хъущтыр зэлъытыгъэр, цIыфыгъэ шэпхъэ дахэхэм, къыппэблагъэхэм уафэгумэкIыным, кIэлэцIыкIухэмрэ ны-тыхэмрэ унаIэ атетыным, Хэгъэгум къырыкIощтымкIэ пшъэ­дэкIыжь пхьын зэрэфаем язэхашIэ яублапIэр, — къыIуагъ общественнэ зэхахьэу «Туристическэ Адыгеим» хэ­тэу, Iофтхьабзэм икIэщакIомэ ащыщэу Марина Мельник.
Iофтхьабзэм гупшысэ шъхьаIэу уигъэ­шIырэр унэгъо Iужъум имэхьанэ зэрэ­иныр, дунаим уехыжьыгъэми, уигугъу дахэкIэ зышIыжьын лIэужхэр зэрэуиIэн фаер ары.
Лъэпшъыкъо
Фатим.