ГъэпцIакIохэм апэшIуекIогъэнымкIэ Урысые къэбарлъыгъэIэс кампанием иIофтхьабзэу «Клади трубку» зыцIэм Адыгэ Республикэм и Лъэпкъ тхылъеджапIэ хэлэжьагъ. МыщкIэ зэхэщакIохэм мурадэу яIагъэр телефон гъэпцIакIохэм цIыфхэр ащыухъумэгъэнхэр ары.

Урысыем и Лъэпкъ банк и Къутамэу АР-м щыIэм къыгъэхьазырыгъэ видеороликым зеплъыхэ нэуж Лъэпкъ тхылъеджапIэм иотдел ибиблиограф шъхьаIэу Н. Плотнерчук финанс ыкIи къэбар­лъыгъэ­Iэс щынэгъончъэнымкIэ лекцие къе­джагъ.
Ащ къыIуагъ зэкъодзакIохэм ренэу шIыкIэ зэфэшъхьафыбэ зэрагъэфедэрэр. ХэбзэухъумэкIо къулыкъушIэу, банкым иIофышIэу, яIахьылхэу аIозэ гъэпцIа­кIохэм цIыфхэр агъэделэх. Ахэм мурадэу яIэр зы – сыд ишIыкIэми, ахъщэ къызIэкIагъэхьаныр ары.
ШъумышIэрэ цIыфыр къышъуфытеоу, шъуикартэ илъ ахъщэр гъэпцIакIохэм рахын алъэкIынэу къызышъуиIокIэ, шъу­шIошъ шъумыгъэхъу, ар зэкъодзакIу, шъуегъэделэ. ШъудэмыгущыIэу телефоныр жъугъэтIылъыжь. Iофтхьабзэу «Клади трубку» зыцIэр джары зыфэгъэхьыгъэр.
ПэIудзыгъэ шIыкIэм тетэу гъэпцIагъэу зэрахьэхэрэр зыфэдэхэм Iофтхьабзэм хэлэжьагъэхэр ащагъэгъозагъэх.
Зэфэхьысыжьхэри ашIыгъэх: банкым илъ ахъщэм иухъумэнкIэ гуцафэ горэ шъушIымэ, банкым шъуфытеуи къэбар лъапсэр зэжъугъашI. Сакъыныгъэ къызхэжъугъаф, телефонымкIэ къышъуаIорэр зэкIэ шъушIошъ шъумыгъэхъу.
Iофтхьабзэм хэлэжьагъэхэм яупчIэхэм яджэуапхэр агъотыгъэх ыкIи нэпэеплъ шIухьафтынхэр аратыгъэх.