Тызхэт уахътэр къызэрыкIоп. Ащ елъытыгъэу, хъурэ-шIэрэм тылъыплъэныр, тыщыгъозэныр, мамырныгъэм тлъэкI къызэрихьэу тыфэIорышIэныр, пат­риотизмэр гъэлъэшыгъэныр ищыкIагъ.

Мы пшъэрылъ иным фэIорышIэх тиреспубликэ ит музейхэр. АщкIэ апэрэр АР-м и Лъэпкъ музей, тарихъ хъугъэ-­шIагъэхэм аготэу мыщ сыдигъуи IофшIэн мыпсынкIэ егъэцакIэ. Экспозицие инэу «Адыгеир Хэгъэгу зэошхом илъэхъан» зыфиIорэр Iахь пчъагъэу зэтеутыжьыгъ, зэошхор лъэныкъуабэкIэ къизыIотыкIэу, советскэ народыр ТекIоныгъэшхом зэ­рэфэкIуагъэр зыщыкIэгъэтхъыгъ.
Лъэпкъ музеим ипащэ игуадзэу Шэу­джэн Налмэс игущыIэ зэрэщыхигъэунэфыкIыгъэу, мы къэгъэлъэгъоныр ренэу зыдэжьэхэрэ лъэныкъо шъхьаIэу щыт: ти Хэгъэгу, советскэ цIыфхэм нэмыц-фашист техакIохэр зэкIадзэжьхи, яб ахэр рагъэзыхьажьхи, ТекIоныгъэшхор къызэ­рэдахыгъэр, къэралыгъор мамырныгъэм къызэрэфэкIожьыгъэр къызщиIотыкIы­гъэу, уиблэкIыгъэ озыгъашIэу ылъытагъ.
Кавказым зэошхоу щыкIуагъэр зэо хьылъэ дэдагъэми, советскэ дзэкIолIхэм ар нэмыц-фашистхэм зэрарамыгъэштагъэр, пыир зэхакъути, Кавказыр шъхьафит зэрашIыжьыгъэр, музейхэм, тхылъеджапIэхэм, еджэпIэ зэфэшъхьафхэм ащызэхащэгъэ Iофтхьабзэхэм мы мазэм къащыраIотыкIыгъ.
Патриотическэ пIуныгъэ-гъэсэныгъэм­кIэ дахэу Iофыбэ елэжьы Шэуджэн районымкIэ къуаджэу Хьакурынэхьаблэ илъэс 42-рэ хъугъэу щызэIухыгъэу, Советскэ Союзым и ЛIыхъужъэу, адыгэ усакIоу Андырхъое Хъусен имузей. Мыр 1982-рэ илъэсым бэдзэогъум къызэIуа­хыгъ. Ащ къыщыублагъэу, районым имызакъоу, зэкIэ Адыгеим ирайон зэ­фэшъхьафхэм ащыпсэурэ еджакIохэри, зыныбжь икъугъэ цIыфхэр зыхэт купхэри мыщ бэрэ къэкIох. Илъэсыбэ хъу­гъэу Андырхъое Хъусен илитературнэ музей инаучнэ IофышIэу, джырэ уахътэм ащ ифонд иухъумакIоу Хъут Фатимэ къызэ­рэтиIуагъэмкIэ, гухэкIми, Хэгъэгу зэошхом хэлэжьагъэхэу, иветеранхэу, а хьазабыр зынэ кIэкIыгъэхэу, патриотическэ пIуныгъэмкIэ IэпыIэгъу хъущтыгъэхэр щыIэжьхэп. Ащ къыхэкIэу, ахэм яписьмэхэр, ясурэтхэр, щыгъын-шъуа­шэхэр, ялIыгъэ къырапэсыгъэ тынхэр зыщыугъоигъэгъэ къэгъэлъэгъонхэр агъэхьазырых.
«Мыщ фэдэ къэгъэлъэгъонхэр лъэшэу кIэлэеджакIохэм, анахьэу я 6 — 8-рэ классхэм арысхэм ашIогъэшIэгъон», — еIо Хъут Фатимэ.
Хьакурынэхьаблэрэ Мамхыгъэрэ ягурыт еджапIэхэм, еджэпIэ-интернатэу къуаджэм дэтым ащеджэхэрэм ямызакъоу, районым ит еджапIэхэм кIэлэцIыкIухэр къызэраращыхэрэр, ахэм лIыгъэм къикIырэр ашIэ зэрэхъурэр, Андырхъое Хъусен Украинэм ит псэупIэу Дьяковэ дэжь лIыхъужъныгъэу щызэрихьагъэм фагъэнэIуасэхэзэ, лIэужыкIэр зэрапIурэр ащ къыIотагъ.
Джащ фэдэу патриотическэ пIуны­гъэмкIэ мэхьанэшхо зиIэ зэIукIэгъухэр, къэгъэлъэгъонхэр, зэнэкъокъу-викторинэ­хэр, IупкIэ еджэнхэр, Адыгэ Республикэм икIэлэцIыкIу тхылъеджапIэ, Лъэпкъ ыкIи Мыекъопэ къэлэ тхылъеджапIэхэм ащызэхащэх. КIэлэеджакIохэм яхэгъэгу ыкIи ячIыпIэ ятарихъ ашIэнымкIэ, тарихъым хэшIыкI фыряIэ хъунхэмкIэ мыщ фэдэ Iофтхьабзэхэм мэхьанэшхо яI.
Мамырыкъо Нуриет.